ކޮވިޑަށް ޕޮޒިޓިވްވެ އެކަހެރިކުރާ މީހުން ބަލިން ރަނގަޅުވުމުން ރިލީޒް ޑޮކިއުމެންޓް ދިނުން ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ހުއްޓާލައިފި އެވެ.
އެޗްއީއޯސީން މިއަދު ބުނީ ކޮވިޑަށް ޕޮޒިޓިވްވުމާ ގުޅިގެން އެކަހެރިވުމަށް ދޫކުރާ ލިއުމުގައި އެކަހެރިވާން ކަނޑައަޅާ މުއްދަތު ހިމެނޭނެ ކަމަށެވެ. އެ މީހަކު އެކަހެރިވެފައިވާ މުއްދަތު ނިމުމަކަށް އަންނާނީ އެ ލިއުމުގައި ބަޔާންކޮށްފައިވާ ގޮތަށެވެ.
އެޗްއީއޯސީން ބުނިގޮތުގައި ޕޮޒިޓިވްވާ މީހުންގެ ބަލި ހާލަތާ ގުޅިގެން އެކަހެރިވެ ހުންނަ މުއްދަތު ތަފާތުވާނެ އެވެ. މިގޮތުން، 14 ދުވަހުގެ މުއްދަތު ނިމޭއިރު ހުން އައުމާއި ނޭވާލާން އުނދަގޫވުމާއި ކެއްސުން ގޯސްވުން ފަދަ ކަންކަން ހުންނަ ނަމަ އެކަހެރިވާ މުއްދަތު 21 ދުވަހަށް ދެމިގެންދާނެ އެވެ.
އަދި ފަރުވާއަށް މެޑިކަލް ފެސިލިޓީއެއްގައި ހުރި މީހެއް ނަމަ އެކަހެރިކުރާ މުއްދަތު 14 ދުވަހަށް ވުރެން އިތުރުނުވާނެ ކަމަށާއި އެފަދަ މީހުން އެކަހެރިކުރެވޭ ޖުމްލަ މުއްދަތު ބަޔާންވާނި ޑޮކްޓަރުގެ އިރުޝާދުގެ މަތިން ކަމަށް ވެސް އެޗްޕީއޭ އިން ބުންޏެވެ.
އެޗްޕީއޭ އިން ވަނީ ގޭގައި އެކަހެރިވެގެން ތިބޭ ފަރާތްތަކުން ބަލީގެ އަލާމާތްތައް ފެންނަ ނަމަ ސިއްހީ ލަފަޔާ ފަރުވާހޯދަން އިލްތިމާސްކޮށްފަ އެވެ.
ކޮވިޑުގެ ހާލަތު ރާއްޖޭގައި ވަނީ ގޯސްވެފަ އެވެ. މި މަހު އެކަނި ވެސް 28،600 މީހުން ޕޮޒިޓިވްވެ 71 މީހަކު މަރުވެފައިވެ އެވެ.
