"ގައިމު ތައްޔާރުވާން ލިބުނު އަހަރުގެ ތެރޭގައި މިހެން ހުންނަ ކަންކަން ހުންނާން ޖެހޭނީ ހައްލުވެފަ ނޫންބާ" މާލޭގައި ކުޑަ ޓްރެވަލް އެޖެންސީއެއް ހިންގާ މުހައްމަދު އިސްމާއިލް ހިތްހަމަނުޖެހިފައި ބުންޏެވެ.
"މިއަދު އެތައް މުހިއްމު މަސައްކަތެއް ކުރަން އެބަހުރި. އިއްޔެ ހަވީރު އިއުލާނުކުރި ހިސާބުން ހުރިހާ ތަފްސީލެއް ފުރާފައި އެކްސެލް ޝީޓް ހުށަހެޅިން. އަދިވެސް ހުއްދައެއް ނުލިބޭ، އަދި އެދިގެން މި އުޅެނީ އެންމެ ދެ މުވައްޒަފުން ނެރެން."
މިއީ، އިސްމާއިލްގެ އޭޖެންސީގެ މުވައްޒަފުންނަށް ހުއްދަތައް ނުލިބިގެން އޭނާގެ ޝަކުވާ އެވެ. އޭނާގެ އިތުރުން އެހެން ވިޔަފާރިތަކާއި ކުންފުނިތަކަށް މުވައްޒަފުން ނެރެން ބޭނުންވާ ހުއްދަތައް ނުލިބިގެން ގިނަ ވިޔަފާރިވެރިން ތިބީ ހިތްހަމަނުޖެހިފަ އެވެ.
މިހާރު ބައެއް ވިޔަފާރިތަކަށް ޕޮލިސް ޕޯޓަލްގެ ތެރެއިން ހުއްދަތައް ލިބެން ފަށާފައިވީ ނަމަވެސް، މަސައްކަތު ދުވަހުގެ ދެބައިކުޅަ އެއްބައި ބޭކާރުވެއްޖެ ކަމަށް އެ މީހުންގެ ކަންބޮޑުވުން ފާޅުކުރި އެވެ.
ޕޯޓަލްއަށް ބާރު ބޮޑުވެގެން ހުއްދަ ނުލިބޭ
މިއަދު ހެނދުނު ގިނަ ވިޔަފާރިތަކާއި އޮފީސްތައް ނުހުޅުވިފައި ތިބީ ޕޯޓަލް ތެރެއިން ދޭން ޖެހޭ ހުއްދަތައް ނުލިބިގެންނެވެ. އިކޮނޮމިކް މިނިސްޓްރީގެ އެޕްރޫވަލް ލިބުމަށް ފަހު ވެސް ޕޮލިސް ޕޯޓަލްގެ ތެރެއިން މުވައްޒަފުންނަށް ބޭނުންވާ ޕާމިޓް ނުލިބެ އެވެ. މި މައްސަލަ ބޮޑަށް ދިމާވީ ގިނަ މުވައްޒަފުން ގެންގުޅޭ ވިޔަފާރިތަކަށެވެ.
މަޝްހޫރު ހޯލްސޭލް ވިޔަފާރިވެރިއެއްގެ ސަޕްލައި މެނޭޖަރަކު "އަދަދު"އަށް ވިދާޅުވީ އެޗްޕީއޭއިން އެދުނު ގޮތަށް ދެ ޝިފްޓަށް ބަހާލައިގެން މުވައްޒަފުން ޑިއުޓީއަށް ނެރެން މިނިސްޓްރީއަށް އީމެއިލް ފޮނުވައިގެން އެޕްރޫވަލް ލިބުނަސް، ހުއްދަ ލިބުނީ މެންދުރު ބާރަ ވެސް ޖެހި ފަހުން ކަމަށެވެ.
އޭގެ ސަބަބުން ދޯނިތަކަށާއި ގިނަ ފިހާރަތަކަށް މިއަދު ނިންމަން ހުރި ޑެލިވަރީތަކަށް ބުރޫއަރާފައިވާ ކަމަށް އޭނާ ބުންޏެވެ.
އަދި، ކުރިއަށް އޮތް ދުވަސްތަކުގެ ޑެލިވަރީތަކަށް ބުރޫނާރާނެ ގޮތަކަށް ކަންކަން ކުރެވެން ނެތީ ވެހިކަލްތަކަށް ހުއްދަ ދޫކުރާ އަދަދު ލިމިޓު ކުރާތީ ކަމަށް ވެސް އޭނާ ބުންޏެވެ.
ބައެއް ވިޔަފާރިތަކަށް އެންމެ ވެހިކަލެއް ދުއްވަން ޕާމިޓް ދޫކޮށްފައިވާ އިރު، އޭގެ ސަބަބުން ސަޕްލައިއަށާއި ޑެލިވަރީއަށް އަސަރު ކުރަމުންދާ ކަމަށް ކުދި ފިހާރަތަކާއި ކެފޭ ރެސްޓޯރަންޓުތަކުން ވާހަކަ ދެއްކި ވިޔަފާރިވެރިން ވެސް ބުންޏެވެ.
ސައިޓުތައް ހުއްޓުވާލުމުން ވިޔަފާރިވެރިއެއްގެ ސުވާލެއް
މާލެ ސަރަހައްދުގައި ކޮވިޑުން ރައްކާތެރިވާން އަޅާފައިވާ ފިޔަވަޅުތައް ހަރުކަށި ކުރުމާއެކު ކޮންސްޓްރަކްޝަން ސައިޓުތަކުގައި މަސައްކަތް ކުރުން ވަނީ މަނާވެފަ އެވެ. ސައިޓުތަކަަށް ގެއްލުންވާ ހާލަތުގައި މިނިސްޓްރީން ހުއްދަ ނަގައިގެން ސައިޓުގައި މަސައްކަތް ކުރެވެ އެވެ.
މިއީ ހަމަޖެހޭ ކަމަކަށް ކޮންސްޓްރަކްޝަން ކުންފުންޏެއް ހިންގާ ވިޔަފާރިވެރިއަކަށް ނުވި އެވެ. ބަދަލުގައި އޭނާ އޮއްސާލީ ޝަކުވާ ގޯންޏެކެވެ.
"ލޯނުތައް ހުރި ގޮތަށް ހުރީ. ކްލަޔަންޓުންނަށް މަސައްކަތް ނިންމައިދޭން ބުނި ތާރީހު ދަނީ. ކުއްޔަށް ނަގާފައި ހުރި މުދާތަކަށް އަގު އަރަނީ. ހިންގާ ހަރަދުތައް ދުވަހުން ދުވަހަށް މަތި ވަނީ. އެކަމަކު ވިޔަފާރި މިޖެހެނީ ހުއްޓުވާލަން." އޭނާ ބުންޏެވެ.
ސަރުކާރުން އަޅާ ފިޔަވަޅުތަކަށް އެއްބާރުލުން ދޭން ބޭނުން ވިޔަސް މިދިޔަ އަހަރު ލިބުނު ގެއްލުންތައް ފޫނުބެދިގެން އުޅޭއިރު، އުސޫލެއްގެ ތެރެއިން ސައިޓުތަކުގައި މަސައްކަތްކުރަން ހުއްދަ ދޫކުރެވެން ޖެހޭނެ ކަމަށެވެ.
އަދި އާންމުންނާ ދިމާ ނުވާ ބަޔަކަށް، ސައިޓުން މަސައްކަތް ނިންމާފައި ގޮސް ކަރަންޓީނު ވެގެން އެއް ތަނެއްގައި ތިބެވޭ ނަމަ މައްސަލައެއް ނެތް ކަމަށެވެ.
"މި ހުރިހާ ދުވަސްވީއިރު އެކަމާ ގުޅޭ ދިރާސާއެއް ހެދި، ޝަރުތުތަކެއް ކަނޑައަޅައިގެން ވިޔަސް މިކަން ކުރާނެ އުސޫލެއް އޮތް ނަމަ މި މައްސަލަތަކެއް ދިމާ ނުވާނެ." އޭނާ ބުންޏެވެ.
އިންތިޒާމުތަކުގެ ދޯހަޅިކަމުން ސަރުކާރަށް ފާޑުކިޔުން
ހުރިހާ ވިޔަފާރިވެރިން ކަހަލަ ގޮތަކަށް މައިގަނޑު ގޮތެއްގައި ކުރީ އެއް ޝަކުވާއެކެވެ. އެއީ ދުރާލާ އިންތިޒާމުތައް ހަމަޖައްސަން ފުރުސަތު ލިބި އިންތިޒާމުތައް ހަމަނުޖެހުނީ ކީއްވެގެންތޯ އެވެ. އަދި، ޕޮލިސް ޕޯޓަލްއަށް ބާރު ބޮޑުވެގެން ކަމަށް އުޒުރު ދެއްކި ނަމަވެސް، ބާރު ބޮޑު ނުވާނެ ގޮތަކަށް އިންތިޒާމުތައް ރާވާފައި ނެތުމުގެ ޝަކުވާ އުފުލި އެވެ.
ވިޔަފާރިވެރިންނާއި އަދި އާންމުން ވެސް ފާހަގަ ކުރާ މައްސަލައަކީ އެއީ އެވެ. ހާއްސަކޮށް ފިޔަވަޅުތައް އަޅަން އިއުލާނުކުރާ ހިސާބުން ފެށިގެން ބައެއް ކަންކަން ކުރާތީ އަމާޒުވާ ފާޑުކިޔުންތައް އިތުރެވެ.
މިސާލަކަށް ކޮވިޑް ކޮންޓްރޯލް ކުރަން އެޅި ފިޔަވަޅުތައް އޭގެ ކުރީ ދުވަހު އިއުލާނު ކުރެވުނު އިރު، އިކޮނޮމިކް މިނިސްޓްރީން ވިޔަފާރިތަކުން އަމަލުކުރަން ޖެހޭ ގޮތުގެ ގަވާއިދު ގެޒެޓު ކުރީ އިއްޔެގެ މެންދުރު ފަހުގެ ވަގުތެއްގައި ކަން ވިޔަފާރިވެރިއަކު ފާހަގަކުރި އެވެ.
އަދި، ބަލިމަޑުކަމުގައި ހޭދަވީ އަހަރަކަށް ވުރެ ގިނަ ދުވަހުގެ ތެރޭގައި ލިބުނު ފިލާވަޅުތަކުގެ އަލީގައި ސަރުކާރަށާއި ކަމާބެހޭ ބޭފުޅުންނަށް ދަސްވި އެއްވެސް ކަމެއް އޮތްތޯ އޭނާ ސުވާލު އުފެއްދި އެވެ.
ޕާމިޓްތައް ލިބުމުގައި އާންމުންގެ ހުރި ކަންބޮޑުވުންތަކާ ގުޅިގެން ޕޮލިސް މީޑިއާ އޮފިޝަލް ވިދާޅުވީ، މިނިސްޓްރީން ފޮނުވާފައި ހުރި ހުރިހާ ޕާމިޓްތަކެއް ޕްރޮސެސްކޮށް ނިމިފައިވާ ކަމަށެވެ. އަދި މިއަދުގެ ހެނދުނާއި އޭގެ ކުރިން އެދިފައިވާ ޕާމިޓްތައް ދޫނުކުރެވި ހުރިތޯ ބުނަން ދަތިކަމަށް ވިދާޅުވި އެވެ.
"އިކޮނޮމިކް މިނިސްޓްރީން ފޮނުވަމުން އަންނަ ވަރަކަށް މިކޮޅުން މި އަންނަނީ ޕާމިޓްތައް ދޫކުރަމުން. އެޕްރޫވަލް ދީފައި ހުރި ޕާމިޓްތައް ދޫކޮށްފިން" އޭނާ ވިދާޅުވި އެވެ.
ޕާމިޓްތައް ދޫކުރުމުގައި މިހާރު ދަތިކަމެއް ނެތް ކަމަށް ވިދާޅުވި ނަމަވެސް، އިއްޔެ ގިނަ ބަޔަކު މަގުތަކަށް ނުކުމެ ގެޔަށް ބޭނުންވާ ސާމާނާއި އެހެނިހެން މުދާ ގަންނަން ތޮއްޖެހިގެން އުޅުނީ ވެސް މި ސަބަބާ ހުރެ އެވެ. ދޫކުރާ ޕާމިޓްތަކުގެ އަދަދު ލިމިޓުވެފައި، ޕާމިޓް ލިބެންހުރި ދަތިތަކާ ގުޅިގެންނެވެ.
