މާފަންނު ބޮޑުގޭގައި ހަދާ ޕާކިން ޒޯނު ސަރަހައްދުގައި ހިމެނޭ ފާރެއްގައި ހިލޭ ކުރަހައިދިނުމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު އެދިވަޑައިގެންނެވި މައްސަލަ ހޫނުވުމުން އެންމެ ފަހުން އެކަން ބިޑަށް ހުޅުވާލަން ނިންމަވައިފި އެވެ.
އާ ސިޓީ ކައުންސިލުން ހަދާ ފުރަތަމަ ޕާކިން ޒޯނުގެ ފާރުގައި ރާއްޖޭގެ ރީތިކަމާއި އިސްލާމީ ވަންތަކަން ރަމުޒުކޮށްދޭ ކުރެހުމެއް ހިލޭ ކުރަހައިދޭން ޝައުގުވެރިވާ މީހުން މެސެޖްކޮށް ދެއްވަން އިއްޔެ މުއިއްޒު އެދިވަޑައިގެންނެވި އެވެ.
އެއާއެކު، އާޓް ކޮމިއުނިޓީގެ އާޓިސްޓުން ވަނީ އެކަމާ ކަންބޮޑުވުން ފާޅުކޮށްފަ އެވެ. ކޮވިޑްގެ މި ހާލަތުގައި އާމްދަނީއަށް ބޮޑު އަސަރެއްކޮށް، ގިނަ އާޓިސްޓުންނަށް އެއްވެސް ގޮތަކުން އާމްދަނީއެއް ނުލިބޭ ހާލަތެއްގައި މޭޔަރު ހިލޭ މަސައްކަތްކޮށް ދިނުމަށް އެދެމުގެ ޝަކުވާތަކުން ޓްވިޓާ ފުރިގެންދިޔަ އެވެ.
އެއާއެކު، މުއިއްޒު ނިންމެވީ ކޮވިޑްގެ މި އުނދަގޫ ވަގުތުގައި އާޓިސްޓުންނަށް ދަތިތައް ހުރުމުން، ކުރެހުމަށް ބޭނުންވާ ކުލަ އާއި ފިއްސާއި އަދި އެ ނޫން ވެސް ތަކެތި ސިޓީ ކައުންސިލްގެ ހަރަދުގައި ފޯރުކޮށްދިނުމަށެވެ.
ނަމަވެސް، އޭގެ ފަހުން ވެސް އާޓިސްޓުންގެ ހުނަރުގެ އަގު ވަޒަން މޭޔަރު ނުކުރައްވާ ކަމަށް ބުނެ ފާޑުކިޔުން އަމާޒުވި އެވެ. އެހެންވެ، އެންމެ ފަހުން މޭޔަރު މުއިއްޒުގެ ނިންމެވުމުން މުޅިން ބަދަލު ކުރެއްވި އެވެ.
މިއަދު ހެނދުނު މުއިއްޒު ކުރެއްވި ޓްވީޓެއްގައި ވިދާޅުވީ، އާޓިސްޓުންގެ ކަންބޮޑުވުންތަކާއި ހުށަހެޅުންތައް ބަލައިގެންފައިވާ ކަމަށެވެ. އެގޮތުން، އާޓިސްޓުންގެ ހުނަރަށް އުޖޫރަ ދިނުމަށް ނިންމަވާފައިވާ ކަމަށް އޭނާ ވިދާޅުވި އެވެ.
"އެއްވެސް އިރެއްގައި ނިޔަތަކީ އާޓިސްޓުންގެ ހުނަރުގެ އަގު ވަޒަން ނުކުރުމެއް ނުވަތަ އާޓިސްޓުންގެ ދަތި ހާލަތަށް ރިއާޔަތް ނުކުރުމެއް ނޫން،" މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި، ދެން ޕާކިން ޒޯނުގެ ފާރުގައި ކުރެހުމުގެ މަސައްކަތް ކުރިއަށް ގެންދާނީ ބީލަށް ހުޅުވާލައިގެން، އެންމެ ރަނގަޅު ބިޑެއް ހުށަހަޅާ ފަރާތަކަށް މަސައްކަތް ހަވާލުކުރާ ގޮތަށެވެ.
މުއިއްޒު އެގޮތަށް ނިންމެވުމުން ހެރިޓޭޖް މިނިސްޓަރު ޔުމްނާ މައުމޫން ވެސް ވަނީ އެ ނިންމުމަށް ތައުރީފު ކުރައްވައި، ޝުކުރު އަދާކުރައްވާފަ އެވެ.
ހަމައެކަނި ސައިކަލް ޕާކް ކުރެވޭ ގޮތަށް ޕާކިން ޒޯނު ހަދާނީ ބޮޑުގޭގެ ގޯތި ތެރޭގައި ހަދާފައިހުރި ވަގުތީ މިސްކިތަށް ދާ މީހުންނަށް ޕާކްކުރަން ފަސޭހަވާނެ ގޮތަށް ބޮޑުގޭގެ އުތުރު ފަރާތުގަ އެވެ.
