ކޮވިޑް ޖެހިގެން އިންޑިއާގައި މަރުވާ ޓާޓާ ސްޓީލް މުވައްޒަފުންގެ މުސާރަ އާއިލާތަކަށް ދެމުން ގެންދާނެ ކަމަށް އެ ކުންފުނިން ބުނެފި އެވެ.
ޓާޓާ ސްޓީލުން ބުނީ މަރުވާ މުވައްޒަފަށް 60 އަހަރު ފުރޭނެ ދުވަހާ ހަމައަށް އެ މީހެއްގެ މުސާރަ އާއި ހައުސިން އަދި މެޑިކަލް އެލަވަންސްތައް ދެމުން ދާނެ ކަމަށެވެ.
އޭގެ އިތުރުން ބަލިމަޑުކަމުގެ ތެރޭގައި މަރުވާ ފްރަންޓްލައިން މަސައްކަތްތެރިންގެ ދަރިން ގްރެޖުއޭޓްވުމާ ހަމައަށް ތައުލީމީ ހަރަދުތައް ވެސް ބަލަހައްޓައިދޭން ޓާޓާ ސްޓީލުން ވަނީ ވައުދުވެފަ އެވެ.
ކޮވިޑް ބަލިމަޑުކަން ފެށުނު ފަހުން މިހާތަނަށް އިންޑިއާގައި 300،000 އަށް ވުރެ ގިނަ މީހުން މަރުވެފައިވާ ކަމަށް ރަސްމީ ތަފާސްހިސާބުން ދައްކަ އެވެ. ނަމަވެސް އަސްލު އަދަދު އެއަށްވުރެ މަތިވާނެ ކަމަށް ތަޖުރިބާކާރުން ބުނެ އެވެ.
ޓާޓާ ސްޓީލްގެ އިތުރުން އިންޑިއާގެ އެހެން ބައެއް ބޮޑު ކުންފުނިތަކުން ވެސް ވަނީ ކޮވިޑުގައި މަރުވާ މުވައްޒަފުންގެ އާއިލާތަކަށް މާލީ ގޮތުން އެހީވާނެކަން އިއުލާނުކޮށްފަ އެވެ.
އެގޮތުން އޯޔޯ ރޫމްސް ހޮސްޕިޓެލިޓީ ގްރޫޕުން ބުނީ ކޮވިޑުގައި މަރުވާ މުވައްޒަފުންގެ މުސާރަ އަށް މަސް ވަންދެން އާއިލާއަށް ދޭނެ ކަމަށާއި އެމީހުންގެ ދަރިންގެ ތައުލީމީ ހަރަދު ފަސް އަހަރަށް ބަލަހައްޓައިދޭނެ ކަމަށެވެ.
ބިއްލޫރި އުފައްދާ ބޮރޮސިލް ކުންފުނިން ބުނީ އެ ތަނުގެ މުވައްޒަފަކު ކޮވިޑުގައި މަރުވެއްޖެ ނަމަ ދެ އަހަރު ވަންދެން އާއިލާއާ މުސާރަ ހަވާލުކުރަމުން ދާނެ ކަމަށެވެ.
އިންޑިއާއަށް ކުރިމަތިވެފައިވާ ކޮވިޑުގެ ދެ ވަނަ ރާޅުގައި ސިއްހީ ނިޒާމު ހުއްޓުމަކަށް އައިސްފައި ވާއިރު އިގްތިސާދީ ގޮތުން ވެސް ބޮޑު ލޮޅުންތަކެއް ވަނީ އަރާފަ އެވެ.
އެ ގައުމުގައި މިހާތަނަށް 26 މިލިއަން މީހުންނަށް ކޮވިޑް ޖެހިފައި ވެ އެވެ. މި ވަގުތު ދުނިޔޭގައި ކޮވިޑުގެ އެޕިސެންޓަރު ނުވަތަ އެންމެ ހާލަތު ގޯސް ތަނަކީ އިންޑިއާ އެވެ.
