"ކަރަންޓު މީޓަރަކަށް މި ލިބެނީ އެންމެ ދެ ފާސް. ދެން ގޭގައި ބައިވަރު މީހުން އުޅޭއިރު އެ ފާސް ޝެއާ ކޮށްގެން ނުކުމެ ބާޒާރުކުރަން ވަރަށް އުނދަގޫވާނެ. އެހެންވެ ގެއަށް ބޭނުންވާ ސާމާނު ކޮޅެއް ގަނެލަން އައިސް މިހުރީ،" މިފްކޯ މަސް ފިހާރަ ދިގު ކިޔޫގައި ހުރި މީހަކު ބުންޏެވެ.
މިއަދު މެންދުރުން ފެށިގެން މަގުތަކުގައި ތޮއްޖެހުނީ އެހެން މީހުންނެކޭ އެއްގޮތަށް ދެ ހަފުތާގެ ގޭބަންދުގެ ސާމާނު ޖަމާކުރާށެވެ. ކޮވިޑުގެ ހާލަތާ ގުޅިގެން މާދަމާ އިން ފެށިގެން މާލެ ތެރޭގައި އަނެއްކާ ފިޔަވަޅުތައް ވަރުގަދަކުރަނީ އެވެ.
ކުރިން ވެސް މިފަދަ ބަންދެއް ތަޖުރިބާކުރަން ޖެހުނެވެ؛ މިއަދު މާލެ ތެރެއިން އިއާދަވެފައިވަނީ މިދިޔަ އަހަރުގެ އޭޕްރީލް މަހުގެ 15 ވަނަ ދުވަހުގެ މެންދުރުން އަނބުރަން ދިޔައިރު ފެނުނު މަންޒަރެވެ.
އެކަން ތަކުރާރުވިޔަ ނުދޭން، ކާފިއު ގަޑީގެ ރަނގަބީލު ޖެހި، ފުލުހުންނާއި ސިފައިން ފޯރި މަރަން ނުކުތުމުގެ ކުރިން އެހެން މީހުންނެކޭ އެއްގޮތަށް ގެއަށް ސާމާނު ވައްދަން ހުރިހާ ފިހާރަތަކެއްގައި ގިނަ ބަޔަކު ތޮއްޖެހުނީ އެވެ.
އެސްޓީއޯ ސުޕާމާޓުން މީހަކު ބާޒާރުކޮށްގެން ނުކުންނައިރު، ގިނަ ބަޔަކު ނުވަދެވި ކިޔޫ ޖެހިފައި. -ފޮޓޯ: ހުސެއިން ވަހީދު/ އަދަދު
ސުޕަމާކެޓެއްތޯ މާޓެއްތޯ ނޫނީ ކަންމަތީ ފިހާރައެއްތޯ އެއް ނުބަލަ އެވެ. ކޮސްމެޓިކްސް އާއި ތަރުކާރީ ވިއްކާ ފިހާރަތައް ވެސް ހަމަ އެއް ހާލެއްގަ އެވެ. ބޭސް ފިހާރަތައް އަދި ވަކިން ބާރުބޮޑެވެ.
މޫނަކަށް ކަނދުރާއަކަށް ބެލުމެއް ނެތި ގެއަށް ބޭނުންވާހެން ހީވާ ކޮންމެ އެއްޗެއް ވަށިގަނޑަށް އަޅާލަނީ އެވެ. އެ މީހަކާއި އެ މީހެކެވެ. ފިހާރަކައަށް ވަދެވޭ މީހުންގެ އަދަދު ކަނޑައަޅައި ދޮރުގައި ތަތްކޮށްފައިވާ ސްޓިކާއެއް ވެސް މިއަދަކު ނުފެނެ އެވެ.
ބަލާކަށް ބޭނުންމެއް ވެސް ނުވެ އެވެ. އަތު ޖެހުނު އެއްޗެއް ގަނެގެން، އަތް ފުރާ ކޮތަޅު ހިފައިގެން މީހުން ކޮޅު ކޮޅަށް ދުވަނީ އެވެ. ފެން ކޭސްތަކާއި ބަސްތާތައް ކޮނޑުއަޅައިގެން ދާ ތަނެވެ. ފިހާރަތަކުގެ އިތުރުން މަގުތައް ވެސް ފުނިޖެހި ބަރުގޮނުގެ އަޑުން މުޅި މާލެ އޮތީ ގުގުމާލައިފަ އެވެ.
ކޮވިޑް-19ގެ ހާލަތު އިންތިހާއަށް ގޯސްވެ، ބަލި ފެތުރުން ކޮންޓްރޯލް ކުރަން މާދަމާ މުޅި މާލެ ސަރަހައްދުގެ ފިޔަވަޅުތައް ދެ ހަފުތާއަށް ހަރުކަށި ކުރާތީ އެވެ.
މިއަދުގެ މެންދުރުފަހު މާޖީދީ މަގު ތޮއްޖެހިފައި. -ފޮޓޯ: ހުސެއިން ވަހީދު/ އަދަދު
އެހާ ފޯރި ނަގާފައި، އަރުވާ ޖަހައިގެން މީހުން ނުކުތް އިރު ގިނަ ފިހާރަތުން ޑެލިވަރީކޮށްދެ އެވެ. އެކަމަށް ހުރަހެއް ވެސް ނެތެވެ. އެކަމަކު މީހުން އުޅުނު ގޮތުން ހީވީ މާލޭގައި ދުވަހަކު ވެސް ޑެލިވަރީ ނުކޮށްދޭ ހެންނެވެ.
"ގޭގަ އެބަތިބި ކުޑަ ދެ ކުދިން. އެ ކުދިންނަށް ބޭނުންވަނީ ވަކި ކަހަލަ އެއްޗެހިތަކެއް. އެކި ފިހާރަތަކުން ލިބެން ހުންނަ އެއްޗެހި އެއީ،" މަޖީދީމަގުގައި ހުންނަ އެމްއެޗްއޭ ފިހާރައަށް ވަންނަން ކިޔޫގައި ހުރި މީހަކު ބުންޏެވެ.
އެއީ އޭނާ މިއަދު ވަން ހަތަރު ވަނަ ފިހާރަ އެވެ. އެޗްއެޗްއޭ ދޮށުގައި އެ ތަނަށް ވަންނަ ކެތްމަދުވެފައި ހުރި އިރު އޭނާގެ އަތުގައި ބޮޑު ދެ ކޮތަޅު ފުރާ ސާމާނު އޮތެވެ.
މިއަދު މާލެ ތެރެއިން އިއާދަވެފައިވަނީ މިދިޔަ އަހަރުގެ އޭޕްރީލް މަހުގެ 15 ވަނަ ދުވަހުގެ މެންދުރުން އަނބުރަން ދިޔައިރު ފެނުނު މަންޒަރެވެ.
މިފަހަރު ލޮކްޑައުން އޭ ނުކިޔަސް ކުރީގެ މާޒީ އިއާދަވާން ގިނަ ބަޔަކު ބޭނުންނުވީ އެވެ. ގޭގައި ގުދަން ކުރަން ތަކެތި ނުގަންނަން ސަރުކާރުގެ ބަސް އަހައިގެން ލިބުނު ލަނޑު ތަކުރާރުވެދާނެ ކަމުގެ ބިރަށެވެ.
އެއީ ފިހާރައަކުން ނުކުތް އެހެން މީހަކު ބުނި ވާހަކަ އެވެ.
"ކުރީ ލޮކްޑައުންގަ އެއްޗެއް ނުގަނެ ހުރީ ސަރުކާރުން އެހެން އެދުނީމަ. އެކަމަކު އޭރު ޑެލިވަރީއެއް ނުކޮށްދެވުނު. ގޭގެ ހުރިހާ އެއްޗެއް ހުސްވީ. މިފަހަރު އެ ރިސްކެއް ނުނެގޭނެ،" އެ މީހާ ބުންޏެވެ.
އޭނާ ހިއްސާކުރީ މިއަދު ހަވީރު 4:00 ގެ ކުރިން ނުކުންނަން ދިމާކުރި އެންމެންގެ ވިސްނުމަށް ވުން ގާތެވެ.
މި ބަލިމަޑުކަމުން އަރައިނުގަނެވި އަހަރަކަށް ވުރެ ގިނަ ދުވަސްފަހުން މާލެ އަނެއްކާވެސް މި ދަނީ ބަންދަކަށެވެ.
އެސްޓީއޯ ސުޕާމާޓުގެ ތެރޭގައި ތަކެތި ގަތުމަށްފަހު ފައިސާ ދައްކަން ކިޔޫ ޖެހިފައި. -ފޮޓޯ: ހުސެއިން ވަހީދު/ އަދަދު
ސަރުކާރުން ބުނަނީ މާދަމާއިން ފެށިގެން ކުރަނީ ލޮކްޑައުނެއް ނޫން ކަމަށެވެ. އެކަމަކު މިދިޔަ އަހަރުގެ އޭޕްރީލް މަހުގެ 15 ވަނަ ދުވަހާއި މިއަދު މެންދުރު ފަހު ފެނުނު މަންޒަރުތައް ވަރުން އަޅުވާއިރު، ލޮކްޑައުނަކާ ވަރަށް ވައްތަރެވެ. ގިނަ މީހުން ގަބޫލުކުރަނީ ވެސް އެހެންނެވެ.
ކުރީ ފަހަރު މާލޭ ސަރަހައްދުގެ މުޅި ސަޕްލައި ނިޒާމަށް ބުރޫއަރައި، ކާބޯތަކެއްޗާއި ބޭހަށް ޖެހުނު ހިތި ތަޖުރިބާ ކުރަން އެކަކު ވެސް ބޭނުމެއް ނުވާނެ އެވެ.
އެކަން އެގޮތަށް ނުވާނެ ކަމަށް މިއަދު މަގުތަކަށް ނުކުތް ގިނަ މީހުން ގަބޫލުނުކުރިޔަސް، އެންމެންގެ ވެސް އުއްމީދަކަށްވާނީ އެ ނިކަމެތި ހާލަތު މިފަހަރު ތަކުރާރުނުވުމެވެ.
