ލީޑްސް ޔުނައިޓެޑްގައި މިހާރު ހުރި މަޝްހޫރު ކޯޗު މާސެލޯ ބިއެލްސާ 2017 ވަނަ އަހަރުގެ ޑިސެމްބަރު މަހު ލިލްގެ ކޯޗުކަމުން ވަކިވިއިރު، އެ ޓީމަށް އޮތީ ރެލިގޭޓްވުމުގެ ބިރު ބޮޑުވެފަ އެވެ. އެ ވަގުތު އެ ޓީމާ ހަވާލުވުމުގެ ރިސްކު ނެގީ އެންމެ ޓީމެއްގެ ކޯޗިން ތަޖުރިބާއާ އެކު ހުރި ފްރާންސްގެ ކޯޗު ކްރިސްޓޮފާ ގަލްޓިއޭ އެވެ. އޭނާ ވަނީ އެއް ޕޮއިންޓުގެ ފަރަގުން ލިލް އެ އަހަރު ފްރެންޗް ލީގުގެ ރެލިގޭޝަނުން ސަލާމަތްކޮށްދީފަ އެވެ.
ލިލްއާ ހަވާލުވުމަށް ފަހު ގަލްޓިއޭ ދިޔައީ މެޗަކަށް ފަހު މެޗެއް ޓީމަށް ކުރިއެރުން ހޯދައިދެމުންނެވެ. އެ ޓީމާ އެކު ފުރަތަމަ ފުލް ސީޒަން ނިންމާލީ ދެ ވަނައިގަ އެވެ. ދެ ވަނަ ސީޒަނުގައި މިދިޔަ އަހަރު ކޮވިޑާ ހެދި 28 މެޗަށް ފަހު ފްރެންޗް ލީގު އަވަހަށް ނިންމާލިއިރު، ލިލް ފަރުޖައްސާލަން ޖެހުނީ ހަތަރު ވަނައިގަ އެވެ.
އެ ހިސާބުން ވެސް ގަލްޓިއޭގެ މަސައްކަތަށް ވަރުބަލި ކަމެއް ނާދެ އެވެ. އޭނާ ބެލީ އިތުރަށް ރަނގަޅު ކުރަން ހުރި ކަން ކަމަށް ފޯކަސް ކޮށްގެން ލިލް އަށް 10 އަހަރު ތެރޭ ފުރަތަމަ ފަހަރަށް ލީގު ޗެމްޕިއަންކަން ހޯދައިދެވޭތޯ އެވެ. އޭނާ ރޭ އެކަން ހާސިލްކުރީ މި ފަހަރުގެ ލީގުގެ ބޮޑުގައި ބައިގައި ލީޑުގައި އޮވެ އެވެ. އަދި އެންމެ ފަހު ވަގުތާ ޖެހެންދެން ވެސް ފްރާންސްގެ ގަދަބާރު ޕީއެސްޖީ އަށް ފުރުސަތެއް ނުދީ އެވެ.
"ތެދެއް އަހަރެން ހަވާލުވިއިރު ރެލިގޭޝަނުގައި އޮތަސް އަހަރެން އެކަމަށް ނުވިސްނަން. ލިލް އަކީ ޒުވާން ކުޅުންތެރިންގެ ފައުންޑޭޝަނެއް އޮތް ކްލަބެއް. އެހެންވީމަ ތަޖުރިބާގެ ކަންކަން ރަނގަޅު ކޮށްލައިގެން ކާމިޔާބު ހޯދޭނެ ކަމުގެ އިތުބާރު އޮތް. އެ އިތުބާރު ޗެމްޕިއަންކަމާ ހަމައަށް މި ދެމެހެއްްޓީ،" ލީގު ތަށްޓާ އެކު ލިލް އިން ބޭއްވި އުފާފާޅުކުރުމުގެ ތެރެއިން ގަލްޓިއޭ ބުންޏެވެ.
ލިލްގެ މެޗެއްގެ ތެރެއިން ގަލްޓިއޭ އުފާފާޅުކުރަނީ.-- ފޮޓޯ: އޭއެފްޕީ
ފްރާންސަށް އުފަން ގަލްޓިއޭ 2009 އިން 2017 އަށް ކޯޗުކޮށްދިނީ ސެއިން އެޓިއެން އަށެވެ. އެ ޓީމުގައި ޒުވާން ކުޅުންތެރިން ޕްރޮމޯޓްކުރުމުގެ މުހިއްމު މަސައްކަތަކެއް ގަލްޓިއޭ އަދާކުރި އެވެ. ޕިއޭ އެމެރިކް އޮބާމަޔަން ފަދަ ތަރިން އެ ޓީމުގައި ޑިވެލޮޕްކުރި އެވެ.
ލިލް އިން ލީގު ހޯދިއިރު 22 އަހަރުން ދަށުގެ ފަސް ކުޅުންތެރިއަކު ވަނީ 20 މެޗަށް ވުރެ ގިނައިން ކުޅެފަ އެވެ. އެކަމުން ޒުވާން ކުޅުންތެރިންނަށް ގަލްޓިއޭ ކުރާ އިތުބާރު ފެންނަން އެބައޮތެވެ. ތަޖުރިބާކާރު ކުޅުންތެރިންނަށް ބަލާއިރު ތުރުކީގެ ފޯވާޑް ބުރަކް ޔިލްމާޒާއި ޕޯޗުގަލްގެ ޑިފެންޑަރު ހޯސޭ ފޮންޓް ވަނީ ގަލްޓިއޭގެ ޕްލޭނުގައި ލިލްގައި މުހިއްމު ރޯލެއް ކުޅެފަ އެވެ. މިއީ ގަލްޓިއޭ އައި ފަހުން އެ ޓީމުން ސޮއިކުރި ދެ ކުޅުންތެރިންނެވެ.
މި ފަހަރުގެ ޗެމްޕިއަންކަން ލިލް އިން ހޯދިއިރު އެ ޓީމުން ޖެހީ 64 ގޯލެވެ. މިއީ ފްރެންޗް ލީގުގެ ގަދަ ހަތަރެއްގައި ނިންމި ޓީމު ތަކުގެ ތެެރެއިން އެންމެ މަދުން ގޯލު ޖެހި ޓީމެވެ. ލިލް ކޮޅަށް ވަނީ 23 ގޯލެވެ. އެ ޓީމަކީ ޔޫރަޕްގެ ވަރުގަދަ ފަސް ލީގުގެ ތެރެއިން އެންމެ މަދުން ގޯލު ވަން ޓީމެވެ.
ލިލްގައި ސްކޮޑު އެކުލަވާލަން ގަލްޓިއޭ ވަނީ އަގުބޮޑުކޮށް ބައެއް ކުޅުންތެރިން ދޫކޮށްލައިފަ އެވެ. އެ ކުޅުންތެރިންގެ ތެރޭގައި އާސެނަލަށް 72 މިލިއަން ޕައުންޑަށް ބަދަލުވި ނިކޮލަސް ޕެޕާ އާއި ހަމަ އެ ޓީމުން 23 މިލިއަން ޕައުންޑަށް ގަތް ޑިފެންޑަރު ގަބްރިއެލް މަގަޅާއެސް ހިމެނެ އެވެ. މިދިޔަ ދެ އަހަރު ތެރޭ ކުޅުންތެރިން ވިއްކައިގެން 160 މިލިއަން ޕައުންޑް ލިލް އިން ހޯދި އެވެ.
މި ސީޒަނުގައި ލިލް އަށް ފްރާންސްގެ ތަށި ގެނެސްދިން ސްކޮޑުގެ އަގަކީ 126.5 މިލިއަން ޕައުންޑެވެ. ވާދަވެރި ޕީއެސްޖީގެ ސްކޮޑުގެ އަގަކީ 551 މިލިއަން ޕައުންޑް އެވެ.
އުމުރުން 54 ގެ ލްޓިއޭ ލިލްގައި ކުރި މަސަައްކަތް ރަނގަޅުވުމުން އޭނާ ހޯދަން ޔޫރަޕްގެ އެކި ގައުމުތަކުގެ ކްލަބްތަކުން ޝައުގުވެރިވެ އެވެ. އޭގެ ތެރޭގައި ކޯޗަކު ހޯދަމުން އަންނަ ޓޮޓެންހަމް ހޮޓްސްޕާސް ވެސް ހިމެނެ އެވެ. އެކަމަކު ގަލްޓިއޭ ބޭނުންވަނީ ފްރާންސްގެ ޓީމަކަށް ބަދަލުވާށެވެ.
ރިޕޯޓްތައް ބުނާގޮތުން ގަލްޓިއޭ ހޯދަން ފްރާންސްގެ ނީސް އާއި ލިޔޯނުން އަންނަނީ މަސައްކަތް ކުރަމުންނެވެ. ލިލްއާ އެކު ގަލްޓިއޭ ހަދާފައިވާ ކޮންޓްރެކްޓްގައި ބާކީ އަހަރެއް އެބައޮތެވެ. އެކަމަކު ކްލަބްގައި ހުރި ބައެއް ކަހަލަ ކަންތައްތަކާ ހުރެ އޭނާ އެހެން ޓީމަކަށް ބަދަލުވުމުގެ ފުރުސަތު ބޮޑެވެ.
