މިލާން (މެއި 24) - އިޓާލިއަން ލީގުގައި މިރޭ އެޓަލަންޓާ 2-0 އިން ބަލިކުރި އޭސީ މިލާނާއި ބޮލޯނިއާގެ މައްޗަށް 4-1 އިން ކުރިހޯދި ޔުވެންޓަސް ލީގުގެ ގަދަ ހަތަރެއްގައި ނިންމައި އަންނަ ސީޒަނުގެ ޗެމްޕިއަންސް ލީގުން ޖާގަ ހޯދައިފި އެެވެ.
ބާކީ ހަތަރު މެޗު އޮއްވައި އިޓާލިއަން ލީގު ކާމިޔާބުކުރި އިންޓަ މިލާނުން މިއަދު ތަށި އުފުލާލީ ލީގުގެ ފަހު މެޗުގައި އަމިއްލަ ދަނޑުގައި 5-1 އިން އުދިނޭޒީ ބަލިކޮށްފަ އެވެ. އިންޓަ އަށް ވަނީ 91 ޕޮއިންޓް ލިބިފަ އެވެ.
އޭސީ މިލާނުން އަށް އަހަރު ތެރޭ ފުރަތަަމަ ފަަހަރަށް ޗެމްޕިއަންސް ލީގުގެ ޖާގަ ހޯދީ ލީގުގެ ދެ ވަނައިގެ ގޮތުގަ އެވެ. އެ ޓީމަށް 79 ޕޮއިންޓް ލިބުނުއިރު، ތިން ވަނަ އަށް ދިޔަ އެޓަލަންޓާގެ އޮތީ 78 ޕޮއިންޓެވެ. ޔުވެންޓަސް އަށް ވެސް 78 ޕޮއިންޓް ލިބުނުއިރު، އެޓަލަންޓާ އަށް ހެޑް ޓު ހެޑު ގަވާއިދުން ކުރި ލިބުނީ އެވެ.
ޔުވެންޓަސް އިން މިރޭގެ މެޗުން މޮޅުވި ނަމަވެސް މެޗަށް ނުކުތްއިރު ގަދަ ހަތަރެއްގައި ނިންމުމުގެ އަމިއްލަ ބާރެއް ނެތެވެ. ޔުވެންޓަސް އަށް ނަސީބުގެ އެހީ ލިބުނީ ނަޕޯލީ ކުޅުނު މެޗުން 1-1 އިން ވެރޯނާއާ އެއްވަރު ވުމުންނެވެ. ނަޕޯލީ 77 ޕޮއިންޓާ އެކު ލީގު ނިންމާލިއިރު، އަންނަ ސީޒަނުގައި އެ ޓީމު ކުޅޭނީ ޔޫރޮޕާ ލީގުގަ އެވެ. ޔޫރޮޕާ ލީގުގެ އަނެއް ޖާގަ ހޯދީ ހަ ވަނައިގައި އޮތް ލާޒިއޯ އެވެ. އެ ޓީމުގެ އޮތީ 68 ޕޮއިންޓެވެ.
ހޯސޭ މޮރީނިއޯގެ ކޯޗުކަމުގައި އަންނަ ސީޒަނުގައި ކުޅެން ތައްޔާރުވަމުން އަންނަ ރޯމާ ނިންމާލީ ހަތް ވަނައިގަ އެވެ. އެއީ 62 ޕޮއިންޓާ އެކު އެވެ. ރޯމާ ކުޅޭނީ ޔުއެފާ އިން އަންނަ ސީޒަނުގައި ފަށާ ތިން ވަނަ ފަންތީގެ ކްލަބް މުބާރާތް ކަމަށްވާ ޔުއެފާ ކޮންފަރެންސް ލީގުގަ އެވެ.
މޮޅުވާން މަޖުބޫރު މެޗެއް ނަމަވެސް ޔުވެންޓަސް އިން ކުޅުނީ ކްރިސްޓިއާނޯ ރޮނާލްޑޯ ނުލަ އެވެ. އެއީ އޭނާ އަށް ފަހު ޕްރެކްޓިހުގައި ދިމާވި ފިޓްނަސް ކަމެއްގެ ސަބަބުންނެވެ. ޔުވެންޓަސްގެ ގޯލުތައް ޖެހީ އަލްވާރޯ މޮރާޓާ ދެ ގޯލާއި ފެޑެރީކޯ ޗިއޭސާ އަދި އޭޑްރިއަން ރަބިއޯ އެވެ. ބޮލޯނިއާގެ ހަމައެކަނި ގޯލު ޖެހީ ބަދަލު ކުޅުންތެރިއެެއްގެ ގޮތުގައި ކުޅެން އެރި ރިކާޑޯ އޮރްސޮލީނީ އެވެ.
އިންޓަ ކުޅުންތެރިން ތަށްޓާ އެކު އުފާފާޅުކުރަނީ.
މިއީ 10 އަހަރު ތެރޭ ޔުވެންޓަސް އަށް އިޓާލިއަން ލީގު ގެއްލުނު ފުރަތަމަ ފަހަރެވެ. ޔުވެންޓަސްގެ ކޯޗު އަންދްރެއާ ޕިރްލޯ އަށް މަގާމުގައި ދެމިހުރެވިދާނެ ކަމާ މެދު މީޑިއާ އިން އަންނަނީ ސުވާލު އުފައްދަމުންނެވެ.
އެޓަލަންޓާ ދަނޑުގައި މިލާންގެ ދެ ގޯލު ވެސް ޖެހީ ޕެނަލްޓީން ފްރޭންކް ކެސިއޭ އެވެ. އެޓަލަންޓާ އިން މި މެޗު ނިންމާލީ ކުޅުންތެރިއަކު މަދުކޮށެވެ. އެއީ އިތުރު ވަގުތުގައި އެ ޓީމުގެ މާޓެން ޑެ ރޫން އަށް ރަތް ކާޑު ދެއްކުމުންނެވެ. މި އަހަރު ޔޫރޮޕާ ލީގުގައި ކުޅުނު މިލާން އަންނަ އަހަރު ކުޅޭނީ ޗެމްޕިއަންސް ލީގުގަ އެވެ. އެ ޓީމު އެންމެ ފަހުން ޗެމްޕިއަންސް ލީގުގައި ކުޅުނީ 2014 ވަަނަ އަހަރު އެވެ. މިލާން ވަނީ ހަތް ފަހަރު ޗެމްޕިއަންސް ލީގު ކާމިޔާބުކޮށްފަ އެެވެ.
ނަޕޯލީން ވަނީ މިރޭ މެޗުގެ 60 ވަނަ މިނިޓްގައި އޭރިއާތެރެއިން އާމިރް ރަހުމާނީގެ ގޯލުން ލީޑުނަގައިފަ އެވެ. އެކަމަކު އެ ލަނޑު ޖެހިތާ އަށް މިނިޓް ފަހުން ވެރޯނާ އަށް އެއްވަރުކޮށްދިނީ ޑަވީޑޭ ފަރޯނީ އެވެ. ނަޕޯލީން އިތުރު ގޯލެއް ޖަހަން ކުރި މަސައްކަތް ކާމިޔާބެއްނުވި އެވެ.
އެގާރަ އަހަރު ތެރޭ ފުރަތަމަ ފަހަރަށް އިޓާލިއަން ލީގު ތަށި އުފުލާލި އިންޓަ އިން މިރޭ ވަނީ އުދިނޭޒީއާ ދެކޮޅަށް މޮޅު ކުޅުމެއް ދައްކައިފަ އެވެ. އިންޓަގެ ގޯލުތައް ޖެހީ އެޝްލީ ޔަންގް، ލަޓާރޯ މާޓިނޭޒް، ކްރިސްޓިއަން އެރިކްސަން، ރޮމެލޫ ލުކާކޫ އަދި އިވާން ޕެރިސިޗް އެވެ. އުދިނޭޒީގެ ހަމައެކަނި ގޯލު ޖެހީ ކުރިން ޔުވެންޓަސް އަށް ކުޅުނު ރޮބާޓޯ ޕެރޭރާ އެވެ. އޭނާ ގޯލު ޖެހީ ޕެނަލްޓީ އަކުންނެވެ.
