ކުރީގެ ނައިބު ރައީސް އަހުމަދު އަދީބުގެ މައްޗަށް އުފުލި އެމްއެމްޕީއާރްސީ ކޮރަޕްޝަންގެ ދައުވާތައް ބޭރުކޮށްލި ކުރިމިނަލް ކޯޓުގެ ގާޒީ އިސްމާއިލް ރަޝީދު، ފަނޑިޔާރު ކަމުން ވަކިކުރުމަށް ރައްޔިތުންގެ މަޖިލީހަށް ހުށަހަޅަން ޖުޑީޝަލް ސާވިސް ކޮމިޝަން (ޖޭއެސްސީ)ން ނިންމައިފި އެވެ.
އިއުތިރާފު އެއްބަސްވުމެއް ހަދައި، އަދީބުގެ މައްޗަށް ކުރިން ކޮށްފައިހުރި ދައުވާތައް އަނބުރާ ގެންދިޔުމަށްފަހު މަނީލޯންޑްރިން ހިމެނޭ ގޮތަށް އަދީބުގެ މައްޗަށް ހަތް ދައުވާއެއް އުފުލި އެވެ. ނަމަވެސް، ގާޒީ އިސްމާއިލް ރަޝީދު އެ ހަތް ދައުވާ ވެސް ބާތިލްކުރީ އަދީބަށް ޓޯޗާކޮށް ނުފޫޒު ފޯރުވާފައިވާތީ ކަމަށެވެ. އަދި، އަދީބާއެކު ވެފައިވާ އިއުތިރާފު އެއްބަސްވުމަކީ ގާނޫނު ދަންނަ އެއްޗެއް ނޫން ކަމާއި އޭރުގެ ޕީޖީ އައިޝަތު ބިޝާމް އަމަލު ކުރައްވާފައިވަނީ ގާނޫނީ އިމުން ބޭރުން ކަމަށް ކަނޑައަޅުއްވާފައިވެ އެވެ.
މިކަންކަން ގާޒީ އިސްމާއިލް ރަޝީދު ކަނޑައެޅުއްވީ، އެ ނުކުތާތައް ނުވަތަ ޓޯޗާކުރި ކަމަށް އަދީބު ވެސް ވިދާޅުވެގެންނެއް ނޫނެވެ. ގާޒީ އިސްމާއިލް ރަޝީފުގެ މި ނިންމެވުމާއެކު ބޮޑެތި ތުހުމަތުތަކެއް ކުރެވޭ އަދީބު މިނިވަންވި އެވެ.
ހިޔާނާތުގެ ދައުވާތައް ބޭރުކޮށް، އެ މައްސަލާގައި ދެން އިތުރަށް ދައުވާ ނުކުރެވޭނެ ކަމަށް ކަނޑައަޅައި، ގާޒީ އިސްމާއިލް ރަޝީދު ނެރުއްވި އެ އަމުރުގެ މައްސަލަ ޖޭއެސްސީއަށް ހުށަހެޅުއްވީ ޕްރޮސިކިއުޓާ ޖެނަރަލް ހުސެއިން ޝަމީމެވެ.
އެ ސުލޫކީ މައްސަލައާ ގުޅިގެން ގާޒީ އިސްމާއިލް ރަޝީދު ސަސްޕެންޝްގައި ވެސް ހުންނެވުމަށްފަހު މިހާރު ކޯޓަށް ނުކުންނަވަ އެވެ.
ނަމަވެސް، މިއަދު ޖޭއެސްސީން ނިންމާފައިވަނީ ގާޒީ އިސްމާއިލް ރަޝީދުގެ މައްޗަށް ސުލޫކީ މައްސަލަ ސާބިތުވާ ކަމަށެވެ.
އެގޮތުން، ޖޭއެސްސީން ބުނީ، ގާޒީ އިސްމާއިލްގެ ނިންމެވުމަކީ ޖިނާއީ އިޖުރާއަތުގެ ގާނޫނުގެ 13 ވަނަ ބާބުގައި ބަޔާންކޮށްފައިވާ އިޖުރާއަތްތަކާ ފާޅުކަންބޮޑު ގޮތެއްގައި ފަރުވާލެއް ނެތި ކަނޑައެޅިގެން ހިލާފަށް ނިންމާފައިވާ ނިންމުމެއް ކަމަށެވެ.
ޖޭއެސްސީގެ ތަހުގީގަށް ހޯދި ހޯދުންތަކުން އެނގިފައިވަނީ، ނިންމުން ނިންމި ދުވަހު އިޖުރާއީ ގޮތުން ކަންތައްތަކެއް ފާހަގަކުރުމަށް ގާޒީ ސުވާލުތަކެއް ކޮށްފައިވީ ނަމަވެސް، އޭގެ މާކުރިން ފެށިގެން އެ ހުކުމް ލިޔެ ތައްޔާރުކޮށްފައި އޮތް ކަމެވެ.
އެގޮތުން، ގާޒީގެ ނިންމުން އިޖުރާއީ އަޑުއެހުމެއް ބޭއްވުމަށްފަހު މިދިޔަ އަހަރުގެ ޖުލައި މަހުގެ 14 ވަނަ ދުވަހު ނިންމެވިއިރު، އެ ހުކުމް މިދިޔަ އަހަރުގެ ފެބުރުއަރީ މަހުން ފެށިގެން އޮތީ ލިޔެ ރައްކާކޮށްފަ އެވެ.
"ތަހުގީގަށް ހޯދުނު ޕެންޑްރައިވެއްގައި 22 ފެބްރުއަރީ 2020 ވަނަ ދުވަހު ސޭވްކޮށްފައިވާ "އިޖުރާއީގޮތުން ނިންމާ ނިންމުން" މި ސުރުހީގެ ދަށުން ތައްޔާރުކޮށްފައިވާ ލިޔުމުގައިވާ ނުކުތާތަކާއި ހުކުމުގައިވާ ނުކުތާތަކަކީ އެއް ނުކުތާތަކެއް،" ޖޭއެސްސީން ބުންޏެވެ.
ޕެންޑްރައިވްގައި ސޭވްކޮށްފައިވާ "އިޖުރާއީ ގޮތުން ނިންމާ ނިންމުން" މި ސުރުހީގެ ދަށުން ތައްޔާރުކޮށްފައިވާ ލިޔުން ސޭވްކޮށްފައިވަނީ، [trip finale v2] ގެ ނަމުގައި ކަމަށް ވެސް ޖޭއެސްސީން ބުންޏެވެ.
ޖޭއެސްސީން ބުނީި އެ ނަމަކީ އާންމު ގޮތެއްގައި މި ބާވަތުގެ ފައިލެއް ފަނޑިޔާރަކު ސޭވްކުރާނެ ނަމެއްކަން ސަބަބުވެރި އިންސާނެއްގެ ވިސްނުމުން ވިސްނާއިރު ގަބޫލު ނުކުރެވޭތީ އާއި، މި ނަމަކީ އެ ގަޒިއްޔާއާ ގުޅުމެއް ނެތް އާދަޔާ ހިލާފު ނަމެއްކަން ފާހަގަ ކުރެވުނު ކަމަށެވެ.
"ގާޒީ އިސްމާއިލް ރަޝީދު ބޭނުން ކުރުމަށް ކޮމްޕިއުޓާ ސިސްޓަމެއް ކްރިމިނަލް ކޯޓުގައި ހުންނައިރު ކޯޓުގައި ހިންގާ ގަޒިއްޔާތަކެއްގެ ލިޔެކިއުންތައް ޕެންޑްރައިވެއްގައި ގެންގުޅުމާއި އަދި ވަކިން ހާއްސަކޮށް ވަކި ގަޒިއްޔާތަކެއްގެ ލިޔެކިއުން އެކަނި އެ ޕެންޑްރައިވްގައި ހުރުމާއި، ގަޒިއްޔާތަކެއްގެ ދައުވާ ހުށަހެޅުމާ ހަމައަށް ވެސް ނުދަނީސް އެ ގަޒިއްޔާތައް ނިންމާނެ ގޮތުގެ ފައިލް އެ ޕެންޑްރައިވްގައި ތައްޔާރުވަމުންދިއުމުން ފަނޑިޔާރުގެ އަމަލުތަކާމެދު ސުވާލު އުފެދޭ،" ޖޭއެސްސީން ބުންޏެވެ.
އެހެންވެ، އަދީބުގެ މައްސަލާގައި ހުކުމްކޮށްފައި ވަނީ އެއްވެސް ފަރާތެއްގެ ނުފޫޒެއް ނެތި މިނިވަންކަމާއި މުސްތަގިއްލުކަމާއެކު ނޫންކަން ފާހަގަވާއިރު އެ އަމަލަކީ، ގާޒީ އިސްމާއިލް ރަޝީދު ފަނޑިޔާރުކަމުގެ މަގާމުން ވަކިކުރުމަށް ރައްޔިތުންގެ މަޖިލީހަށް ހުށަހެޅަންޖެހޭ ކަމެއް ކަމަށް ޖޭއެސްސީން ވަނީ ނިންމާފަ އެވެ.
ފަނޑިޔާރަކު މަގާމުން ވަކި ކުރެވޭނީ އެކަމަށް ޖޭއެސްސީން ހުށަހަޅައިގެން ރައްޔިތުންގެ މަޖިލީހުން ފާސްކޮށްގެންނެވެ. މިގޮތަށް ފަނޑިޔާރަކު ފުރަތަމަ ފަހަރަށް ވަކިކޮށްފައިވަނީ ވެސް މިހާރު އޮތް ޖޭއެސްސީން ހުށަހަޅައިގެން މިހާރު އޮތް 19 ވަނަ މަޖިލީހުންނެވެ.
އަދީބުގެ ދައުވާތައް ބޭރުކޮށް ގާޒީ އިސްމާއިލް ރަޝީދުގެ ނިންމުން ހައިކޯޓުގައި އިސްތިއުނާފު ކުރުމުން އެ ކޯޓުން ވެސް އެ ނިންމުމަކީ ބޮޑު ގޯހެއް ކަމަށް ކަނޑައަޅާފަ އެވެ. އަދި އަލުން ކުރިމިނަލް ކޯޓަށް މައްސަލަ ބަލަން އެންގިިއިރު، މިހާރު އަދީބު ހުރީ އަމިއްލައަށް އިއުތިރާފުވެގެންނާއި ހެކިތަކުގެ މައްޗަށް އެ ދައުވާތައް ސާބިތުވުމުން 20 އަހަރުގެ ޖަލު ހުކުމެއްގަ އެވެ.
