ހުޅުމާލޭ މެޑިކަލް ފެސިލިޓީގައި އެޑްމިޓްކޮށްގެން ފަރުވާ ދެމުން އަންނަ ބަލި މީހުންގެ ހާލަތު އާއިލާއިން ބެލުމަށްޓަކައި މިއަދު އެތަނުގައި ކޯލް ސެންޓަރެއް ގާއިމްކޮށްފި އެވެ.
ހުޅުމާލެ މެޑިކަލް ފެސިލިޓީ އާއި ޓޫރިޒަމް މިނިސްޓްރީ ގުޅިގެން ހަދާފައިވާ ކޯލް ސެންޓަރުގެ ހޮޓްލައިންނަކީ 3022221 އެވެ.
ފެސިލިޓީގައި ބާއްވާފައިވާ މީހުންގެ ހާލު ބެލޭނެ ގޮތެއް ހަމަޖައްސާފައި މި ވަނީ އެތަނުގައި އެޑްމިޓް ކޮށްފައި ތިބޭ މީހުންގެ ހާލަތު އާއިލާތަކަށް ނާންގާތީ ކަންބޮޑުވުން ފާޅުކޮށްފައި އޮއްވަ އެވެ.
އެޗްއީއޯސީން މިއަދު ބޭއްވި ނޫސްވެރިންގެ ބައްދަލުވުމުގައި ހުޅުމާލޭ ހޮސްޕިޓަލްގެ ސީއީއޯ މާރިޔާ ސައީދު ވިދާޅުވީ ބަލި މީހުންގެ މައުލޫމާތު އާއިލާތަކާ ހިއްސާ ކުރަން ބޭނުން ނުވަނީ ނޫން ކަމަށެވެ. ބަލި މީހުންނަށް އަޅާލާފައި އެ މައުލޫމާތު ހިއްސާ ކުރާނެ ވަގުތު ނުވަނީ ކަމަށް އޭނާ ވިދާޅުވި އެވެ.
ފެސިލީޓީގައި ފަރުވާ ދޭ ބަލިމީހުންގެ އެހީތެރިންނަށް ނުތިބެވޭ ކަމުގެ ޝަކުވާއާ ގުޅޭގޮތުން މާރިޔާ ވިދާޅުވީ ކޮވިޑުގެ ސަބަބުން ބޭރަށް ގޮސް އައިސް ތިބޭގޮތަށް މީހަކު ބެހެއްޓުމުގެ ހުއްދަ ދެވެން ނެތް ކަމަށެވެ. އަދި އެތެރޭގައި މަޑު ކުރަން ކޮންމެ ބަލި މީހަކަށް އެހީތެރިއަކަށް ފުރުސަތު ނުދެވެނީ ޖާގައިގެ ދަތިކަމުގެ ސަބަބުން ކަމަށް އޭނާ ވިދާޅުވި އެވެ. ނަމަވެސް ބައެއް ހާލަތުގައި ތިބި ބަލި މީހުންނަށް އެހީތެރިއެއްގެ ފުރުސަތު ދެމުން އަންނަ ކަމަށް އޭނާ ވިދާޅުވި އެވެ.
މާރިޔާ ވިދާޅުވީ ފެސިލީޓިގައި އެޑްމިޓް ކޮށްފައިވާ ބަލި މީހުން ދަރުމަވަންތަ ހޮސްޕިޓަލަށް ނުވަތަ އައިޖީއެމްއެޗަށް ބަދަލު ކޮށްދޭން ވަރަށް ގިނައިން އެދެމުން ދާ ކަމަށެވެ. އޭނާ ވިދާޅުވީ އެ ފެސިލިޓީގައި ވެސް ފަރުވާ ދެމުން އަންނަނީ އެ ހޮސްޕިޓަލްތަކުގައި ވެސް މަސައްކަތް ކުރައްވާ ޑޮކްޓަރުން ކަމަށެވެ.
