ކޮވިޑް ފަތުރާ ވައިރަހުގެ "އިންޑިއާ ވޭރިއެންޓަށް" ނިސްބަތް ކުރާ ހުރިހާ ކޮންޓެންޓެއް ނަގަން އިންޑިއާ ސަރުކާރުން ސޯޝަލް މީޑިއާ ކުންފުނިތަކަށް އަންގައިފި އެވެ.
އިންޑިއާގެ އައިޓީ މިނިސްޓްރީން ބުނީ އިންޑިއާއިން ފެނުނު ވޭރިއެންޓަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ދިން ނަމަކީ ބީ.617.1 ކަމަށާއި "އިންޑިއާ ވޭރިއެންޓް" ކިޔާ ނަމަ އެއީ ދޮގެއް ކަމަށެވެ.
ކޮވިޑް ފަތުރާ ވައިރަހުގެ އެހެން ވޭރިއެންޓުތަކަށް ވެސް ނިސްބަތް ކުރަމުން ދަނީ އެ ފެނުނު ގައުމަކާ ގުޅުވައިގެންނެވެ. އެގޮތުން އިނގިރޭސި ވިލާތުގެ ވޭރިއެންޓާއި ބްރެޒިލް އަދި ދެކުނު އެފްރިކާގެ ވޭރިއެންޓް ފާހަގަކުރެވެ އެވެ.
"އިންޑިއާ ވޭރިއެންޓް" ކިޔާތީ އެ ގައުމުގެ ސަރުކާރުން ހިތްހަމަނުޖެހިފައި ވާއިރު، ކޮވިޑު ބަލިމަޑުކަމުގެ ހާލަތު އިންޑިއާގައި ގޯސްވެފައި ވާތީ ސަރުކާރަށް ވަނީ ވަރަށް ބޮޑަށް ފާޑުކިޔުން އަމާޒުވެފަ އެވެ.
"އިންޑިއާ ވޭރިއެންޓް" ގެ ވާހަކަދައްކާ ޕޯސްޓުތައް ސޯޝަލް މީޑިއާއިން ނެގުމަށް އަންގާފައި ވާއިރު، މީގެ ކުރިން ވެސް އިންޑިއާ ސަރުކާރުން ވަނީ މިފަދަ ބައެއް ނިންމުންތައް ތަންފީޒުކޮށްފަ އެވެ.
އެގޮތުން ކޮވިޑުގެ ދެ ވަނަ ރާޅުގައި ގައުމުގެ ހާލަތު ކޮންޓްރޯލުން ނެއްޓުމުން އެކަމަށް ފާޑުކިޔާ ކުރި ޓްވީޓުތައް ނަގަން ޓްވީޓާއަށް އެންގި އެވެ.
އިންޑިއާއިން ފެނުނު ވޭރިއެންޓުގެ ސަބަބުން މިދިޔަ މާޗް މަހުން ފެށިގެން އެ ގައުމުގެ ކޭސްތައް ވަނީ އިންތިހާއަށް އިތުރުވެފަ އެވެ. އިންޑިއާގައި މިހާތަނަށް ޖުމްލަ 26 މިލިއަން ކޮވިޑް ކޭސް ފެނިފައި ވެ އެވެ. އޭގެ އިތުރުން މި ބަލީގައި ގާތްގަނޑަކަށް 300،000 މީހުން އިންޑިއާއިން މަރުވެއްޖެ އެވެ.
