މާލޭ މަގުމަތިން އަންހެނަކު ޖަހައިގަނެ، އޭނާ ގަދަކަމުން ގެއަކަށް ވައްދައި ރޭޕް ކުރަން އުޅުމުގެ ތުހުމަތުގައި ހައްޔަރު ކުރި ދެ މީހުން ބަންދުން ދޫކޮށްލައިފި އެވެ.
އެ މައްސަލައިގައި، މާރާމާރީ އާއި ކިޑްނެޕް އަދި ގަދަކަމުން ޖިންސީ ގުޅުން ހިންގުމުގެ ތުހުމަތުގައި ފުލުހުން ހައްޔަރުކުރީ ހދ. ނޭކުރަންދޫ، ވިނަރެސް، އާދަމް ވިޝާން، 18، އާއި ހދ. ވައިކަރަދޫ، މިލާފަރު، އަލީ ރަޝީދު، 23، އެވެ.
އެމީހުންގެ ބަންދު މީގެކުރިން ކުރިމިނަލް ކޯޓުން އިތުރުކޮށްދީފައިވީ ނަމަވެސް، ޕްރޮސިކިއުޓާ ޖެނަރަލްގެ އޮފީހުން ވަނީ ޝަރުތުތަކާއެކު ބަންދުން ދޫކޮށްލުމަށް ކޯޓުގައި އެދިފަ އެވެ. އެގޮތަށް މައިގަނޑު ގޮތެއްގައި އެދުނު ސަބަބަކީ، މައްސަލާގައި ކަން ހިނގާފައިވާ ގޮތާއި ތަހުގީގު ނިމިފައިވުމެވެ.
އެ ހުށަހެޅުމަށް ރިއާޔަތްކޮށް ކުރިމިނަލް ކޯޓުގެ ގާޒީ އާދަމް މުހައްމަދު މިދިޔަ ބުދަ ދުވަހު ނެރެއްވި އަމުރުގައި ބުނީ، އަލީ ރަޝީދު ދެން އިތުރަށް ބަންދުގައި ބަހައްޓަން ޖެހޭ ސަބަބެއް ނެތް ކަމަށެވެ. އެހެންވެ، އަލީ ރަޝީދުގެ މައްޗަށް ޕީޖީ އަދި ފުލުހުން އެދޭ ޝަރުތުތައްކޮށް ވަނީ ބަންދުން ދޫކޮށްފަ އެވެ.
އާދަމް ވިޝާމްގެ މައްޗަށް ހުރި ހެކިތަކަށް ބަލާއިރު، އޭނާ ބަންދުގައި ބަހައްޓަން ޖެހޭ ސަބަބެއް ނެތް ކަމަށް އަމުރުގައިވެ އެވެ. އެހެންވެ، އާދަމް ވިޝާމްގެ މައްޗަށް ވެސް ޕީޖީ އާއި ފުލުހުން އެދޭ ޝަރުތުތައް މަތިކޮށް ވަނީ ބަންދުން ދޫކޮށްލާފަ އެވެ.
އެނގިފައިވާ ގޮތުގައި، ބޮޑެތި ތުހުމަތުތަކެއް ދެ މީހުންގެ މައްޗަށް ހައްޔަރުކުރިއިރު ކުރެވުނަސް، ތަހުގީގުގައި އެމީހުންގެ މައްޗަށް އެ ތުހުމަތައް ސާބިތު ކުރެވޭ މިންވަރަށް ހެކި ލިބިފައިނުވެ އެވެ. ނަމަވެސް، ކުށެއް ކުރަން އުޅުނުކަން ސާބިތު ކުރެވިދާނެ މިންވަރަށް ހެކި ލިބިފައިވެ އެވެ.
އަންހެން މީހާ މަގުމަތިން ޖަހައިގެނެގެން ގަދަކަމުން ގޯޅިއެއް ތެރެއަށް ވައްދާ މަންޒަރު ފެންނަ ސީސީޓީވީ ފުޓޭޖް ވަނީ އާންމުވެފަ އެވެ. މިކަން ހިނގީ، މިސްކިތުން މީހުން ތަރާވީސް ނަމާދުން ފޭބި ގަޑިއަށް ވެފައި އަންހެން މީހާ ސަލާމަތްކޮށްފައިވަނީ މިސްކިތުން ފޭބި ބަޔަކު ގޮހެވެ.
