އިންޑިއާގެ ގައުމީ އެއާލައިން، އެއާ އިންޑިއާގެ ޑޭޓާ ސާވާތަކަށް ދިން ސައިބާ ހަމަލާއެއްގައި ދުނިޔޭގެ އެކި ކަނކޮޅުތަކުގައިވާ 4.5 މިލިއަން ކަސްޓަމަރުންގެ މައުލޫމާތު ލީކުވެއްޖެ އެވެ.
އެއާ އިންޑިއާއަށް ސައިބާ ހަމަލާއެއް އެންމެ ފުރަތަމަ އައިސްފައި ވަނީ މިދިޔަ ފެބްރުއަރީ މަހު އެވެ. ލީކުވި މައުލޫމާތުގެ ތެރޭގައި ޕާސްޕޯޓާއި، ޓިކެޓުގެ ތަފްސީލާއި ކްރެޑިޓް ކާޑުގެ ޑޭޓާ ހިމެނެ އެވެ.
ނަމަވެސް އެއާ އިންޑިއާއިން ބުނީ ކްރެޑިޓް ކާޑުގެ ސެކިއުރިޓީ ތަފްސީލްތައް ކަމަށްވާ، ސީވީވީ އާއި ސީވީސީ ނަންބަރުތައް ހަމަލާ އަމާޒުވި ސާވާތަކުގައި ރައްކާކޮށްފައި ނުވާނެ ކަމަށެވެ.
އެ ހަމަލާ ދިނީ ކޮން ބައެއް ކަމަށް އަދި ސާފެއް ނުވެ އެވެ.
އެއާ އިންޑިއާއިން ބުނީ ލީކުވި މައުލޫމާތަކީ އޯގަސްޓް، 26، 2011 އާއި ފެބްރުއަރީ، 20، 2021 އާ ދެމެދު ރަޖިސްޓްރީ ކުރި ހުރިހާ މައުލޫމާތެއް ކަމަށެވެ.
އެ ކުންފުނިން ވަނީ ކަސްޓަމަރުން ކުންފުނީގެ ވެބްސައިޓުގައި ބޭނުން ކުރާ އެކައުންޓުގެ ޕާސްވޯޑް ބަދަލުކުރަން އަންގާފަ އެވެ.
ފެބްރުއަރީ މަހުގެ ހަމަލާއަށް ފަހު ހެކަރުންގެ އިތުރު އެއްވެސް ހަރަކާތެއް ފާހަގަވެފައި ނުވާ ކަމަށް އެއާ އިންޑިއާއިން ބުނެ އެވެ.
ހަތަރު ލައްކައަށް ވުރެ ގިނަ ކަސްޓަމަރުންގެ ޒާތީ މައުލޫމާތާއި ކްރެޑިޓް ކާޑް މައުލޫމާތު 2018 ގައި ލީކުވުމުން ބްރިޓިޝް އެއާވޭޒްއަށް 26 މިލިއަން ޑޮލަރުގެ ޖޫރިމަނާއެއް މިދިޔަ އަހަރު އައިސްފައިވެ އެވެ.
އޭގެ އިތުރުން ސައިބާ ހަމަލާއެއްގައި ނުވަ މިލިއަން ކަސްޓަމަރުންގެ އީމެއިލް އެޑްރެހާއި ދަތުރު ކުރި ތަންތަނުގެ ތަފްސީލް ލީކުވެފައިވާ ކަމަށް އީޒީޖެޓު ކުންފުނިން ވެސް މިދިޔަ އަހަރު ހާމަކޮށްފައިވެ އެވެ.
