ކުރީގެ އަނބިކަނބަލުން އަސްރާ ނަސީމަށް އަނިޔާކުރި ކަމުގެ ތުހުމަތު ކުރެވިފައިވާ ކެނދިކުޅުދޫ ދާއިރާގެ މެންބަރު އަހުމަދު އީސަ ހައްޔަރުކުރުމަށް ޕްރޮސިކިއުޓާ ޖެނަރަލް އޮފީހުގެ ފަރާތުން އެދުނު އަމުރު ނުދޭން ކުރިމިނަލް ކޯޓުން ނިންމައިފި އެވެ.
ރައްޔިތުންގެ މަޖިލީހުގެ މެންބަރުން ހައްޔަރުކުރުމަށް އަމުރު ނެރެވޭނީ ޕްރޮސިކިއުޓާ ޖެނަރަލްގެ އޮފީހުން އެދުމުންނެވެ. އެކަން ކޮށް ދިނުމަށް ފުލުހުން އެދުމުން، އެ އޮފީހުން ވަނީ ކުރިމިނަލް ކޯޓަށް އެކަމަށް އެދި މިއަދު ހުށަހަޅާފަ އެވެ.
ނަމަވެސް، ކޯޓުން ނިންމާފައިވަނީ އެ އަމުރު ނެރެދޭނެ ތަނެއް ނެތް ކަމަށެވެ. އެކަން ޕަބްލިކް ޕްރޮސިކިއުޓާ އަހުމަދު ޝަފީއު މިރޭ "އަދަދު"އަށް ކަށަވަރުކޮށް ދެއްވި އެވެ. ކުރިމިނަލް ކޯޓުގެ ބަހެއް އަދި މިކަމުގައި ނުލިބެ އެވެ.
އީސައަށް ގެވެށި އަނިޔާގެ ތުހުމަތު ކުރެވިފައިވާއިރު އޭނާ ވަނީ އެ ތުހުމަތުތަކަށް އިންކާރު ކުރައްވާފަ އެވެ. އަދި އިޖުތިމާއީ ކޮމިޓީގެ މުގައްރިރު ކަމުން އޭނާ ވަކިކުރުމަށް މަސައްކަތް ކުރަމުންދަނިކޮށް ވަނީ އިސްތިއުފާ ދެއްވާފަ އެވެ.
އެމްޑީޕީން ވެސް މިހާރު ވަނީ އެ ޕާޓީގެ ގުނަވަންތަކުން އީސަ ސަސްޕެންޑްކޮށްފަ އެވެ. އޭނާ މަޖިލިސް މެންބަރު ކަމުން އިސްތިއުފާ ދިނުމަށް ބައެއް މަޖިލިސް މެންބަރުން ވެސް ގޮވާލައްވާފަ އެވެ.
އީސަގެ ކުރީގެ އަނބިކަނބަލުން އަސްރާއަށް އަނިޔާކުރި ކަމުގެ ތުހުމަތު ކުރެވޭއިރު ދެ އަހަރު ނުވާ ދަރިފުޅު، ބެލްކަނިން އެއްލާލާނެ ކަމަށް ބުނެ އިންޒާރު ދިން ކަމުގެ ތުހުމަތުތަކެއް ވެސް ވަނީ ކޮށްފަ އެވެ. އެކަން ފުލުހަށް ރިޕޯޓް ކޮށްފައިވަނީ އަވައްޓެރިންތަކެކެވެ.
އެ މައްސަލައިގެ ތަހުގީގަށް ފުލުހުންނަށް ބަޔާން ދެއްވުމަށް ފަހު އަސްރާ ފޭސްބުކްގައި ލިއުއްވި ގޮތުގައި އަނިޔާގެ އެ ތަޖުރިބާއަކީ ދުވަހަކު ވެސް ކުރިމަތިވެދާނެ ކަމަށް ހީކުރެއްވި ކަމެއް ނޫނެވެ. އަސްރާ ވިދާޅުވި ގޮތުގައި ވޭތުވެދިޔަ 24 ގަޑިއިރަކީ އޭނާ އާއި ދަރިފުޅަށް އުނދަގޫ އިހްސާސްތަކެއް ކުރަން ޖެހުނު ވަގުތެކެވެ. އެކަމަކު މިހާރު ދެމައިންގެ ވެސް ހާލު ރަނގަޅު ކަމަށް ވިދާޅުވި އެވެ.
އީސަ އޭނާއަށް ކުރެވޭ ތުހުމަތުތަކަށް އިންކާރު ކުރައްވައި ވިދާޅުވީ، ގާނޫނުތަކާއި ގަވާއިދުތަކާ ހިލާފު އެއްވެސް އަމަލެއް ކޮށްފައި ނުވާނެ ކަމުގެ ޔަގީންކަން އަރުވާ ކަމަށެވެ. އަދި ވިދާޅުވީ މަގާމުން އެކަހެރިވެވަޑައިގަތީ އޭނާއަށް ތުހުމަތުކުރާ ގެވެށި އަނިޔާގެ މައްސަލައެއް ބަލާތީ، މުއައްސަސަތަކަށް އެއްބާރުލުން ދެއްވުމުގެ ގޮތުން ކަަމަށެވެ.
