މި ހަފްތާގައި އިންޑިއާގެ ހުޅަނގަށް އެރި ބާރުގަދަ ތޫފާނުގައި މުމްބާއީ ކައިރިން 261 މީހުންނާއެކު ބަންޑުން ޖަހާލި ބާޖުން ގެއްލުނު މީހުންގެ ތެރެއިން 26 މީހެއްގެ ހަށިގަނޑު ފެނިއްޖެ އެވެ.
ގެއްލުނު މީހުން ހޯދުމުގެ މަސައްކަތް ކުރިއަށް ދާއިރު އިތުރު މީހުންގެ ހަށިތައް ފެންނާނެ ކަމަށް ބެލެވެ އެވެ. އޭގައި ތިބި މީހުންގެ ތެރެއިން 53 މީހަކު އަދިވެސް ނުފެނެ އެވެ.
މީހުން ސަލާމަތް ކުރުމުގައި އުޅޭ އަސްކަރީ މަނަވަރަކުން ވަނީ 186 މީހަކު ރައްކާތެރިކަމާއެކު މުމްބާއީއަށް އިއްޔެ ގެންގޮސްފަ އެވެ. ހާލުގައި ޖެހުނު އިތުރު ބާޖަކުން 35 މީހުން ސަލާމަތް ކުރި އެވެ.
ގާތްގަނޑަކަށް 700 މީހުންނާ އެކު އިތުރު ތިން ބާޖެއް ވެސް ވަނީ ހާލުގައި ޖެހިފަ އެވެ. އެ މީހުން ސަލާމަތް ކުރުމުގެ މަސައްކަތް ވެސް ދަނީ ކުރިއަށެވެ. އޭގެ ތެރެއިން ދެ ބާޖު އޮތީ މުމްބާއީ ކައިރީގަ އެވެ. އަދި އަނެއް ބާޖު އޮތީ ގުޖަރާތު ކައިރީގަ އެވެ.
މިދިޔަ ހޯމަ ދުވަހު އިންޑިއާއަށް އެރި ތޫފާން ޓައުކްޓޭއަކީ ފާއިތުވި 20 އަހަރުގެ ތެރޭގައި އެރި އެންމެ ބާރުގަދަ ތޫފާނެވެ. އެއްގަމަށް ތޫފާނު ލައްވާލިއިރު އޭގެ ބާރު އޮތީ ވަރަށް ދަށްވެފަ އެވެ. އެހެން ނަމަވެސް އެއްގަމުގައި ހިނގި އެކި ހާދިސާތަކުގައި 19 މީހުން މަރުވި އެވެ.
ބަންޑުން ޖަހާލި ބާޖުން ސަލާމަތް ކުރެވުނު މީހުން އަސްކަރީ މަނަވަރުން ފައިބަނީ.-- ފޮޓޯ: ޑިފެންސް ޕްރޯ
ބަންޑުން ޖަހާލި ބާޖުގައި ތިބީ އިންޑިއާ އޮއިލް އެންޑް ނެޗުރަލް ގޭސް ކޯޕޮރޭޝަނުގެ މުވައްޒަފުންނެވެ. ތޫފާނުގެ ސަބަބުން ނަގިލި އެހެލާ، ބާޖު އޮޔާ ދާން ފެށީ ކަމަށް ރިޕޯޓުތައް ބުނެ އެވެ.
އޭތި ބަންޑުން ޖަހާލުމުން ގެއްލުނު މީހުން ހޯދަން ކަނޑާއި ވައިގެ އޮޕަރޭޝަނެއް އެބަ ކުރިއަށް ދެ އެވެ. ނަމަވެސް ތޫފާނުގެ އަސަރާއެކު ރާޅުގެ އުސްމިނުގައި އަދިވެސް ހަތް މީޓަރު ހުރުމުން މަސައްކަތަށް ވަނީ ހުރަސް އެޅިފަ އެވެ.
