ވަރަށް މަދުން ފެންނަ ނުރައްކާތެރި އިންފެކްޝަނެއް ކަމަށްވާ މިޔުކޯމައިކޮސިސް ނުވަތަ "ބްލެކް ފަންގަސް" އަށް ފަރުވާ ކުރަން ބޭނުންވާ ބޭހެއް އިންޑިއާއިން ހުސްވެއްޖެ އެވެ.
އިންޑިއާގައި ލިބުން ދަތިވެފައިވާ އެމްފޮޓެރިސިން ބީ ބޭސް ކަޅު ބާޒާރުގައި ވެސް މިހާރު ދަނީ ވިއްކަމުންނެވެ. މިއީ އިންޑިއާގެ ގިނަ ކުންފުނިތަކަކުން އުފައްދާ ބޭހެކެވެ.
އިންޑިއާގައި ބްލެކް ފަންގަސް އިތުރުވެފައިވާ މި ދަނޑިވަޅުގައި އެ ބޭސް ހޯދަން އެދި ގިނަ ބަޔަކު ދަނީ ސޯޝަލް މީޑިއާގައި ޕޯސްޓުތައް ކުރަމުންނެވެ.
ޑޮކްޓަރުން ލަފާކުރަނީ ބްލެކް ފަންގަސް އިތުރުވީ ކޮވިޑުގައި ހާލު ދެރަވާ މީހުންނަށް ފަރުވާއެއްގެ ގޮތުގައި ބޭނުން ކުރާ ސްޓިރޮއިޑްސްގެ ސަބަބުން ކަމަށެވެ.
އާއްމުކޮށް ވަރަށް މަދުން ފެންނަ މި އިންފެކްޝަނަކީ ހަކުރު ބަލީގެ މީހުންނާއި ހަށިގަނޑުގެ ދިފާއީ ނިޒާމު ބަލިކަށި މީހުންގެ ފުރާނައަށް ނުރައްކާވެދާނެ އިންފެކްޝަނެކެވެ. އެގޮތުން ކެންސަރާއި އެއިޑްސް ބަލީގެ މީހުންނަށް ވެސް ނުރައްކާ ބޮޑެވެ.
ބްލެކް ފަންގަސް އިންފެކްޝަން ހަށިގަނޑުގައި އާއްމުކޮށް ފެތުރެނީ ވެއްޔާއި، ގަހާއި، ގަސް ކާނާގެ ގޮތުގައި ބޭނުން ކުރާ ޖަނަވާރުގެ ނަޖިސް އަދި ކުނިވަމުންދާ މޭވާ އާއި ތަރުކާރީގައި ހުންނަ މިއުކާ މޯލްޑް ހަށިގަނޑުގެ ތެރެއަށް ވަނުމުންނެވެ.
މިޔުކާ މޯލްޑުގެ މައިކްރޮސްކޯޕިކް ފޮޓޯއެއް.-- ފޮޓޯ: ގެޓީ އިމޭޖަޒް
މިދިޔަ ހަފްތާގައި މަހަރާޝްތްރަ ސްޓޭޓުގެ ހެލްތު މިނިސްޓަރު ރާޖޭޝް ޓޯޕޭ ވިދާޅުވީ އެ ސްޓޭޓުގައި ބްލެކް ފަންގަސް އިންފެކްޝަނުގެ 1500 ކޭސް ފެނިފައިވާ ކަމަށެވެ. އެ ސްޓޭޓަކީ އިންޑިއާއަށް ކުރިމަތިވެފައިވާ ކޮވިޑުގެ ދެ ވަނަ ރާޅުގައި އެންމެ ހާލަތު ގޯސް އެއް ސްޓޭޓެވެ.
އެ ސްޓޭޓުގައި ބަލިމަޑުކަން ފެށުނު ފަހުން ބްލެކް ފަންގަސް ޖެހި 52 މީހުން މަރުވެފައިވެ އެވެ. ގުޖަރާތުގައި މިދިޔަ މަހު އެކަނިވެސް މި އިންފެކްޝަން ޖެހިގެން 900 މީހުން ރިޕޯޓުކުރި އެވެ.
އާއްމު ގޮތެއްގައި އެ އިންފެކްޝަނަށް ފަރުވާ ކުރަން ބޭނުން ކުރާ ބޭސް ފަސޭހައިން ލިބުނު ނަމަވެސް މީގެ ތިން ހަފްތާ ކުރިން ޑިމާންޑް މައްޗަށް ދިޔުމުން އެ ބޭހުގެ ދަތިކަން ވަނީ ކުރިމަތިވެފަ އެވެ. އެހެންވެ ގިނަ ބަޔަކު އަންނަނީ އެހީއަށް އެދި ސޯޝަލް މީޑިއާގައި ޕޯސްޓު ކުރަމުންނެވެ.
އެމްފޮޓެރިސިން ބީ ނުވަތަ އެމްފޯ ބީ އަކީ ބްލެކް ފަންގަަސް ޖެހޭ މީހުންނަށް އަށް ހަފްތާ ވަންދެން ކޮންމެ ދުވަހަކު ހަށިގަނޑަށް ޖަހަން ޖެހޭ އިންޖެކްޝަނެކެވެ. މީގެ ދެ ވައްތަރު ހުރެ އެވެ. ސައިޑް އިފެކްޓް މަދު ވައްތަރު ހޯދަން ޑޮކްޓަރުން އާއްމުކޮށް ލަފާދިން ނަމަވެސް އޭގެ އަގު ބޮޑެވެ.
