މަޝްހޫރު ޖަގުއާ ލޭންޑް ރޯވާ ކާރު އުފައްދާ އިންޑއާގެ ޓާޓާ މޮޓޯޒް ކުންފުންޏަށް މި އަހަރުގެ ފުރަތަމަ ކުއާޓަރުގައި އެއް ބިލިއަން ޑޮލަރުގެ ގެއްލުމެއް ލިބިއްޖެ އެވެ.
މިއީ ކުރިން އަންދާޒާކޮށްފައި ނުވާ ވަރުގެ ބޮޑު ގެއްލުމެކެވެ. މި އަހަރުގެ ޖެނުއަރީ މަހުން މާޗް މަހުގެ ނިޔަލަށް ޓާޓާ މޮޓޯޒް އަށް ވަނީ 1.04 ބިލިއަން ޑޮލަރުގެ ގެއްލުމެއް ވެފަ އެވެ. ނަމަވެސް އެނަލިސްޓުން ކުރިން އަންދާޒާ ކުރީ 365.4 މިލިއަން ޑޮލަރުގެ ފައިދާ ވާނެ ކަމަށެވެ.
މި އަހަރު ބޮޑު ގެއްލުމެއް ލިބިފައި ވާއިރު، މިދިޔަ އަހަރު ކުންފުނީގެ ސޭލްސް ވަރަށް ރަނގަޅެވެ. އެގޮތުން ޗައިނާގައި ޖަގުއާ ލޭންޑް ރޯވާގެ ސޭލްސް 127 ޕަސެންޓް އިތުރުވެފައިވެ އެވެ. ކުންފުނީގެ އާމްދަނީ ބޮޑު ބައެއް ހިއްސާކުރަނީ ޖަގުއާ ލޭންޑް ރޯވާޒް ކާރު ވިއްކައިގެން ލިބޭ ފައިސާ އެވެ. އެ ކާރުގެ ސޭލްސް ރަނގަޅުވުމުން މިދިޔަ އަހަރު ޖުމްލަ އާމްދަނީ 12.4 ޕަސެންޓު އިތުރުވި އެވެ.
ނަމަވެސް ކޮވިޑާ ގުޅިގެން އެކި ބާވަތުގެ އިލެކްޓްރޯނިކް އުފެއްދުންތަކަށް އޮތް ޑިމާންޑް މަތިވެ، ކާރު އުފައްދާއިރު ބޭނުން ކުރާ ޗިޕް ލިބުމުގެ ދަތިކަން ވަނީ ކުރިމަތިވެފަ އެވެ. އެހެންވެ ޓާޓާ އާއި އެހެން ބޮޑެތި ކުންފުނިތަކަށް ވެސް މި އަހަރު ވަނީ އުފެއްދުންތެރިކަން މަޑުޖައްސާލަން މަޖުބޫރުވެފަ އެވެ.
