ޓެކްސީތަކަށް ދޫކޮށްފައިވާ ޕާކިން ޖާގަތަކަށް ކުލީގެ ގޮތުގައި ނަގަމުން އައި ފީ ކުޑަކުރަން މާލޭ ސިޓީ ކައުންސިލުން ނިންމައިފި އެވެ.
އަލަށް އިންތިހާބުވި ސިޓީ ކައުންސިލްގެ ދެވަނަ ބައްދަލުވުމުގައި އެ ކައުންސިލްގެ މެންބަރުންގެ އިއްތިފާގުން ނިންމާފައިވަނީ ޓެކްސީތަކަށް ދޫކުރާ ޕާކިން ޖާގަތަކުން ނަގަމުން ދިޔަ 3،000 ރުފިޔާގެ ކުލި 750 ރުފިޔާއަށް ކުޑަކުރުމަށެވެ.
މިއީ އާ ސިޓީ ކައުންސިލުން މިގޮތަށް ގެނައި ފުރަތަމަ ބަދަލެވެ.
މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ އެގޮތަށް ނިންމީ، މާލޭގެ މަގުތަކުގެ ހާލަތާއި ޕާކިން ޒޯންތަކުގެ ހާލަތަށް ބަލާއިރު 3،000 ރުފިޔާއަކީ އިންސާފުވެރި އަގެއް ކަމަށް ގަބޫލު ނުކުރެވޭތީ ކަމަށެވެ.
އެހެންވެ، 750 ރުފިޔާއަކީ އަދާކުރެވޭވަރުގެ އަގެއް ކަމަށް ގަބޫލު ކުރެވޭތީ، އެގޮތަށް ކައުންސިލުން އިއްތިފާގުވީކަން މުއިއްޒު ފާހަގަ ކުރެއްވި އެވެ.
"އޭގެ ސީދާ ފައިދާ ވާނީ ރައްޔިތުންނަށް، އެއީ ޓެކްސީތަކުން ލިބޭ ގެއްލުން ކުޑަ ކުރެވުނީމަ އޭގެ ފައިދާ ރައްޔިތުންނަށް ފައިދާވެގެން ދާނީ،" މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި ޕާކިންއަކީ މާލޭގައި އޮތް އެންމެ ބޮޑު މައްސަލަ ކަމަށާއި އެކަން ހައްލު ކުރުމަށް ޕާކިންނަށް ހާއްސަކޮށްފައިވާ އިމާރާތްތަކެއް ހަދާނެ ކަމަށެވެ. ނަމަވެސް، އެކަމަށް ދުވަސް ނަގާނެ ކަމަށެވެ.
މީގެއިތުރުން ވެސް މާލޭ ސިޓީ ކައުންސިލުން މިއަދު ވަނީ ގިނަ ނިންމުންތަކެއް ނިންމާފަ އެވެ. އޭގެ ތެރޭގައި، ދަފުތަރުގައި މީހުން ޖެއްސުން މަޑުޖައްސާލުމާއި ގަރާޖާއި ގުދަންތައް އިންޑަސްޓްރިއަލް ވިލެޖަށް ބަދަލުކުރުމާއި ވިލިމާލޭގައި 10 ބުރީގެ އިމާރާތް އެޅުމުގެ ހުއްދަ ދިނުމުގެ މަސައްކަތާއި ގުޅީފަޅުގެ ބަނދަރުގެ މަޝްރޫއު ހުއްޓާލައި، އެތަން ގެދޮރަށް ހާއްސަ ކުރުމަށް ސަރުކާރަށް ދެންނެވުމުގެ މަސައްކަތް ފެށުން ހިމެނެ އެވެ.
