ފާއިތުވި ވިހި އަހަރުގެ ތެރޭގައި އިންޑިއާއަށް އެރި އެންމެ ބާރުގަދަ ތޫފާނުގެ ސަބަބުން ކަނޑު ގަދަވެ، ހާލުގައި ޖެހުނު ބާޖެއް ބަންޑުން ޖަހާލާ 90 އަށް ވުރެ ގިނަ މީހުން ގެއްލިއްޖެ އެވެ.
އެ ބާޖު ބަންޑުން ޖަހާލީ މުމްބާއީ ކައިރިންނެވެ. ބާޖުގައި ތިބި 270 މީހުންގެ ތެރެއިން 177 މީހުން ސަލާމަތް ކުރެވުނު ކަމަށް އިންޑިއާ ނޭވީން ބުނެ އެވެ. ގެއްލުނު މީހުން ހޯދުމުގެ މަސައްކަތް ދަނީ ކުރިއަށެވެ.
އިންދިއާ އޮއިލް އެންޑް ނެޗުރަލް ގޭސް ކޯޕޮރޭޝަނުގެ އެ ބާޖުގައި ތިބީ ކުންފުނީގެ މުވައްޒަފުންނެވެ. ތޫފާނުގެ ސަބަބުން ނަގިލި އެހެލާ، ބާޖު އޮޔާ ދާން ފެށީ ކަމަށް ރިޕޯޓުތައް ބުނެ އެވެ.
އޭތި ބަންޑުން ޖަހާލުމުން ގެއްލުނު މީހުން ހޯދަން ކަނޑާއި ވައިގެ އޮޕަރޭޝަނެއް އެބަ ކުރިއަށް ދެ އެވެ. ނަމަވެސް ތޫފާނުގެ އަސަރާއެކު ރާޅުގެ އުސްމިނުގައި އަދިވެސް ހަތް މީޓަރު ހުރުމުން މަސައްކަތަށް ވަނީ ހުރަސް އެޅިފަ އެވެ.
ގާތްގަނޑަކަށް 700 މީހުންނާ އެކު އިތުރު ތިން ބާޖެއް ވެސް ވަނީ ހާލުގައި ޖެހިފަ އެވެ. އެ މީހުން ސަލާމަތް ކުރުމުގެ މަސައްކަތް ވެސް ދަނީ ކުރިއަށެވެ. އޭގެ ތެރެއިން ދެ ބާޖު އޮތީ މުމްބާއީ ކައިރީގަ އެވެ. އަދި އަނެއް ބާޖު އޮތީ ގުޖަރާތު ކައިރީގަ އެވެ.
އިއްޔެ އިންޑިއާގެ ހުޅަނގު އައްސޭރިފަށަށް އެރި ތޫފާން ޓައުކްޓޭގެ އަސަރު މާ ބޮޑަށް ކުރުމުގެ ކުރިން އޭގެ ބާރު ވަނީ ދަށް ވާން ފަށާފަ އެވެ. އެހެން ނަމަވެސް މިހާތަނަށް ތޫފާނުގެ ސަބަބުން ހިނގި އެކި ހާދިސާތަކުގައި 19 މީހުން މަރުވެފައި ވެ އެވެ.
