މެންޗެސްޓާ (މެއި 18) - މި މަހު 29 ވަނަ ދުވަހު ޕޯޗުގަލްގައި ކުޅޭ ޗެމްޕިއަންސް ލީގުގެ ފައިނަލް މެޗު ބަލަން އެ ގައުމަށް ދިއުމަށް ހަމަޖެހިފައިވާ މެންޗެސްޓާ ސިޓީގެ 6000 ސަޕޯޓަރުންގެ ދަތުރު ހަރަދުދޭން އެ ކްލަބްގެ ވެރިޔާ ޔޫއޭއީގެ މަހުޖަނު ޝެއިހް މަންސޫރު ނިންމަވައިފި އެވެ.
ކުރިން ތުރުކީގެ އިސްތަންބޫލުގައި ކުޅެން އޮތް ފައިނަލް ޕޯޗުގަލް އަށް ބަދަލުކުރަން ޖެހުނީ ތުރުކީގައި ކޮވިޑް-19ގެ ހާލަތު ވަރަށް ބޮޑަށް ގޯސްވުމުންނެވެ. އެ މެޗު އިންގްލެންޑްގައި ކުޅެން މަސައްކަތްކުރި ނަމަވެސް ޔުއެފާ އިން ބޭނުންވާ ވީއައިޕީންނަށް ކަރަންޓީނު ނުވެ، އިންގްލެންޑަށް އެތެރެވެވޭ ގޮތް ހަމަޖައްސައިދޭން އިނގިރޭސި ސަރުކާރުން ދެކޮޅު ހެދުމުން ފައިނަލް އެ ގައުމުގައި ކުޅެވޭގޮތްނުވީ އެވެ.
ފައިނަލުގައި ސިޓީ ނުކުންނާނީ 2012 ވަނަ އަހަރު މި މުބާރާތުގެ ޗެމްޕިއަންކަން ހޯދި ޗެލްސީއާ ދެކޮޅަށެވެ. މިއީ ސިޓީގެ ތާރީހުގައި އެ ކްލަބުން ޗެމްޕިއަންސް ލީގުގެ ފައިނަލުގައި ކުޅޭނެ ފުރަތަމަ ފަހަރެވެ.
ސިޓީން ހަމަޖައްސައިދޭން ނިންމީ ސަޕޯޓަރުންގެ ދަތުރުފަތުރު ހަރަދުތަކެވެ. ބާކީ ހަރަދުތައް ކަމަށްވާ ކޮވިޑް-19 އަށް ޓެސްޓްކުރުމާއި ހޮޓަލެއްގައި މަޑުކުރާނަމަ އެ ފައިސާގެ އިތުރުން މެޗު ޓިކެޓް ވެސް ޖެހޭނީ އަމިއްލަ އަށް ގަންނާށެވެ. ދަތުރު ހަރަދު ދޭން ސިޓީން ނިންމީ މި ދުވަސްވަރު ޗެމްޕިއަންސް ލީގުގެ ފައިނަލާ ދިމާކޮށް އެއާލައިންތަކުން ޓިކެޓް އަގުބޮޑުކުރަމުންދާތީ އެވެ.
ސިޓީގެ މެޗެއްގެ ތެރެއިން ގާޑިއޯލާ އުފާފާޅުކުރަނީ.-- ފައިލް ފޮޓޯ ގެޓީ އިމޭޖަސް
ސިޓީން ނެރުނު ބަޔާނެއްގައި ބުނެފައިވަނީ ކޮވިޑްގެ ސަބަބުން ގިނަ ބަޔަކަށް މާލީ ގޮތުން ބޮޑު ބުރަތަކެއް އުފުލަން ޖެހޭ މި ދަނޑިވަޅުގައި ކްލަބުން އެހީތެރިވެދޭން ބޭނުންވާތީ ސަޕޯޓަރުންނަށް ފައިނަލް ބަލަން ދިއުމުގެ ދަތުރު ހަރަދުދޭން ނިންމީ ކަމަށެވެ.
ސިޓީގެ ވެރިޔާ ޝެއިހް މަންސޫރު ވިދާޅުވީ ވަރަށް ދަތި އުނދަގޫ އަހަރެއްގައި ސިޓީގެ ކޯޗު ޕެޕް ގާޑިއޯލާ އާއި ޓީމު ކުޅުންތެރިން މި ވަނީ ވަރަށް ރަނގަޅު މަސައްކަތްތަކެއް ކޮށް ތާރީހީ ފައިނަލަކުން ފުރުސަތު ހޯދާފައި ކަމަށާއި އެ ފައިނަލުގައި ސަޕޯޓަރުންގެ ހިއްސާ ވަރަށް މުހިއްމު ކަމަށެެވެ.
"މި ހާއްސަ މެޗުގައި ސަޕޯޓަރުން ޓީމު ފަހަތުގައި ތިބުން އެއީ ވަރަށް މުހިއްމު ކަމެއް. އަހަރެމެންގެ ދަތުރުގައި ހުރިހާ ވަގުތެއްގައި ވެސް ސަޕޯޓަރުން ތިބީ އެކުގައި. އެހެންވީމަ މި ތާރީހީ ފައިނަލަށް ސަޕޯޓަރުން ވަރަށް މުހިއްމު،" މަންސޫރު ވިދާޅުވި އެވެ.
ސިޓީގެ ޗެއާމަން ހަލްދޫން އަލް މުބާރަކް ވިދާޅުވީ އެ ކްލަބުން މި އިއުލާންކުރި ސްކީމުގައި ބައިވެރިވެ ދަތުރުފަތުރުކުރުމުގެ ހާސްކަމުން އަަރައިގަނެ ސަޕޯޓަރުންނަށް ވެސް ހަމަޖެހިލައިގެން މެޗަށް ފޯކަސް ކުރެވޭނެ ކަމަށެވެ.
މި ސީޒަނުގައި ސިޓީން ވަނީ އިނގިރޭސި ޕްރިމިއާ ލީގާއި ލީގު ކަޕްގެ ޗެމްޕިއަންކަން ހޯދައިފަ އެވެ. އެފްއޭ ކަޕްގެ ސެމީ ފައިނަލުން އެ ޓީމު ކެޓީ ޗެލްސީ އަތުންނެވެ.
