ކޮވިޑު ޖެހޭ މާބަނޑު މީހުންގެ އަދަދު ރާއްޖޭގައި އިތުރުވަމުންދާތީ ދުވަސް ނުފުރާ ވިހާ ރޭޓު މަތިވެދާނެ ކަމަށް ލަފާކުރެއްވޭ ކަަމަށް އައިޖީއެމްއެޗުގެ ކުޑަކުދިންގެ ޑޮކްޓަރު އަދި އިމިއުނައިޒޭޝަން ޓެކްނިކަލް އެޑްވައިޒަރީ ގްރޫޕުގެ ޗެއާޕާސަން، މުހައްމަދު ފައިސަލް ރޭ ވިދާޅުވެއްޖެ އެވެ.
ކޮވިޑަށް ޕޮޒިޓިވް 50 އަށް ވުރެން ގިނަ މީހުންނަށް އަންނަނީ ފަރުވާ ދެމުންނެވެ. މީގެ ތެރޭގައި ހާލު ބޮޑު މީހުން ވެސް ހިމެނެ އެވެ.
ފައިސަލް ވިދާޅުވީ މާބަނޑު މީހުން ގިނަ އަދަދަކަށް ޕޮޒިޓިވްވުމުގެ އިތުރުން ބަލީގައި ބޮޑުވަރުވާ މިންވަރު ނުވަތަ އައިސީޔޫއަށް ނުވަތަ ވެންޓިލޭޓަރަށްލާން ޖެހުން ވެސް ދަނީ އިތުރުވަމުން ކަމަށެވެ. ބަނޑަށް ދަރިފުޅު ނިޔާވުމާއި އެބޯޝަނަކަށް ދާން ޖެހުމުގެ އިތުރުން ދުވަސްނުފުރައި އުފަންވުން ވެސް ހިމެނޭ ކަމަށް ވިދާޅުވި އެވެ.
"މިހާރު ވެސް އަޅުގަނޑުމެންގެ ތެރޭގައި އެބައުޅޭ ދެ ކުއްޖަކު ވަރު، އެންއައިސީޔޫގައި ވެސް ދުވަސް ނުފުރައި ވިހައިގެން. މި ދެންނެވީ ކޮވިޑަށް ޕޮޒިޓިވްވެ ދުވަސް ނުފުރާ ވިހަން ޖެހުނު ވާހަކަ،" ފައިސަލް ވިދާޅުވި އެވެ.
"ރާއްޖޭގައި އާއްމު ގޮތެއްގައި ދުވަސްނުފުރާ އުފަންވާ ރޭޓު އުޅެނީ ގާތްގަނޑަކަށް 13 ޕަސެންޓުގައި. ކޮވިޑުގެ ސަބަބުން މި ރޭޓު، 1-4 ޕަސެންޓް އިތުރުވާނެ ކަމަށް ބެލެވޭ ކޮވިޑާ ގުޅިގެން."
ފައިސަލް ވިދާޅުވި ގޮތުގައި ކޮވިޑް ޖެހޭ މާބަނޑު މީހުންނަށް، އެ ބައްޔަށް ޕޮޒިޓިވް ނުވާ މީހުންނާ އަޅާބަލާއިރު ރިސްކް ވަރަށް ބޮޑުވާނެ އެވެ. އަދި އެ މީހަކީ 35 އަހަރަށް ވުރެން މަތި އަދި ނޭވާ ހިއްލުން ފަދަ ނުވަތަ މާބަނޑުވުމުގެ ކުރިން ލޭމައްޗަށް ދިއުން، ހަކުރު ބަލި، ހިތުގެ ބަލި ހުންނަ ނަމަ އެއީ ހައި ރިސްކް ކެޓަގަރީ ކަމަށް ވިދާޅުވި އެވެ.
އެހެންވެ ރާއްޖޭގައި ވެސް މިހާރު ވަނީ މާބަނޑު މީހުންނަށް ފައިޒާ ވެކްސިން ޖަހަން ހުޅުވާލައިފަ އެވެ. ތަފާސްހިސާބަށް ބަލާއިރު ފައިޒާ ވެކްސިން މާބަނޑު 100،000 އަށް ވުރެން ގިނަ މީހުންނަށް އެމެރިކާގައި ދީފައިވެ އެވެ.
"ޑޭޓާތަކަށް ބަލާއިރު މާބަނޑު މިހާ އަށް އަދި ބަނޑުގައި އޮންނަ ދަރިފުޅަށް ވެސް ނުރައްކާތެރި ކަމުގެ އަލާމާތެއް ނުފެނޭ،" ފައިސަލް ވިދާޅުވި އެވެ.
ވެކްސިން ނުޖަހައިފި ނަމަ ކޮރޯނާގެ ސަބަބުން މާބަނޑު މީހުންނާއި ބަނޑުގައި އޮންނަ ދަރިފުޅަށް ގެއްލުންތަކެއް ލިބެމުންދާ ކަން ފައިސަލް ފާހަގަކުރައްވައި ވިދާޅުވީ ފައިދާ ބޮޑު ގޮތަކީ ވެކްސިން ޖެހުމެވެ. ފައިޒާ ވެކްސިންގެ 3،000 ޑޯޒު ރާއްޖޭގައި ހުރިއިރު 2،500 މީހުންނަށް ޖެހޭނެކަން ފައިސަލް ފާހަގަކުރެއްވި އެވެ. މި ވެކްސިން ކެޓަގަރައިޒްކުރަނީ ރިސްކު ބޮޑު މާބަނޑު މީހުންނަށް ވެސް ލިބޭނެ ގޮތަށް ބަލައިގެންނެވެ.
ޑޮކްޓަރުން އިރުޝާދު ދެއްވަނީ ގިނަ މީހުންނާ ކޮންޓެކްޓްވުން މަދުކުރަން މާބަނޑު މީހުން ހާއްސަ ސަމާލުކަމެއް ދިނުމަށެވެ. އަދި މާބަނޑު މީހުން ވަށައިގެން ތިބޭ މީހުންގެ އަމަލުތައް އެ މީހުން ނުރައްކަލަކަށް ހުށަނޭޅޭ ގޮތަށް ނުބެހެއްޓުމަށެވެ. ބޭރު ތެރެއިން ކޮވިޑު ހިފައިގެން އައިސް ގޭތެރެއަށް ނުވެއްދުމަށެވެ. ޑޮކްޓަރަށް ދައްކަން ހޮސްޕިޓްލަތަކަށް ކޮންމެހެން ދާން ޖެހިއްޖެ ހާލެއްގައި ނޫނީ ނުގޮސް އޮންލައިންކޮށް ޑޮކްޓަރުގެ އެހީ ހޯދަން ވެސް އިރުޝާދު ދެ އެވެ.
