މެންޗެސްޓާ (މެއި 18) - މެންޗެސްޓާ ޔުނައިޓެޑްގެ ސަޕޯޓަރުންގެ ހަޅުތާލުތައް މެދުނުކެނޑި ކުރިއަށްދާ މައްސަލައިގައި ޔުނައިޓެޑްގެ ޓީމަށް ވެސް އަސަރުކުރާ ކަމަށް އެ ޓީމުގެ ކޯޗު އޮލެ ގުނަ ސޯލްޝެއާ ބުނެފި އެވެ.
ޔުނައިޓެޑް ސަޕޯޓަރުންގެ މި އެއްވުން ތަކަކީ ޔުނައިޓެޑްގެ ވެރިން ކަމަށްވާ އެމެރިކާގެ ގްލޭޒާ އާއިލާ އިން ޔޫރަޕިއަން ސުޕަ ލީގުގައި އެ ކްލަބް ބައިވެރިކުރަން ނިންމުމަށް ފަހު ފަހުން އެ ނިންމުން ބަދަލުކުރި ނަމަވެސް ކްލަބް ވިއްކާލަން ދެކޮޅު ހަދަމުންދާތީ އެވެ. ޔުނައިޓެޑް ސަޕޯޓަރުންގެ އަނެއް ޝަކުވާ އަކީ އެ ކްލަބްގެ ވެރިން އެ ކްލަބަށް ލިބޭ ފައިސާ ކްލަބަށް އެކަށީގެންވާ ވަރަށް އިންވެސްޓްނުކޮށް އަމިއްލަ ވިޔަފާރިތައް ފުޅާކުރަން މަސައްކަތްކުރާތީ އެވެ.
ފާއިތުވި ހަފްތާގެ 50 ގަޑިއިރުތެރޭގައި ޔުނައިޓެޑް ދަނޑުގައި ލެސްޓާ ސިޓީ އާއި ލިވަޕޫލް ވަނީ ޔުނައިޓެޑް ބަލިކޮށްފަ އެވެ. މީގެ ތެރެއިން ލިވަޕޫލް މެޗަކީ މީގެ ކުރިން ރޭވި ތާރީހުގައި ނުކުޅެވިގެން ފަސްކުރަން ޖެހުނު މެޗެކެވެ. އެ މެޗު ފަސްކުރަން ޖެހުނީ ޔުނައިޓެޑްގެ ސަޕޯޓަރުންގެ ހަޅުތާލުތައް ކޮންޓްރޯލުން ނައްޓައި މެޗު ކުޅެވޭނެ މާހައުލެއް އެ ދުވަހު ނެތުމުންނެވެ.
ސޯލްޝެއާ ބުނީ ސަޕޯޓަރުންގެ އެ އަަމަލުތަކުގެ ސަބަބުން ކަންބޮޑުވުންތަކެއް އެބަހުރި ކަމަށެވެ.
"އަހަރެން މިދިޔަ ދެ މެޗުން ބަލިވީމަ މި ކަންތައްތައް ޝަކުވާއެއްގެ ގޮތުގައި ބޭނުންކުރަން ނެތިން. އެކަަމަކު ސަޕޯޓަރުންގެ ހަޅުތާލުތަކާ ހުރެ ޓީމަށް އަސަރުކުރޭ،" ސޯލްޝެއާ ބުންޏެވެ.
މިދިޔަ 10 ވަރަަކަށް ދުވަހަށް ބަލާއިރު ޔުނައިޓެޑުން ގާތްގާތުގައި އުނދަގޫ ހަތަރު މެޗެއް ކުޅުނުއިރު، ފިޒިކަލީ އުނދަގޫތަކެއް ދިމާވި އެެވެ. އަދި ކުޅުންތެރިންނަށް ނަފްސާނީ ގޮތުން ވެސް ކުރިމަތިވި ދަތި އެއް ކަަމަކީ ސަޕޯޓަރުންގެ އެ އެއްވުންތައް ކަމަށް ސޯލްޝެއާ ފާހަގަކުރި އެވެ.
ލީގުގައި މިރޭ ޔުނައިޓެޑް އަމިއްލަ ދަނޑުގައި ކުޅޭނީ ފުލަމްއާ ދެކޮޅަށެވެ. މި މެޗަށް ވަކި އަދަދަކަށް ސަޕޯޓަރުންނަށް ވަދެވޭނެ އެވެ. ސޯލްޝެއާ ބުނީ އުއްމީދަކީ ސަޕޯޓަރުން އެނބުރި ދަނޑަށް އައިސް ކުޅުންތެރިންނަށް ރަނގަޅަށް ހިތްވަރު ދިނުން ކަމަށާއި އޭގެ ސަބަބުން ވަރުގަދަކޮށް ސީޒަން ނިންމާލަން ހިތްވަރު ލިބޭނެ ކަމަށެވެ.
"އަހަރެމެން މި ފަހަރު ފައިނަލެއް ކުޅެފައި މި ނިންމާލަނީ. ތަށްޓެއް ލިބިއްޖެނަމަ މިއީ ކްލަބް ރަނގަޅު މިސްރާބަށް ގެންދަން ހިތްވަރެއް. އެހެންވީމަ ސަޕޯޓަރުންގެ އެހީ ބޭނުން،" ސޯލްޝެއާ ބުންޏެވެ.
މީގެ ކުރިން ސޯލްޝެއާ ވަނީ ހަޅުތާލެއްގެ ތެރެެއިން ޔުނައިޓެޑްގެ ޓްރެއިނިން ސެންޓަރަށް ވަން އެ ކްލަބްގެ ސަޕޯޓަރުންގެ ބަޔަކާ ވާހަކަ ދައްކައި އެ ދުވަހު އެ ސަޕޯޓަރުން ބޭއްވި އެއްވުން ހުއްޓާލުވަން މަސައްކަތްކޮށްފަ އެވެ.
ރެލިގޭޓްވެފައިވާ ފުލަމް އަތުން މިރޭ މޮޅުވެގެން ޔުނައިޓެޑަށް ލީގުގެ ދެ ވަނަ ކަށަވަރުކުރެވޭނެ އެވެ. ޔުނައިޓެޑް މި ވަގުތު ދެ ވަނައިގައި އޮތީ 36 މެޗުން 70 ޕޮއިންޓާ އެކު އެވެ. ތިން ވަނައިގައި އޮތް ލެސްޓާ ސިޓީ އަށް ދެ ވަނަ އަށް އެރެން އޮތީ އެ ޓީމު ބާކީ ދެ މެޗުން މޮޅުވެ، ޔުނައިޓެޑް ދެން އޮތް ދެ މެޗުން ބަލިވެއްޖެނަމަ އެވެ. ޔުނައިޓެޑާއި ފުލަމް ކުޅޭ މެޗު ފަށާނީ މިރޭ ރާއްޖެ ގަޑިން 22:00 ގަ އެވެ.
