ގަޑިއަކު 160 ކިލޯމީޓަރުގެ ވަޔާއެކު އިންޑިއާގެ ގުޖަރާތު ސްޓޭޓަށް އެރި ތޫފާން ޓައުކްޓޭގެ ބާރު ދަށް ވާން ފަށައިފި އެވެ.
އިންޑިއާގެ ހުޅަނގު އައްސޭރިފަށުން އެ ތޫފާން ދަތުރު ކުރަމުން ދިޔައިރު، މުމްބާއީއަށް އަރާފައެއް ނުވެ އެވެ. މިހާތަނަށް މޫސުން ގޯސްވެ، 12 މީހުން މަރުވެ، 150،000 މީހުން ވަނީ ރައްކާތެރި ހިސާބުތަކަށް ބަދަލުކޮށްފަ އެވެ.
ކަނޑުމަތީގައި ދެ ބާޖެއްގައި ހާލުގައި ޖެހިފައިވާ އެތައް ސަތޭކަ ބަޔަކު ސަލާމަތް ކުރަން އަސްކަރީ ތިން މަނަވަރު މިހާރު ދަނީ ހަރަކާތްތެރި ވަމުންނެވެ.
ތޫފާން އިންޑިއާ އަށް އެރީ ކޮވިޑްގެ ދެ ވަނަ ރާޅުގައި އިންޑިއާގެ ހޮސްޕިޓަލްތަކަށް ވަރަށް ބާރުބޮޑުވެފައިވާ ދަނޑިވަޅެއްގަ އެވެ.
މިއީ އެންމެ ބާރުގަދަ "ސައިކްލޯނިކް ސްޓޯމެއް" ގޮތުގައި ކުރިން ކަނޑައެޅި ނަމަވެސް މިޓިއޮރޮލޮޖިކަލް ޑިޕާޓްމަންޓުން ބުނީ ތޫފާނުގެ ބާރު މިހާރު ދަށްވެފައިވާ ކަމަށެވެ.
ގުޖަރާތަށް ތޫފާނު އެރުމަށް ފަހު ބާރު ދަށްވަމުންދާ ކަމަށް މިޓިއޮރޮލޮޖިކަލް ޑިޕާޓްމަންޓުން ކުރި ޓްވީޓެއްގައި ވެ އެވެ.
ބޯކޮށް ވާރޭވެހުމުގެ ސަބަބުން މުމްބާއީގައި ފެންބޮޑުވެފައި.-- ފޮޓޯ: ގެޓީ އިމޭޖަޒް
މުމްބާއީގައި ވައިގަދަވެ ވެއްޓުނު ގަހަކުން ކާރުތަކަށް ގެއްލުންވެފައި.-- ފޮޓޯ: އީޕީއޭ
ތޫފާން ޓައުކްޓޭއަކީ 1998 ވަނަ އަހަރަށް ފަހު އިންޑިއާއަށް އެރި އެންމެ ބާރުގަދަ ތޫފާނެވެ. ގުޖަރާތާއި ކައިރީގައިވާ މުމްބާއީ ހިމެނޭ މަހަރާޝްތުރަ ސްޓޭޓް އޮތީ ތޫފާނަށް ތައްޔާރުވުމުގެ ގޮތުން އެލާޓަށް ގެނެސްފަ އެވެ.
އެ ދެ ސްޓޭޓުގައި ވެސް ކޮވިޑު ކޭސްތައް ދަށްވާން ފަށާފައިވީ ނަމަވެސް، އަދިވެސް ހޮސްޕިޓަލްތައް ވަނީ ފުރިފަ އެވެ. އެހެންކަމުން ތޫފާނުގެ ސަބަބުން ސިއްހީ ނިޒާމައަށް އިތުރަށް ލޮޅުންތައް އަރާނެކަމުގެ ބިރު އޮތެވެ. އެ ގޮތުން ސިއްހީ ދާއިރާގައި މަސައްކަތްކުރަމުން އަންނަ ފަރާތްތައް މަސައްކަތްކުރާ މާހައުލު އިތުރަށް ރައްކާތެރިކުރަން ގިނަ ފަރާތްތަކުން އަންނަނީ ގޮވާލަމުންނެވެ.
