ކޮވިޝީލްޑްގެ ދެ ވަނަ ޑޯޒް ނުޖެހި ތިބި މީހުންނަށް އެސްޓްރަޒެނެކާ ވެކްސިން ބޭނުންކޮށްގެން ދެވަނަ ޑޯޒް ފުރިހަމަކުރެވޭނެ ކަމަށް އިމިއުނައިޒޭޝަން ޓެކްނިކަލް އެޑްވައިޒަރީ ގްރޫޕުގެ ޗެއާޕާސަން، ޑރ. މުހައްމަދު ފައިސަލް ރޭ ވިދާޅުވެއްޖެ އެވެ.
ކޮވިޝީލްޑް ވެކްސިން ސްޓޮކް ހުސްވާތީ އެ ވެކްސިން ޖެހުން މެދުކަނޑާލުމާ ގުޅިގެން ރާއްޖޭގައި ދެވަނަ ޑޯޒް ނުޖެހި 92،000 މީހުން އެބަތިއްބެވެ. އަދި މި ވަގުތު ސެންޓްރަލް ސްޓޮކްގައި ހުރި ހާހެއްހާ ޑޯޒް ބޭނުން ކުރަނީ މެޑިކަލް އިމާޖެންސީތަކުގައި އެކަންޏެވެ.
ކޮވިޝީލްޑް ވެކްސިނަކީ، ބޭސް އުފައްދާ ކުންފުނި އެސްޓްރަޒެނެކާ އާއި އޮކްސްފޯޑުން ގުޅިގެން އުފެއްދި ވެކްސިނުގެ ބްލޫޕްރިންޓާ އެއްގޮތަށް އިންޑިއާގެ ސިރަމް އިންސްޓިޓިއުޓުން އުފެއްދި ވެކްސިނެކެވެ. އެހެންކަމުން އެސްޓްރަޒެނެކާ އާއި ކޮވިޝީލްޑަކީ ހަމަ އެއް ވެކްސިނެކެވެ.
ހެލްތް އިމާޖެންސީ އޮޕަރޭޝަން ސެންޓަރު (އެޗްއީއޯސީ)ގައި ބޭއްވި ނޫސްވެރިންގެ ބައްދަލުވުމެއްގައި ޑރ. ފައިސަލް ވިދާޅުވީ އެސްޓްރާޒެނެކާ ވެކްސިނާއި ކޮވިޝީލްޑް ވެކްސިން އެކަތި އަނެކެއްޗާ ބަދަލުކުރެވޭނެ ކަމަށް ޑަބްލިޔުއެޗްއޯއިން ލަފާދީފައިވާ ކަމަށެވެ.
އަދި، ކޮވިޝީލްޑް ވެކްސިންގެ ކުރިން އެސްޓްރާޒެނެކާ ވެކްސިން ލިބިއްޖެ ނަމަ ރާއްޖޭގައި ޑޯޒް ފުރިހަމަ ނުވެ ތިބި މީހުންނަށް އެ ވެކްސިން ޖަހައިގެން ޑޯޒް ފުރިހަމަ ކުރެވޭނެ ކަމަށް ވިދާޅުވި އެވެ.
"މިހާރު ޑަބްލިޔުއެޗްއޯއިން ލަފާދީފައި ވަނީ އެސްޓްރަޒެނެކާއާ ކޮވިޝީލްޑާ އެ ދޭތި އިންޓަޗޭންޖް ކުރެވޭނެ ކަމަށް. އެސްޓްރަޒެނެކާ އެއް ޑޯޒް ޖަހާފައި ހުރެއްޖެއްޔާ ކޮވިޝީލްޑް ދެވަނަ ޑޯޒަކަށް ޖެހޭނެ. އަދި ކޮވިޝީލްޑް ފުރަތަމަ ޑޯޒް ޖަހާފައި ދެވަނަ ޑޯޒްގެ ގޮތުގައި އެސްޓްރާޒެނެކާ ބޭނުން ކުރެވޭނެ" ޑރ. ފައިސަލް ވިދާޅުވި އެވެ.
ކޮވިޝީލްޑް ވެކްސިންގެ ގޮތުގައި ބްރޭންޑްކޮށްގެން ސިރަމް އިންސްޓިޓިއުޓުން އުފައްދަނީ އެސްޓްރޭޒެނެކާ ވެކްސިނެވެ. އެހެންކަމުން މިއީ އެއް ވެކްސިނެއް ކަމަށް ޑރ. ފައިސަލް ވިދާޅުވި އެވެ.
މީޑިއާ ރިޕޯޓްތައް ބުނާ ގޮތުން ސިރަމް އިންސްޓިޓިއުޓަށް އިންޑިއާގެ އެތެރޭގެ މާކެޓަށް ބޭނުންވާ ވަރަށް ވެކްސިން ފޯރުކޮށްދެވޭނީ ޖުލައި މަހުގެ ތެރޭގަ އެވެ. އެހެންކަމުން ރާއްޖެއަށް އަވަސް މުސްތަގުބަލެއްގެ ތެރޭގައި މި ވެކްސިން ލިބުން ނާދިރެވެ.
މި ވެކްސިންގެ 300،000 ޑޯޒް ގަންނަން ދިވެހި ސަރުކާރުން ސިރަމް އިންސްޓިއުޓާ އެކު ވެފައިވާ އެއްބަސްވުމުގެ ދަށުން އަދި ބާކީ 200،000 ޑޯޒް ހުރި ނަމަވެސް، މި ޑޯޒްތަކެއް ލިބޭނެ ތާރީހެއް ވެސް ސަރުކާރަކަށް ނޭނގެ އެވެ.
ކޮވިޝީލްޑް ވެކްސިން ނުލިބުނަސް، އެސްޓްރާޒެނެކާއިން އޯޑަރުކޮށްފައިވާ 700،000 ވެކްސިން ޑޯޒް މި ޖޫން މަހުގެ ތެރޭގައި ލިބޭނެ ކަމަށް ހެލްތް މިނިސްޓަރު އަހުމަދު ނަސީމް ވަނީ ވިދާޅުވެފަ އެވެ. އެކަމަކު ސީދާ ތާރީހެއް މިހާތަނަށް ހާމަކޮށްފައެއް ނުވެ އެވެ.
