އިންޑިއާގައި މުޅިން އަލަށް އުފެއްދި ބޭހެއް ކޮވިޑަށް ފަރުވާ ދޭން ބޭނުން ކުރަން ފަށައިފި އެވެ.
"2-ޑީޖީ" ބޭސް އެމެޖެންސީ ހާލަތްތަކުގައި ބޭނުން ކުރުމުގެ ހުއްދަ ފުރަތަމަ ދިނީ ވެރިރަށް ނިއުދިއްލީގެ ހޮސްޕިޓަލްތަކަށް އެކަންޏެވެ.
އިންޑިއާ ސަރުކާރުން ނެރުނު ބަޔާނެއްގައި ބުނީ އެ ބޭހުގެ ސަބަބުން "ކޮވިޑުގެ ވޭނުގައި އުޅޭ މީހުންނަށް އެތައް ފައިދާއެއް ކުރާނެ" އެވެ.
ނަމަވެސް ބައެއް ފަރާތްތަކުން ބުނެފައިވަނީ ކޮވިޑަށް ފަރުވާއެއްގެ ގޮތުގައި ބޭނުން ކުރަން އެމެޖެންސީ ހުއްދަ ދިނުމަށް އެކަށީގެންވާ މައުލޫމާތު އެ ބޭހާ ގުޅޭ ގޮތުން މިހާތަނަށް އެއްކޮށްފައެއް ނުވާ ކަމަށެވެ.
އެ ބޭސް އުފެއްދީ ޑިފެންސް ރިސާޗް އެންޑް ޑެވެލޮޕްމަންޓް އޮގަނައިޒޭޝަން އާއި ބޭސް ކުންފުނި ޑރ. ރެއްޑީޒް ގުޅިގެންނެވެ.
"ދިރާސާއިން ދައްކާފައިވާ ގޮތުގައި މި މޮލެކިއުލްގެ ސަބަބުން ހޮސްޕިޓަލުގައި ފަރުވާދޭ ބަލި މީހުން އަވަހަށް ރަނގަޅުވާން އެހީވެދޭ އަދި އޮކްސިޖަނަށް ބަރޯސާ ވާން ޖެހޭ މިންވަރު ކުޑަކޮށްދޭ،" އިންޑިއާ ސަރުކާރުގެ ބަޔާނުގައި ވެއެވެ.
ނަމަވެސް ސިއްހީ ތަޖުރިބާކާރުން ބުނަނީ އިންސާނުން ބައިވެރިކޮށްގެން މި ބޭސް ޓެސްޓުކޮށް ހެދި ދިރާސާގެ މައުލޫމާތު މަދުވުމުން އޭގެން ކުރާ އަސަރު ޔަގީންކަމާއެކު ނުބުނެވޭނެ ކަމަށެވެ.
އޭގެ އިތުރުން މި ބޭހަކީ އެންމެ ފުރަތަމަ ކެންސަރަށް ފަރުވާ ދޭން ހެދި ބޭހަކަށް ވެފައި، އެގޮތަށް ބޭސް އެތައް ދުވަހަކު ޓެސްޓު ކުރުމަށް ފަހު ވެސް ހުއްދަ ދީފައި ނުވާތީ އެ މީހުންގެ ކަންބޮޑުވުން އެބަ ހުއްޓެވެ.
މިހާތަނަށް ކޮވިޑް އެއްކޮށް ރަނގަޅު ކުރެވޭނެ ނުވަތަ ނުޖެހޭނެ އެއްވެސް ގޮތެއް ފެނިފައެއް ނުވެ އެވެ. އެހެންކަމުން މި ބޭސް ވެސް ބޭނުން ކުރެވޭނީ ބަލީގެ އަލާމަތްތަކަށެވެ.
