އިންޑިއާގެ ހުޅަނގު ގުޖަރާތު ސްޓޭޓުން ތޫފާނު ޓައުކްޓޭ އަރާނެ ވަގުތަކަށް ތައްޔާރުވެއްޖެ އެވެ.
މިއީ 1998 ވަނަ އަހަރަށް ފަހު އެ ސަރަހައްދަށް އަރާނެ އެންމެ ބާރުގަދަ ތޫފާނެވެ.
ފާއިތުވި ދެ ދުވަހު ވެސް ތޫފާނުގެ ސަބަބުން ބޯކޮށް ވާރޭ ވެހިފައި ވާއިރު، އޭގެ ސަބަބުން ހަ މީހަކު މަރުވި އެވެ. އެތައް ހާސް ބަޔަކު މިހާރު ވަނީ ރައްކާތެރި ހިސާބުތަކަށް ބަދަލުކޮށްފަ އެވެ.
މީޓިއޮރޮލޮޖިކަލް ޑިޕާޓްމަންޓުން ބުނީ ތޫފާނުގެ ބާރު ގަދަވެ، އެންމެ ބާރުގަދަ "ސައިކްލޯނިކް ސްޓޯމެއް" ގެ ދަރަޖަ މިހާރު ދީފައިވާ ކަމަށެވެ.
ބާރުގަދަ ތޫފާނެއް އިންޑިއާއަށް އަރާފައި މި ވަނީ ކޮވިޑުގެ ދެ ވަނަ ރާޅެއްގައި އެ ގައުމުގެ ހާލަތު ގޯސްވެ، ސިއްހީ ނިޒާމަށް ލޮޅުން އަރާފައި ވަނިކޮށެވެ.
ތޫފާނު ޓައުކްޓޭ ގުޖަރާތަށް އަރާނެ ކަމަށް ބެލެވެނީ މިރޭގެ ވަގުތެއްގައި ގަޑިއަކު 160 ކިލޯމީޓަރުގެ ވަޔާއެކު އެވެ. ގުޖަރާތާއި ކައިރީގައިވާ މަހަރާޝްތްރަ ސްޓޭޓު ވެސް އޮތީ ހައި އެލާޓު ގަ އެވެ.
އެ ދެ ސްޓޭޓުގައި ވެސް ކޮވިޑު ކޭސްތައް މަދުވާން ފަށާފައިވީ ނަމަވެސް، ދެ ވަނަ ރާޅުގައި ސިއްހީ ނިޒާމަށް އެރި ލޮޅުން އަދިވެސް ހަމައަކަށް އެޅިފައެއް ނުވެ އެވެ.
ގުޖަރާތުގެ ބިން ތިރި ހިސާބުތަކުން 150،000 މީހުން ވަނީ ރައްކާތެރި ހިޔާވެހިތަކަށް ބަދަލުކޮށްފަ އެވެ. އެ މީހުން ތޮއްޖެހިގެން އެއް ތަނެއްގައި އުޅެން ޖެހޭނެތީ އަނެއްކާވެސް ހަލުވިކަމާއެކު ބަލި ފެތުރުމުގެ ބިރު ބޮޑެވެ.
ތޫފާނުގެ ސަބަބުން އިންޑިއާގެ ބައެއް ހޮސްޕިޓަލުތަކަށް ވެސް ވަނީ ގޮންޖެހުމާ ކުރިމަތިލާން ޖެހިފަ އެވެ. އެގޮތުން މަހަރާޝްތްރަ ސްޓޭޓުގެ ވެރިރަށް މުމްބާއީއަކީ އައްސޭރިފަށުގައި ހުންނަ ސިޓީއެއް ކަމުން ހޮސްޕިޓަލްތައް ވަނީ އެލާޓަށް ގެނެސްފަ އެވެ. މުމްބާއީގެ ބައެއް ހޮސްޕިޓަލްތަކާއި ކޮވިޑް ފެސިލިޓީތަކުން ވަނީ މިހާރު ވެސް 580 އަށް ވުރެ ކޮވިޑް ބަލި މީހުން އެހެން ތަންތަނަށް ބަދަލުކޮށްފަ އެވެ.
ތޫފާނުން ރައްކާތެރިވުމުގެ ގޮތުން އެތައް ހާސް މަސް ބޯޓެއް ވަނީ މަސައްކަތް ހުއްޓާލާފައި.-- ފޮޓޯ: ގެޓީ އިމޭޖަޒް
އޭގެ އިތުރުން މުމްބާއީގެ އެއާޕޯޓް ވެސް މިއަދު ހެނދުނު 11:00 އިން މެންދުރު 02:00 އަށް ބަންދު ކުރަން ވަނީ ނިންމާފަ އެވެ.
އޮފިޝަލުން މީހުންނަށް ލަފާ ދެނީ ގޭގައި ތިބުމަށެވެ. ތޫފާނުގެ ސަބަބުން މަގުތަކުގައި ފެންބޮޑުވެ، ގަސްތައް ވެއްޓި، ކަރަންޓު ކެނޑުން ފަދަ ކަންކަން ދިމާވާނެ ކަމަށް ލަފާ ކުރެވެ އެވެ.
އެތައް ހާސް މަސް ބޯޓެއް މަސައްކަތް ހުއްޓާލުމަށް ފަހު ބަނދަރުކޮށްފައި ވާއިރު، މުދާ އުފުލާ މަނަވަރުތައް ވެސް އެހެން ރޫޓުތަކުން ދިޔުމަށް ވަނީ އަންގާފަ އެވެ.
ގުޖަރާތާއި މަހަރާޝްތްރަގައި ވެސް ނޭޝަނަލް ޑިޒާސްޓާ ރެސްޕޯންސް ފޯސްގެ ޓީމުތައް މިހާރު ވެސް އަންނަނީ ހަރަކާތްތެރިވަމުންނެވެ.
ތޫފާނުގެ ސަބަބުން ބޯކޮށް ވާރޭވެހި ހަ މީހަކު މިހާތަނަށް މަރުވެފައި ވެއެވެ. އެ މީހުން މަރުވީ ފާއިތުވި ހަފްތާ ބަންދުގެ ތެރޭގައި ކެރަލާ، ކަރްނާޓަކާ އަދި ގޯއާ އިންނެވެ.
