މެޑްރިޑް (މެއި 16) - ސްޕެނިޝް ލީގުގައި މިރޭ އަމިއްލަ ދަނޑުގައި ސެލްޓަ ވިގޯ އަތުން 2-1 އިން ބަލިވެ ބާސެލޯނާ އަށް ލީގު ހޯދުމުގެ ހުރިހާ ދޮރެއް ބަންދުވިއިރު، ފަހު ވަގުތު ލުއިސް ސުއަރޭޒް ޖެހި ގޯލުން 2-1 އިން އޮސަސޫނާ ބަލިކޮށް އަމިއްލަ ބާރުގައި ލީގު ހޯދުމާ ފިޔަވަޅަކާ ގާތަށް އެތުލެޓިކޯ މެޑްރިޑުން ޖެހިލައިފި އެވެ.
ލީގުގައި ބާކީ އޮތީ ކޮންމެ ޓީމަކަށް ވެސް އެންމެ މެޗެކެވެ. އެތުލެޓިކޯ އެއް ވަނައިގައި އޮތީ 37 މެޗުން 83 ޕޮއިންޓާ އެކު އެވެ. ދެ ވަނައިގައި އޮތީ މިރޭ އެތުލެޓިކް ބިލްބާއޯ އަތުން 1-0 އިން މޮޅުވި ރެއާލް މެޑްރިޑް އެވެ. ރެއާލަށް 37 މެޗުން ލިބުނީ 81 ޕޮއިންޓެވެ. އެ ޓީމަށް އަދިވެސް ލީގު ހޯދުމުގެ ކޮންމެ ވެސް ފުރުސަތެއް އެބައޮތެވެ. އެއީ ފަހު މެޗުން އެތުލެޓިކޯގެ ނަތީޖާ ނުކުންނަ ގޮތަކުންނެވެ. މިރޭގެ ބައްޔާ އެކު ބާސެލޯނާ ލީގުގެ ތިން ވަނައިގައި އޮތީ 37 މެޗުން 76 ޕޮއިންޓާ އެކު އެވެ. ބާސެލޯނާ އަށް ދެން ލީގުގެ ދެ ވަނައިގައި ނިންމާލުމުގެ ފުރުސަތެއް ވެސް ނެތެވެ.
ފަހު މެޗުގައި އަންނަ އާދިއްތަ ދުވަހު ރެއާލް އަމިއްލަ ދަނޑުގައި ވިޔަރެއާލާ ބައްދަލުކުރާއިރު، އެތުލެޓިކޯ ރަށުންބޭރުގައި ބައްދަލުކުރާނީ ރެއާލް ވަލޮޑޮލިޑާ އެވެ. ވަލޮޑޮލިޑަށް އެ މެޗުން މޮޅުވެގެން ރެލިގޭޝަނުން ސަލާމަތްވެވޭނެ އެވެ. އެތުލެޓިކޯ އިން 2014 ވަނަ އަހަރަށް ފަހު ފުރަތަމަ ފަހަރަށް ލީގު ހޯދާނަމަ ވަލޮޑޮލިޑް ބަލިކުރަން ޖެހޭނެ އެވެ. އެ ނޫން ނަތީޖާއެއް ނުކުމެއްޖެނަމަ ދެން ޖެހޭނީ ރެއާލް ކުޅޭ މެޗުން ނުކުންނަ ނަތީޖާ އަކަށް ބަލާށެވެ.
އެތުލެޓިކޯ ދަނޑުގައި މިރޭ ކުޅުނު މެޗުގައި ލީޑުނެގީ އޮސަސޫނާ އިންނެވެ. މެޗުގެ 75 ވަނަ މިނިޓްގައި ރުބެން ގާސިއާ ދިން ބޯޅައަކުން އޮސަސޫނާ އަށް ލީޑުނަަގައިދިނީ އަންޓޭ ބުޑިމީއޭ އެވެ. އެތުލެޓިކޯ މޮޅުވީ ފަހު އަށް މިނިޓް ތެރޭ ދެ ގޯލު ޖަހައި ނަތީޖާ އަނބުރާލައިގެންނެވެ.
މެޗުގެ 82 ވަނަ މިނިޓްގައި ބްރެޒިލްގެ ފުލްބެކް ހެނާން ލޯޑީ އެތުލެޓިކޯ އަށް އެއްވަރުކޮށްދިނީ ޔާއޯ ފެލިކްސް ދިން ބޯޅައަކުންނެވެ. އެތުލެޓިކޯ މޮޅުކޮށްދިން ގޯލު 88 ވަނަ މިނިޓްގައި ޖެހީ ލުއިސް ސުއަރޭޒް އެވެ. މި ސީޒަނުގައި ބާސެލޯނާ ދޫކޮށް އެތުލެޓިކޯ އަށް ބަދަލުވި ސުއަރޭޒް މި ގޯލު ޖެހީ ޔަނިކް ކަރާސްކޯ ތަނަވަސްކޮށްދިން ފުރުސަތަކުންނެވެ.
ބާސެލޯނާ ދަނޑުގައި ކުޅުނު މެޗުގެ 28 ވަނަ މިނިޓްގައި ސާޖިއޯ ބުސްކެޓްސް ދިން ބޯޅައަކުން ލިއޮނަލް މެސީ ވަނީ ބާސެލޯނާ އަށް ލީޑުނަގައިދީފަ އެވެ. ސެލްޓަ އިން ވަނީ ފުރަތަމަ ހާފު ނިމުމުގެ ކުރިން އެއްވަރުކޮށްފަ އެވެ. މެޗުގެ 38 ވަނަ މިނިޓްގައި އިއާގޯ އަސްޕާސް ތަނަވަސްކޮށްދިން ފުރުސަތެއްގައި ސަންޓީ މިނާ ވަނީ ސެލްޓަގެ ފުރަތަމަ ގޯލު ޖަހައިފަ އެވެ.
ބާސެލޯނާ އަށް މައްސަލަ ދިމާވީ މެޗުގެ 83 ވަނަ މިނިޓްގައި އެ ޓީމުގެ ފްރާންސް ޑިފެންޑަރު ކްލެމެންޓް ލޯންގްލޭ އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކުމުންނެވެ. ބާސެލޯނާގެ އެއް ކުޅުންތެރިއަކު މަދުވުމުގެ ފައިދާ ސެލްޓަ އިން ނެގި އެވެ. އެ ޓީމު މޮޅުކޮށްދިން ގޯލު ޖެހީ 88 ވަނަ މިނިޓްގައި ސަންޓީ މިނާ އެވެ.
މި ސީޒަނަށް ފަހު ރެއާލްގެ ކޯޗު ޒިނެދިން ޒިދާން އެ ކްލަބް ދޫކޮށްލާނެކަން އެ ކްލަބްގެ ކުޅުންތެރިންނަށް އަންގާފައިވާ ކަމަށް މީޑިއާގައި އަޑުފެތުރިފައިވާއިރު، ރެއާލް މިރޭ ވަނީ ލީގުގެ ރޭހުގައި ދެމި އޮންނަން މުހިއްމު މޮޅެއް ހޯދައިފަ އެވެ. މެޗުގެ 68 ވަނަ މިނިޓްގައި ރެއާލްގެ ހަމައެކަނި ގޯލު ޖެހީ ކަސެމީރޯ ދިން ބޯޅައަކުން ނަޗޯ ފެނާންޑޭޒް އެވެ.
ބިލްބާއޯ އިން މެޗު ނިންމާލީ ކުޅުންތެރިއަކު މަދުކޮށެވެ. މެޗުގެ ފަހު ވަގުތު އެ ޓީމުގެ ރައުލް ގާސިއާ އަށް ވަނީ ސީދާ ރަތް ކާޑެއް ދައްކައިފަ އެވެ.
