އިސްތަންބޫލް (މެއި 16) - ތުރުކީ ލީގުގެ ފަހު މެޗުގައި ރޭ ގޮޒްޓެޕޭ އަތުން 2-1 އިން މޮޅުވެ، އެއް ގޯލުގެ ތަފާތުން ލީގުގެ ޗެމްޕިއަންކަން ބެސިކްޓާސް އިން ހޯދައިފި އެވެ.
ބެސިކްޓާސް ޗެމްޕިއަންކަން ހޯދީ މެޗުތައް ނިމުނުއިރު ދެ ވަނައިގައި ނިންމި ގަލަސަތަރާއިއާ އެއްވަރަށް 40 މެޗުން 84 ޕޮއިންޓް ލިބުނު ނަމަވެސް ލަނޑުގެ ތަފާތުން ކުރި ލިބޭތީ އެވެ.
ތުރުކީ ލީގުގެ ގަވާއިދުގައިވާ ގޮތުން ދެ ޓީމު ޕޮއިންޓް އެއްވަރުވެއްޖެނަަމަ ފުރަތަމަ ބަލާނީ ހެޑް ޓު ހެޑް ގަވާއިދަށެވެ. އެކަމަކު އެ ގަވާއިދުން ވެސް ގަލަސަތަރާއި އާއި ބެސިކްޓާސް ވީ އެއްވަރެވެ. އެހެންވެ ދެން ނިންމީ ލަނޑުގެ ތަފާތަށް ބަލާށެވެ. ގަލަސަތަރާއި އަށް ފައިދާ އޮތީ 44 ގޯލެވެ. ބެސިކްޓާސް އަށް ޗެމްޕިއަންކަން ލިބުނީ ފައިދާ 45 ގޯލު އޮތުމުންނެވެ.
ލީގުގެ ރޭހުގައި ދެން ވާދަކުރި ފެނަބާޗޭ ތިން ވަނައިގައި ނިންމާލީ 40 މެޗުން 82 ޕޮއިންޓާ އެކު އެވެ.
ގޮޒްޓެޕޭ ދަނޑުގައި ރޭ ކުޅުނު މެޗުގެ 10 ވަަނަ މިނިޓްގައި ބެސިކްޓާސަށް ލީޑުނަގައިދިނީ ކްރޮއޭޝިއާގެ ޑިފެންޑަރު ޑޮމަގޯއި ވީޑާ އެވެ. މެޗުގެ 25 ވަނަ މިނިޓްގައި ގޮޒްޓެޕާ އަށް އެއްވަރުކޮށްދިނީ އަލްޕަސްލާން އޮޒްޓާކް އެވެ. މެޗު ނިމެން 20 މިނިޓަށް ވެފައިވަނިކޮށް ބެސިކްޓާސް މޮޅުވި ގޯލު ޖެހީ ޕެނަލްޓީ އަކުން ރަޝީދް ގެޒާލް އެވެ. ލެސްޓާ ސިޓީގެ ލޯން އެއްބަސްވުމެއްގެ ދަށުން ގެޒާލް ޖެހި މި ގޯލަކީ ބެސިކްޓާސް އަށް ލީގު ލިބުނު ގޯލެވެ.
އެންމެ ފަހުން ތުރުކީ ލީގުގެ ޗެމްޕިއަންކަން ބެސިކްޓާސް އިން ހޯދީ 2016-2017 ވަަނަ ސީޒަނުގަ އެވެ. މިއީ އެ ޓީމުން ލީގު ކާމިޔާބުކުރި 16 ވަނަ ފަހަރެވެ. އިތުރު ތަށްޓަކާ އެކު މި ސީޒަން ނިންމާލުމުގެ ފުރުސަތު ބެސިކްޓާސް އަށް އެބައޮތެވެ. ތުރުކީ ކަޕް ފައިނަލުގައި ބެސިކްޓާސް ނުކުންނާނީ އަންތަލިޔަސްޕޯއާ ދެކޮޅަށެވެ.
