ކޮވިޑަށް ފަރުވާދެމުން ދިޔަ 30 އަހަރުގެ ދިވެހި އަންހެނަކު މިއަދު މަރުވެއްޖެ އެވެ.
މިއީ، ކޮވިޑްގައި މިހާތަނަށް ރާއްޖެ އިން މަރުވި އެންމެ ޒުވާން ދިވެހި މީހާ އެވެ. މީގެ ކުރިން ކޮވިޑުގައި އެންމެ ޒުވާން މީހަކަށް މަރުވީ 27 އަހަރުގެ ބިދޭސީއެކެވެ.
ކޮވިޑުގެ މިއަދުގެ މަރާ އެކު ރާއްޖެ އިން މި ބަލީގައި މަރުވި ޖުމްލަ އަދަދު ވަނީ 96 އަށް އަރައިފަ އެވެ.
ހުޅުމާލޭގެ ކޮވިޑު ފެސިލިޓީގައި ފަރުވާދެމުން އަންނަނިކޮށް ރޭ ފަތިހު މަރުވީ މާލޭ ދަފްތަރު އާއިޝަތު މިޒުނާ އެވެ. މިއަދު ހެނދުނު ހުޅުމާލޭ ސަހަރާގައި އޭނާ ވަނީ ވަޅުލައިފަ އެވެ.
ޒުވާން އުމުރުގައި މަރުވި މިޒުނާއާ ގުޅޭ އެއްވެސް އިތުރު މައުލޫމާތެއް އެޗްޕީއޭން ނުދެ އެވެ.
އެކަމަކު އާއިލާ އިން "އަދަދު"އަށް ވާހަކަ ދެއްކި މީހަކު ބުނިގޮތުގައި މިޒްނާއަކީ ހަކުރު ބައްޔަށް ބޭސްކުރަމުން އަންނަ މީހެކެވެ. ކޮވިޑުގައި ބޮޑުވަރުވާ މީހުންގެ ތެރޭގައި ދާއިމީ ބައްޔަށް ބޭސްކުރާ މީހުން ހިމެނެ އެވެ.
ރާއްޖެއިން ކޮވިޑަށް ޕޮޒިޓިވްވާ މީހުންގެ އަދަދު އިތުރުވާން ފަށާފައިވާއިރު އެ ބަލީގައި މަރުވާ މީހުންގެ އަދަދު ވެސް ދަނީ އިތުރުވަމުންނެވެ.
