ކޮވިޑް ވެކްސިން ހިއްސާކުރަން މުއްސަނދި ގައުމުތަކަށް ޑަބްލިއުއެޗްއޯގެ ޕްރެޝަރު

ޑަބްލިއުއެޗްއޯގެ ޗީފް ޑރ. ޓެޑްރޯސް އަދަނޮމް.-- ފޮޓޯ: ރޮއިޓާޒް

ޑަބްލިއުއެޗްއޯގެ ޗީފް ޑރ. ޓެޑްރޯސް އަދަނޮމް.-- ފޮޓޯ: ރޮއިޓާޒް

މުއްސަނދި ގައުމުތަކުން ކުޑަކުދިންނަށް ކޮވިޑް ވެކްސިން ދިނުން މަޑުޖައްސާލުމަށް ފަހު އާމްދަނީ ކުޑަ ގައުމުތަކަށް ސަޕްލައި ހަދިޔާ ކުރަން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ވެރިޔާ ގޮވާލައްވައިފި އެވެ.

އިއްޔެ ބޭއްވި ޑަބްލިއުއެޗްއޯގެ ޕްރެސް ބްރީފިންގައި ޑރ. ޓެޑްރޯސް އަދަނޮމް ގައުމުތަކަށް ގޮވާލެއްވީ ކޮވިޑް ވެކްސިންގެ ސަޕްލައި ޑަބްލިއުއެޗްއޯއިން ހިންގާ ކޯވެކްސް ސްކީމަށް ހަދިޔާ ކުރާށެވެ. އެ ސްކީމަކީ ގައުމުތަކަށް ހަމަހަމަކަމާ އެކު ވެކްސިން ފޯރުކޮށްދޭން ހެދި ސްކީމެކެވެ.

ކޮވިޑް ވެކްސިންގެ ބެހުމުގައި ދުނިޔޭގައި އެއްވެސް ހަމަހަމަ ކަމެއް މިހާތަނަކަށް ނެތެވެ. ޑިސެމްބަރު މަހު ވެކްސިންތަކަށް ހުއްދަ ދޭން ފެށުމާއެކު ދުނިޔޭގެ އެންމެ މުއްސަނދި ގައުމުތަކުން ވަނީ އެންމެ ގިނަ ސަޕްލައި އަވަހަށް ގަނެފަ އެވެ.

Advertisement

މުއްސަނދި ގައުމުތަކުން ވާދަކުރަމުން ދަނީ އާބާދީގެ ވީ އެންމެ ބޮޑު ބަޔަކަށް ވެކްސިން ދީ ނިންމާލުމަށެވެ.

ހުކުރު ދުވަހުގެ ޕްރެސް ބްރީފިންގައި ޑރ. ޓެޑްރޯސް ވިދާޅުވީ ގިނަ ގައުމުތަކަކުން ކުޑަކުދިންނަށް ވެކްސިން ދޭން ބޭނުންވާ ސަބަބު އެނގިވަޑައިގަންނަވާ ކަމަށާއި ނަމަވެސް އެ ނިންމުން މުރާޖައާ ކުރަން ގޮވާލައްވާ ކަމަށެވެ.

"އާމްދަނީ ކުޑަ އަދި މެދު މިންވަރަކަށް އާމްދަނީ ލިބޭ ގައުމުތަކަށް މިހާތަނަށް ލިބިފައިވާ ކޮވިޑް ވެކްސިން ސަޕްލައިއަކީ ސިއްހީ ދާއިރާގެ މަސައްކަތްތެރިންނަށް ވެސް ޖެހޭ މިންވަރަށް ވުރެ މަދު ސަޕްލައިއެއް. ހޮސްޕިޓަލްތައް ފުރެމުންދަނީ އަވަހަށް ފުރާނަ ސަލާމަތް ކުރަން ބޭނުންވާ ފަރުވާ ދޭން ޖެހޭ މީހުންތަކުން،" އޭނާ ވިދާޅުވި އެވެ.

މިދިޔަ ހަފްތާގައި އެމެރިކާގެ ރައީސް ޖޯ ބައިޑެން ވަނީ އުމުރުން 12 އަހަރާއި 15 އަހަރާ ދެމެދުގެ ކުދިންނަށް އަވަހަށް ވެކްސިން ދެވޭނެ ގޮތުގެ ރޭވުމެއް އިއުލާނު ކުރައްވާފަ އެވެ. އަދި ޖުލައި 4 ގެ ކުދިން އެމެރިކާގެ ބޮޑެތި މީހުންގެ 70 ޕަސެންޓު މީހުން އެއް ޑޯޒް ޖެހުމަށް ލަނޑުދަނޑި ކަނޑައެޅުއްވި އެވެ.

ކެނެޑާއިން ވެސް ވަނީ އުމުރުން 12 އަހަރާއި 15 އަހަރާ ދެމެދުގެ ކުދިންނަށް ފައިޒާގެ ކޮވިޑް ވެކްސިން ޖެހުމުގެ ހުއްދަ ދީފަ އެވެ. ކޮވިޑް ކޭސްތައް އެންމެ ގިނައިން ފެންނަމުން އަލްބޭޓާ ޕްރޮވިންސްގައި މިހާރު ވެސް ދަނީ 12 އަހަރުން މަތީގެ ކުދިންނަށް މި ވެކްސިން ދެމުންނެވެ.

ސްވިޓްޒަލޭންޑުގައި މިދިޔަ ހަފްތާއިން ފެށިގެން 16 އަހަރުން މަތީގެ ކުދިންނަށް ދަނީ ވެކްސިން ދެމުންނެވެ.

މިހާތަނަށް އެންމެ ގިނަ ވެކްސިން ޑޯޒް ޖަހާފައިވަނީ އެމެރިކާ އާއި ޗައިނާ އަދި އިންޑިއާއިންނެވެ. ޔޫރޮޕާއި، ލެޓިން އެމެރިކާގެ ގިނަ ގައުމުތަކުން ވެސް ވެކްސިން ދޭން ފަށާފައި ވާއިރު އެފްރިކާގެ ބައެއް ގައުމުތަކަށް އަދިވެސް ވެކްސިން ދޭން ނުފެށެ އެވެ.

ކޯވެކްސް ސްކީމަކީ އޭގައި ބައިވެރިވި 92 ފަގީރު ގައުމެއްގެ އާބާދީގެ 20 ޕަސެންޓަށް ވެކްސިން ދިނުމުގެ އަމާޒުގައި އުފެއްދި ސްކީމެކެވެ. އެ ސްކީމުގެ ދަށުން އިސްކަން ދޭނީ ސިއްހީ މަސައްކަތްތެރިންނަށެވެ.

އެ ސްކީމް ހިންގަނީ ޑަބްލިއުއެޗްއޯ އާއި ގްލޯބަލް ވެކްސިން އެލަޔަންސް (ގަވީ)، ކޯލިޝަން ފޯ އެޕިޑެމިކް ޕްރިޕެއާޑްނަސް އިނޮވޭޝަންސް (ސެޕީ) އަދި ޔުނިސެފުންނެވެ.

އިއްޔެ ޕްރެސް ބްރީފިންގައި ޑރ. ޓެޑްރޯސް ވަނީ ބަލިމަޑުކަމުގެ ފުރަތަމަ އަހަރަށް ވުރެ ދެ ވަނަ އަހަރުގެ ނުރައްކާ މާ ބޮޑުކަމުގެ އިންޒާރު ދެއްވާފަ އެވެ. އަދި އިންޑިއާގެ ހާލަތާ މެދު ކަންބޮޑުވުން ފާޅުކުރެއްވި އެވެ.

އިންޑިއާގައި ފްރަންޓްލައިނުގައި މަސައްކަތް ކުރާ ގިނަ ސިއްހީ ފަރާތްތަކަށް އަދިވެސް ވެކްސިން ޖަހާފައެއް ނުވެ އެވެ. އަދި އޭގެ ތެރެއިން ބައެއް މީހުން ދަނީ މި ބަލި ޖެހިގެން މަރުވަމުންނެވެ. އިންޑިއާއަށް ވެކްސިނުގެ ދަތިކަން ދިމާވީ ދެ ވަނަ ރާޅަކާ ދިމާވި ތަނުންނެވެ. ތިން ވަނަ ރާޅު ބޯމަތިވަމުންދާ ކަމުގެ އިންޒާރު ސައިންސްވެރިން މިހާރު ވެސް ވަނީ ދީފަ އެވެ.

ޑަބްލިއުއެޗްއޯއިން އިންޑިއާގެ ހާލަތު ސިފަކުރީ ރަނގަޅާއި ނުބައި ވަކިނުކޮށް ގައުމުތަކުން އަމަލު ކުރުމުން ދިމާވެފައިވާ ކާރިސާއެއްގެ ގޮތުގަ އެވެ. އާމްދަނީ ދަށް އެހެން ގައުމުތަކަށް އެ ކާރިސާ ކުރިމަތިވެދާނެ ކަމަށް ޑަބްލިއުއެޗްއޯއިން ބުނެ އެވެ.

ކޮމެންޓް

ފަހުގެ ޚަބަރު

ސްޕޭސްއެކްސްއަށް ފަންޑިން ހުއްޓުވުމުގެ އިންޒާރު

ޔޫކްރެއިންގައި ބޭނުންކުރާ ސްޓާޝީލްޑްގެ ޚިދުމަތަށް ބަދަލުތަކެއް އައި މައްސަލައިގައި، ސްޕޭސްއެކްސްއަށް ދޭ ފަންޑިން ހުއްޓާލާނެ ކަމުގެ އިންޒާރު އެމެރިކާގެ ކޮންގްރެސް މެންބަރު ޖިމް ހައިމްސް ދެއްވައިފިއެވެ. އޭނާ އެދިވަޑައިގަންނަވަނީ މި ބަދަލުތަކަކީ ކުންފުނިން އަމިއްލައަށް ނިންމި ނިންމުމެއްތޯ ނުވަތަ ސަރުކާރުގެ އެންގުމަކަށް ކުރި ކަމެއްތޯ ސާފުކޮށްދިނުމަށެވެ. ސަރުކާރުގެ ފުރިހަމަ ކޮންޓްރޯލް ނެތް ނިޒާމުތަކަށް ފައިސާ ދޫނުކުރާނެ ކަމަށް ވިދާޅުވެ، މިކަމާ ގުޅޭގޮތުން އީލޮން މަސްކާ ބައްދަލުކުރުމަށްވެސް ހައިމްސް ވަނީ އެދިވަޑައިގެންފައެވެ.

ރަޝިޔާ އާއެކު މަޝްވަރާއަށް ތައްޔާރު: ޔޫރަޕުގެ ލީޑަރުން

ޔޫކްރެއިން ހަނގުރާމަ ހުއްޓާލުމަށް ރަޝިޔާއާއެކު މަޝްވަރާކުރުމަށް ތައްޔާރަށް ތިބިކަން ޔޫރަޕުގެ ލީޑަރުން ހާމަކޮށްފައިވާއިރު، މި މަޝްވަރާތަކުގައި ވިލާތުގެ ބައިވެރިވުން ހިމެނުމަށް އެމެރިކާއިން ދަނީ ބާރުއަޅަމުންނެވެ. ރަޝިޔާގެ ރައީސް ޕޫޓިން ވަނީ ވިލާތުގެ ގައުމުތަކުގެ ސިޔާސަތުތައް ސާފުކުރުމަށްޓަކައި މޮސްކޯއަށް ޒިޔާރަތްކުރުމަށް އެ ގައުމުތަކަށް ދައުވަތު ދެއްވާފައެވެ.

އެންތްރޮޕިކް 1.76 ޓްރިލިއަން ޑޮލަރުގެ ކުންފުންޏަކަށް

އޭއައި ކުންފުނި އެންތްރޮޕިކް ހިއްސާގެ ބާޒާރަށް ނުކުތުމާއެކު، އެ ކުންފުނީގެ އަގު 1.76 ޓްރިލިއަން ޑޮލަރަށް އަރައި ދުނިޔޭގެ އެންމެ އަގުބޮޑު ކުންފުނިތަކުގެ ތެރޭގައި ހިމެނިއްޖެއެވެ. ހިއްސާގެ އަގަށް އައި ކުރިއެރުމާއެކު އޭއައި ދާއިރާއަށް އޮތް ބޮޑު ޝައުގުވެރިކަން ހާމަވީ ނަމަވެސް، މިއީ އިގްތިސާދީ "ބަބުލް" އެއްގެ ގޮތުގައި ބައެއް މާހިރުން ސިފަކުރެއެވެ. ކްލޯޑް ޗެޓްބޮޓް އުފެއްދި މި ކުންފުނިން އެންމެ ބޮޑު އިސްކަމެއް ދެނީ އޭއައިގެ ރައްކާތެރިކަމަށެވެ.

ވެން ގޯގެ ކުރެހުމެއް 190 މިލިއަން ޑޮލަރަށް ވިއްކާލައިފި

ވިންސެންޓް ވެން ގޯގެ "ޗެސްޓްނަޓް ޓްރީޒް އިން ބްލޮސަމް" ކުރެހުން 190.4 މިލިއަން ޑޮލަރަށް ވިއްކާލައި، ދުނިޔޭގެ އާ ރެކޯޑެއް ގާއިމުކޮށްފިއެވެ. މި ކުރެހުން ނީލަމުގައި ވިއްކާލާފައިވަނީ، ނާޒީންގެ ދުވަސްވަރު މަޖުބޫރުވެގެން މި ކުރެހުން ވިއްކާލަން ޖެހުނު އާއިލާއާއި މިހާރުގެ މިލްކުވެރިންގެ މެދުގައި އުފެދުނު ގާނޫނީ މައްސަލައަށް ހައްލެއް ހޯދުމަށްފަހުގައެވެ.

ރޮހިންޔާ ގަތުލުއާންމުގައި މިޔަންމާ ކުށްވެރިވެއްޖެ

މި މައްސަލައިގައި ދަ ގެމްބިއާއަށް ތާއީދުކޮށް، ރާއްޖެއިން ވަނީ ބައިނަލްއަގުވާމީ ވަކީލުންނާއެކު ކޯޓުގައި މިޔަންމާއާ ދެކޮޅަށް ވަކާލާތުކޮށް އިސް ދައުރެއް އަދާކޮށްފަ. ކޯޓުގެ ހުކުމުގައި މިޔަންމާ ކުށްވެރިކޮށް، ގެއްލުމުގެ ބަދަލު ދިނުމުގެ ޕްރޮގްރާމެއް އެކުލަވާލުމަށް ވެސް ވަނީ އަމުރުކޮށްފަ.

ޕެޓިންސަން ހަތްވަނަ ބޮންޑަށް ހޮވުމުގައި ބޭޒޯސްގެ ބޮޑު ދައުރެއް

އާ ޖޭމްސް ބޮންޑުގެ ރޯލަށް އެކްޓަރު ރޮބަޓް ޕެޓިންސަން ހަމަޖެއްސުމުގައި އެމެޒޯންގެ ޗެއާމަން ޖެފް ބޭޒޯސް މުހިންމު ދައުރެއް އަދާކޮށްފައިވާކަން އޭނާ ހާމަކުރައްވައިފިއެވެ. ޑެނިއަލް ކްރެއިގްގެ ފަހުން ހަތްވަނަ ބޮންޑުގެ ގޮތުގައި ޕެޓިންސަން ފެނިގެންދާ 26 ވަނަ ފިލްމު، ޑެނިސް ވިލެނޫވްގެ ޑައިރެކްޝަނުގެ ދަށުން 2028 ވަނަ އަހަރު ރިލީޒްކުރުމަށް ވަނީ ތާވަލުކޮށްފައެވެ.

އެންތްރޮޕިކް އުފެއްދި 7 ބާނީން ބިލިއަނަރުންގެ ލިސްޓަށް

އޯޕަން އޭއައި އިން ވަކިވި ހަތް މީހަކު 2021 ވަނަ އަހަރު އުފެއްދި އެންތްރޮޕިކް ކުންފުނި ހިއްސާގެ ބާޒާރަށް ނެރުމާއެކު، އެ ކުންފުނީގެ ބާނީން ބިލިއަނަރުންގެ ލިސްޓަށް އެރުމަށް ވަނީ ތައްޔާރުވެފައެވެ. އޭއައިގެ ރައްކާތެރިކަމަށް އިސްކަންދޭ މި ޒުވާން ޓީމުގެ ކުންފުނިން އުފެއްދި "ކްލޯޑް" އާއެކު، އެންތްރޮޕިކް މިހާރު ވަނީ ޓެކްނޮލޮޖީގެ ދާއިރާގެ ބޮޑު ބާރަކަށް ބަދަލުވެފައެވެ.

Newsletter

Get the latest news delivered straight to your inbox