އަވަށްޓެރި ސްރީލަންކާއަށް ދާ މީހުން، 14 ދުވަހުގެ ކަރަންޓީނު މުއްދަތެއް ފުރިހަމަ ކުރަން ޖެހޭ ގޮތަށް އެ ގައުމުން އުސޫލެއް ހަދައިފި އެވެ.
ގިނަ އަދަދެއްގެ ދިވެހިން ދިރިއުޅޭ ލަންކާއިން މި ފިޔަވަޅު އެޅީ، އެ ގައުމުގައި ކޮވިޑްގެ ހާލަތު ގޯސްވަމުންދާތީ އެވެ. ލަންކާގައި މިހާރު ގެންދަނީ ކާފިއު ވެސް ހިންގަމުންނެވެ.
ފޮރިން މިނިސްޓްރީން ބުނި ގޮތުގައި، ލަންކާއަށް ދަތުރުކުރާ ކޮވިޑް ވެކްސިން ފުރިހަމަކޮށްފައިވާ ފަރާތްތައް ހިމެނޭހެން، އެންމެން ވެސް އެ ގައުމުގެ ސަރުކާރުން ކަނޑައަޅާ ކަރަންޓީނު ހޮޓަލެއް، ނުވަތަ ކަރަންޓީނު ސެންޓަރެއް، ނުވަތަ ރައްކާތެރިކަމަށް ކަނޑައަޅާފައިވާ ލެވެލް އެކެއްގެ ހޮޓަލެއްގައި 14 ދުވަހުގެ މުއްދަތައް ކަރަންޓީނުވާން ޖެހޭނެކަން އަންގާފައިވާ ކަމަށެވެ.
އަދި އެ ގައުމަށް ދަތުރުކުރާ 12 އަހަރުން ފެށިގެން މަތީގެ ފަރާތްތައް 14 ދުވަހުގެ ކަރަންޓީނު ފުރިހަމަކުރުމަށްފަހު ދޫކުރެވޭނީ، ދަތުރުކުރާ ފުރަތަމަ ދުވަހު ހަދާ "އޮން އެރައިވަލް" ޕީސީއާރް ޓެސްޓާއި، ކަރަންޓީނުގެ 11 ވަނަ ދުވަހާއި 14 ވަނަ ދުވަހާ ދެމެދު ހަދާ "އެގްޒިޓް" ޕީސީއާރް ޓެސްޓުގެ ނަތީޖާ ނެގެޓިވް ވުމުން ކަމުގައިވެސް ވަނީ އަންގަވާފައިވާ ކަމަށް ފޮރިން މިނިސްޓްރީން ބުންޏެވެ.
އެރައިވަލް އަދި ކަރަންޓީނުން ވީއްލާއިރު ހަދާ ޕީސީއާރް ޓެސްޓު ހެދުން އިސްތިސްނާ ވާނީ ދެ އަހަރުން ދަށުގެ ކުދީން އެކަންޏެވެ.
ފޮރިން މިިނިސްޓްރީން ބުނި ގޮތުގައި، ކަރަންޓީނު ކުރުމުގެ އުސޫލަށް މިގޮތަށް ބަދަލު ގެނެސްފައިވީ ނަމަވެސް، ކްރިޓިކަލް ފަރުވާއަށް ގޮސް ހޮސްޕިޓަލުގައި ކަރަންޓީނުވާން އެދޭ ފަރާތްތަކުން، ހޮސްޕިޓަލާއި ސްރީލަންކާގެ ހެލްތް މިނިސްޓްރީގެ ހާއްސަ ހުއްދައިގެ ދަށުން، ބޭސްފަރުވާއަށް ދަތުރުކުރުމުގެ ފުރުސަތު ކުރިއެކޭ އެއްގޮތަށް އޮންނާނެކަން އެ ގައުމުން އަންގާފައިވާ ކަމަށެވެ.
މި އުސޫލު ނެރެފައިވަނީ މި މަހުގެ ނިޔަލަށެވެ.
