މެޑްރިޑް (މެއި 14) - ސްޕެނިޝް ލީގުގައި މިރޭ ރަށުންބޭރުގައި 4-1 އިން ގްރަނާޑާ ބަލިކޮށް ރެއާލް މެޑްރިޑުން ދެ ވަނަ އަށް ޖެހިލައި ލީގުގެ އެއް ވަނައިގައި އޮތް އެތުލެޓިކޯ މެޑްރިޑާ ދެމެދު އޮތް ޕޮއިންޓުގެ ފަރަގު ކުޑަކޮށްފި އެވެ.
މިރޭގެ މެޗަށް ފަހު ލީގުގެ ރޭހުގައި އޮތް ޓީމުތަކަށް ބާކީ އޮތީ ދެ މެޗެވެ. އެތުލެޓިކޯ އެއް ވަނައިގައި އޮތީ 36 މެޗުން 80 ޕޮއިންޓާ އެކު އެވެ. ދެ ވަނައިގައި އޮތް ރެއާލުން ވަނީ 36 މެޗުން 78 ޕޮއިންޓް ހޯދައިފަ އެވެ. ތިން ވަނައިގައި އޮތް ބާސެލޯނާ އަށް 36 މެޗުން 76 ޕޮއިންޓް ވަނީ ލިބިފަ އެވެ. ހަތަރެއްގައި އޮތް ސެވިއްޔާ އަށް ވަނީ 36 މެޗުން 74 ޕޮއިންޓް ލިބިފަ އެވެ.
ރެއާލުން ފުރަތަމަ ހާފު ނިންމާލީ ދެ ގޯލުގެ ކުރީގައި އޮވެގެންނެވެ. އެ ޓީމަށް ފުރަތަމަ ހާފުގައި ގޯލުތައް ޖަހައިދިނީ ލޫކަ މޮޑްރިޗާއި ރޮޑްރީގޯ އެވެ. މި ގޯލުތައް ޖަހަން ފުރުސަތު ތަނަވަސްކޮށްދިނީ ރެއާލްގެ ޒުވާން ދެ ކުޅުންތެރިންނެވެ. އެއީ މިހޭލް ގުޓިއޭރޭޒާއި މާވިން ޕާކް އެވެ. މި ދެ ކުޅުންތެރިން ވެސް އުފަންވީ ދެހާހުގެ އަހަރުތަކުގެ ތެރޭގަ އެވެ.
ތަޖުރިބާކާރު ކުޅުންތެރިޔާ ޖޯޖް މޮލީނާ ގްރަނާޑާ އަށް މެޗުގެ 71 ވަނަ މިނިޓްގައި ލަނޑެއް ޖަހައިދިނެވެ. އެކަމަކު ރެއާލުން ފޯކަސް ގެއްލުވާނުލައި ކުޅެ ގާތްގާތުގައި އިތުރު ދެ ގޯލު ޖެހި އެވެ. މެޗުގެ 75 ވަނަ އެ ގޮތުން މިނިޓްގައި އަލްވާރޯ އޮޑްރިއޮޒޯލާ ގޯލު ޖެހީ އެޑެން ހަޒާޑް ދިން ބޯޅައަކުންނެވެ. އޭގެ މިނިޓެއް ފަހުން ކަރިމް ބެންޒެމާ ވަނީ ރެެއާލަށް ހަތަރު ވަނަ ގޯލެއް ޖަހައިދީފަ އެވެ.
ރެއާލްގެ ކޯޗު ޒިނެދިން ޒިދާން ބުނީ މިއީ އޭނާގެ ޓީމުން މުހިއްމު ވަގުތެއްގައި ހޯދި ވަރަށް މުހިއްމު ޕޮއިންޓްތަކެއް ކަމަށެވެ. އަދި ރެއާލުން ބޭނުންވަނީ ލީގު ކޮންމެ ގޮތެއްވި ކަމުގައި ވިޔަސް އެންމެ ފަހު ވަގުތާ ޖެހެންދެން ކާމިޔާބު ހޯދުމުގެ މަސައްކަތުގައި ދެމިތިބެން ކަމަށް ޒިދާން ބުންޏެވެ.
