އެމްއެމްޕީއާރުސީގެ ހިޔާނާތް ތަހުގީގު ކުރުމަށް، ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ (ޕީސީސީއޭއާރު) އަށް ދޫކޮށްފައިވާ އޭސީސީގެ މުވައްޒަފުން އަނބުރާ އެ ކޮމިޝަނަށް ބަދަލު ކުރަނީ ކުރިމަތިވެފައިވާ ޖާގައިގެ ދަތިކަން ހައްލުވުމުން ކަމަށް އޭސީސީން މިރޭ ބުނެފި އެވެ.
އޭސީސީން އެސެޓް ރިކަވަރީ ކޮމިޝަނަށް މިހާރު ދޫކޮށްފައިވަނީ ހަ މުވައްޒަފުންނެވެ. މިހާތަނަށް އެ މުވައްޒަފުން މަސައްކަތް ކުރަމުން އައީ ޕީސީސީއޭއާރުގެ އޮފީހުގަ އެވެ. ނަމަވެސް އެ މުވައްޒަފުން ވެސް މި މަހުގެ 23 ވަނަ ދުވަހުން ފެށިގެން އޭސީސީގެ އިދާރާގައި މަސައްކަތް ކުރަން އެ ކޮމިޝަންގެ މެމްބަރުން ނިންމައި އެކަން އެސެޓް ރިކަވެރީ ކޮމިޝަނަށް ވަނީ އަންގައިފަ އެވެ.
ހިޔާނާތް ބަލައި އެކަން ދިރާސާ ކުރަމުންދާ ސަލާމަތީ ހިދުމަތްތަކުގެ ކޮމިޓީ އާއި ޖުޑިޝަރީ ކޮމިޓީ ގުޅިގެން އުފައްދާފައިވާ ޖޮއިންޓް ކޮމިޓީން އިއްޔެ ނެރުނު ރިޕޯޓްގައި އޭސީސީގެ އިތުރު ވަސީލަތްތައް ޕީސީސީއޭއާރަށް ހޯދަން އެދުމަށް އަންގައިފަ އެވެ. މަޖިލީހުން އެހެން އަންގާފައި ވަނިކޮށް އޭސީސީން އެގޮތަށް ނިންމުމުން މަޖިލީހުގެ ނިންމުމަށް އޭސީސީން އަމަލު ނުކުރަނީތޯ ސުވާލު އުފެދުނެވެ.
އޭސީސީގެ ރައީސް މަރިޔަމް ޝިއުނާ "އަދަދު" އަށް ވިދާޅުވީ ޕީސީސީއޭއާރުގައި އެ ހަ މުވައްޒަފުން މަސައްކަތް ކުރަމުން ދިޔައީ އެ އޮފީހަށް ކުރިމަތިވެފައިވާ ޖާގައިގެ ދަތިކަމުގެ ސަބަބުން ކަމަށެވެ. އޭސީސީން މިހާރު އާ އޮފީހަކަށް ބަދަލުވެފައިވާއިރު އެމްއެމްޕީއާރުސީގެ މައްސަލަ ބަލާ ޓީމަށް ހާއްސަ ޖާގައެއް ހަމަޖައްސާފައިވާ ކަމަށް ޝިއުނާ ވިދާޅުވި އެވެ.
ޝިއުނާ ވިދާޅުވީ އެ ޓީމް އޭސީސީގެ އޮފީހަށް ބަދަލު ކުރަން ކުރިން ވެސް އޮތީ ނިންމާފައި ކަމަށާއި އެކަން ލަސްވެގެން ދިޔައީ ކޮވިޑުގެ ސަބަބުން ކަމަށެވެ. އޭސީސީގެ އޮފީހަށް އެ މުވައްޒަފުން ބަދަލު ކުރިނަމަވެސް މަސައްކަތަށް އެއްވެސް ބަދަލެއް ނާންނާނެ ކަމަށް ވެސް އޭނާ ވިދާޅުވި އެވެ.
"މިއީ ރިޕޯޓް ނެރުމުގެ ކުރިން ވެސް އަޅުގަނޑުމެން ނިންމާފައިވާ ނިންމުމެއް. އޭސީސީގެ އޮފީހުގައި މަސައްކަތް ކުރިޔަސް އެ ޓީމުން ކުރާނީ ހަމަ އެ މަސައްކަތް،" ޝިއުނާ ވިދާޅުވި އެވެ.
ހުރަވީ ބިލްޑިންގައި ހިންގަމުން އައި އޭސީސީގެ އޮފީސް މިހާރު ވަނީ ސަކީނާ މަންޒިލަށް ބަދަލުކޮށްފަ އެވެ.
އެސެޓް ރިކަވަރީ ކޮމިޝަނާއި އޭސީސީން އެއް މަސައްކަތެއް ކުރަން ޖެހޭނީ ފުށުއަރާ ކަމަށް ބުނެ މީގެ ކުރިން ވެސް ވަނީ ފާޑު ކިޔުން އަމާޒުވެފަ އެވެ. ނަމަވެސް ޝިއުނާ ވިދާޅުވިގޮތުގައި އެ ދެ ކޮމިޝަން މަސައްކަތް ކުރަނީ ވަރަށް ގުޅިގެންނެވެ.
