އެމްއެމްޕީއާރުސީގެ ބޮޑު ހިނާޔާތް ތަހުގީގު ކުރުމަށް އެންޓި ކޮރަޕްޝަން ކޮމިޝަން (އޭސީސީ)ގެ މުވައްޒަފުންގެ އެހީތެރިކަން މިހާރަށް ވުރެން ވެސް އިތުރަށް އެސެޓް ރިކަވަރީ ކޮމިޝަނަށް ދިނުމަށް ރައްޔިތުންގެ މަޖިލީހުން އަންގާފައިވަނިކޮށް އެ ތަހުގީގަށް ދޫކޮށްފައިވާ މުވައްޒަފުން އަނބުރާ އޭސީސީ އަށް ގެންދިއުމަށް މިއަދު ނިންމައިފި އެވެ.
ހިޔާނާތް ބަލައި އެކަން ދިރާސާ ކުރަމުންދާ ސަލާމަތީ ހިދުމަތްތަކުގެ ކޮމިޓީ އާއި ޖުޑިޝަރީ ކޮމިޓީ ގުޅިގެން އުފައްދާފައިވާ ޖޮއިންޓް ކޮމިޓީން އިއްޔެ ނެރުނު ރިޕޯޓްގައި އޭސީސީއަށް އެންގުންތަކެއް ވަނީ އަންގައިފަ އެވެ.
އެގޮތުން ރިޝްވަތު ދިނުމާއި ރިޝްވަތު ހިފުން ހުއްޓުވުމާއި، މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދުމާއި ހޯދައިދިނުން ހުއްޓުވުމާއި، މިފަދަ ކޮރަޕްޝަންގެ މައްސަލަތައް ތަހުގީގު ކުރުމުގެ އެންމެ އިސް ދައުރު އަދާކުރުމުގެ މަސްއޫލިއްޔަތު އަދާކަންކުރަންޖެހޭ އެއް ފަރާތަކީ އޭސީސީ ކަމަށްވާއިރު، ޖޮއިންޓް އިންވެސްޓިގޭޝަނެއްގެ ތަހުގީގަށް އޭސީސީގެ މުވައްޒަފުންނާއި ފަންނީ ވަސީލަތްތައް އެންމެ ފުރިހަމަ ގޮތުގައި ބޭނުންކުރުމުގެ އިންތިޒާމްތައް ހަމަޖައްސައި ދިނުމަށް އޭސީސީގައި އެދުމަށް މަޖިލީހުން ފާސްކުރި ރިޕޯޓުގައިވެ އެވެ.
"އަދަދު" އަށް އެނގިފައިވާ ގޮތުގައި އޭސީސީން އެސެޓް ރިކަވަރީ ކޮމިޝަނަށް މިހާރު ދޫކޮށްފައިވަނީ ހަ މުވައްޒަފުންނެވެ. އެ މުވައްޒަފުން ވެސް މި މަހުގެ 23 ވަނަ ދުވަހުން ފެށިގެން އޭސީސީގެ އިދާރާގައި މަސައްކަތް ކުރަން އެ ކޮމިޝަންގެ މެމްބަރުން ނިންމައި މިއަދު ވަނީ އެކަން އެސެޓް ރިކަވެރީ ކޮމިޝަނަށް އަންގައިފަ އެވެ.
އެކަމާ ގުޅޭގޮތުން އޭސީސީގެ ރަސްމީ ބަހެއް އަދި ވަނީ ލިބޭގޮތް ނުވެފަ އެވެ.
އެސެޓް ރިކަވަރީ ކޮމިޝަނާއި އޭސީސީން އެއް މަސައްކަތެއް ކުރަން ޖެހޭނީ ފުށުއަރާ ކަމަށް ބުނެ މީގެ ކުރިން ވެސް ވަނީ ފާޑު ކިޔުން އަމާޒުވެފަ އެވެ.
އެމްއެމްޕީއާރުސީގެ ތަހުގީގު ލަސްވުމުގެ ޝަކުވާ ބޮޑުވެފައިވަނިކޮށް މަޖިލީހުން އިސްވެ އެ މައްސަލަ ބަލަން ފަށައި ތުހުމަތު ކުރެވޭ މީހުންގެ ނަންތަކާއެކު ކޮމެޓީ ރިޕޯޓް ރޭ ވަނީ ހާމަކޮށްފަ އެވެ.
