ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ދޫކޮށްލުމަށް ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑޭ)އަށް ފިޔަވަޅު އަޅައިދޭން ޕްރޮސިކިއުޓާ ޖެނަރަލް ހުސެއިން ޝަމީމް، ކުރިމިނަލް ކޯޓުގައި އެދިވަޑައިގެންފި އެވެ.
ވަކި މުއްދަތެއް ނެތް ގޮތަށް އަލީ ވަހީދު ފުރުން މަނާކޮށްފައި އޮތް އަމުރު ކުރިމިނަލް ކޯޓުން ބާތިލްކުރިއިރު، އަޑޭ ވަނީ ހަތަރު މަސް ފަހުން އޭނާ ކޯޓަށް ހާޒިރުވާނެ ކަމުގެ ޔަގީންކަން ދެއްވާފަ އެވެ. އެއީ، ޖިނާއީ އިޖުރާއަތުގެ ގާނޫނުގެ ދަށުން އެއްބަސްވުމެއްގެ ދަށުންނެވެ.
ހުނަރުވެރި ފުޓްބޯޅަ ކުޅުންތެރިޔާ އަޑޭގެ ގާތް އެކުވެރިޔާ އަލީ ވަހީދަށް ފުރުމުގެ އަމުރު ލިބުމާއެކު، އޭނާ ރާއްޖެ ދޫކޮށް ވަނީ ވަޑައިގެންފަ އެވެ. އޭނާ އެނބުރި ރާއްޖެ ވަޑައިގެންފައިނުވާއިރު، އޭނާ ކޯޓަށް ހާޒިރު ނުވެގެން ޕާސްޕޯޓް ދޫކޮށްލި މައްސަލާގެ އިސްތިއުނާފު، ހައިކޯޓާއި ސުޕްރީމް ކޯޓުން ވެސް ވަނީ ބޭރުކޮށްލާފަ އެވެ.
ނަމަވެސް، ސުޕްރީމް ކޯޓުން ވަނީ ޖާމިނުވާ ފަރާތަކީ ޒިންމާދާރުކުރެވޭނެ ފަރާތެއްކަން ފާހަގަކޮށް އެ މަގު އިހްތިޔާރު ކުރުމަށް ދައުލަތަށް އިރުޝާދު ދީފަ އެވެ. އެގޮތުގެ މަތިން ޕްރޮސިކިއުޓާ ޖެނަރަލް ވަނީ ކުރިމިނަލް ކޯޓަށް ސިޓީއެއް ފޮނުއްވާފަ އެވެ.
ޕަބްލިކް ޕްރޮސިކިއުޓާ އަހުމަދު ޝަފީއު "އަދަދު"އަށް ވިދާޅުވި ގޮތުގައި ޕްރޮސިކިއުޓާ ޖެނަރަލް ކުރިމިނަލް ކޯޓަށް ފޮނުއްވި ސިޓީގައި އެދިވަޑައިގެންފައިވަނީ ގާނޫނުގެ ދަށުން ޖާމިނުވި އަސްހަދަށް ފިޔަވަޅު އަޅައިދިނުމަށެވެ. ޖިނާއީ އިޖުރާއަތުގެ ގާނޫނުގެ 64 ވަނަ މާއްދާގެ (ޅ)ގައި ޖާމިނުވާ މީހާ، އިގުރާރާ ހިލާފުވެއްޖެނަމަ ދެވޭނެ އަދަބުތައް ކަނޑައަޅާފައިވަނީ ތިރީގައި މިއޮތް ތަރުތީބަށެވެ.
- އެއް އަހަރު ދުވަހަށްވުރެ ދިގުނޫން މުއްދަތަކަށް ޖަލަށްލުން؛
- ދެ އަހަރު ދުވަހަށްވުރެ ދިގުނޫން މުއްދަތަކަށް ގޭގައި ބަންދުކުރުން؛
- 15,000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާކުރުން؛
- ބަންދުގައި ހުރި މީހަކު ކަފާލާތުގެ އުސޫލުން ދޫކުރުމުގައި، ވަކި މުއްދަތެއް ވަންދެން ޖާމިނު ނުވެވޭނެކަމަށް ކަނޑައެޅުން
މިއިން ކޮންމެ އަދަބެއް ވެސް އިގުރާރާ ހިލާފުވާ މީހާގެ މައްޗަށް ކޯޓަށް ކަނޑައެޅިދާނެ އެވެ.
އަލީ ވަހީދާ ގުޅުވައި އަޑޭ އިގުރާރާ ހިލާފުވެއްޖެ ކަމެއް ނުވަތަ ނޫން ކަމެއް ކަނޑައަޅާނީ ކޯޓުންނެވެ. އަލީ ވަހީދު ބޭރަށް ވަޑައިގެންނެވިތާ ހަތަރު މަސް ވެފައި ނުވާއިރު، އޭގެ ކުރިން އަލީ ވަހީދަށް ކޯޓަށް ހާޒިރުވާން އެންގި ނަމަވެސް، އެއަަށް އިޖާބު ނުދިނުމަކީ އަޑޭ ޒިންމާ އުފުލަން ޖެހޭނެ ކަމެއް ނުވަތަ ނޫން ކަމެއް އަދި ކޯޓަކުން ކަނޑައެއް ނާޅަ އެވެ.
ޝަފީއު އިތުރަށް ވިދާޅުވި ގޮތުގައި ޕްރޮސިކިއުޓާ ޖެނަރަލްގެ ސިޓީގައި އަލީ ވަހީދުގެ މައްސަލާގެ ޝަރީއަތުގެ އަޑުއެހުމެއް ތާވަލުކޮށްދިނުމަށް ވެސް ވަނީ އެދިވަޑައިގެންފަ އެވެ. އެގޮތަށް އެދިވަޑައިގެންނެވީ ޖާމިނުވި އަސްހަދަށް ކޯޓަށް ހާޒިރުވުމުގެ ފުރުސަތު ދެއްވުމުގެ ގޮތުން ކަމަށް ޝަފީއު ވިދާޅުވި އެވެ.
