ކޮވިޑުގެ ދެ ވަނަ ރާޅެއްގައި ހާލަތު ގޯސްވެފައިވާ އިންޑިއާއިން ފެނުނު ކޮވިޑް ފަތުރާ ވައިރަހުގެ އާ ވޭރިއެންޓު 44 ގައުމަކަށް ފެތުރިފައިވާ ކަމަށް ދުނިޔޭގެ ސިއްހަތި ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ޑަބްލިއުއެޗްއޯއިން މިއަދު ބުނީ ބީ.617.1 ގެ ނަން ދީފައިވާ ވޭރިއެންޓު 44 ގައުމަކުން ނެގި 4،500 އަށް ވުރެ ގިނަ ސާމްޕަލުން ފެނިފައިވާ ކަމަށެވެ. އެ ވޭރިއެންޓު އެންމެ ފުރަތަމަ ފެނުނީ މިދިޔަ އޮކްޓޯބަރު މަހު އިންޑިއާއިންނެވެ.
އިންޑިއާގެ ބޭރުން އެ ވޭރިއެންޓުގެ ސަބަބުން އެންމެ ގިނަ ކޭސް ރިޕޯޓުކޮށްފައި ވަނީ އިނގިރޭސި ވިލާތުގަ އެވެ. މި ހަފްތާގެ ކުރީކޮޅު އެ ވޭރިއެންޓަކީ ކަންބޮޑުވާން ޖެހޭ ވޭރިއެންޓެއް ގޮތަށް ޑަބްލިއުއެޗްއޯއިން ކަނޑައެޅި އެވެ.
އިންޑިއާ ވޭރިއެންޓާ އެކު އިނގިރޭސި ވިލާތާއި ބްރެޒިލް އަދި ދެކުނު އެފްރިކާއިން ފެނުނު ވޭރިއެންޓުތައް ވެސް ލިސްޓުކޮށްފައި ވަނީ ކަންބޮޑުވާން ޖެހޭ ވޭރިއެންޓުތަކުގެ ގޮތުގަ އެވެ. މި ވޭރިއެންޓުތަކަކީ އޮރިޖަނަލް ވައިރަހަށް ވުރެ ނުރައްކާތެރި ވައިރަސްތަކެވެ.
އޮރިޖިނަލް ވައިރަހަށް ބަދަލު އައިސްގެން އުފެދިފައިވާ މި ހުރިހާ ވޭރިއެންޓެއް ވެސް މާ ހަލުވިކޮށް ފެތުރި، ބަލިވާ މިންވަރު އިތުރުވެ، ވެކްސިނާއި ބޭހުން ކުރާ އަސަރު ކުޑަ ކުރުވަ އެވެ.
އިންޑިއާއަށް ދިމާވެފައިވާ ކޮވިޑުގެ ދެ ވަނަ ރާޅުގައި ހާލަތު އެހާ ބޮޑަށް ގޯސްވެފައި ވަނީ އެ ވޭރިއެންޓުގެ ސަބަބުން ތޯ ބެލުމުގެ ދިރާސާތައް ދަނީ ކުރަމުންނެވެ.
އިއްޔެ އިންޑިއާގައި 348،421 މީހުން ޕޮޒިޓިވްވެ، 4،205 މީހުން މަރުވި އެވެ. މިއީ އަނެއްކާ ވެސް ރިކޯޑު އަދަދެއްގެ މަރެވެ. އެއާއެކު މަރުވި މީހުންގެ ޖުމްލަ އަދަދު ވަނީ 250،000 އަށް ވުރެ އިތުރުވެފަ އެވެ. އަސްލު އަދަދުތައް އެއަށް ވުރެ މާ މަތިވާނެ ކަމަށް ތަޖުރިބާކާރުން ބުނެ އެވެ.
އިންޑިއާގެ ސަރުކާރުން މީގެ ކުރިން ބުނީ އެ ގައުމުގެ ހާލަތު އެހާ ބޮޑަށް ގޯސްވުމާއި އާ ވޭރިއެންޓާ ގުޅުމެއްވާ ކަމުގެ ހެކި އެބަ ހުރި ކަމަށެވެ. އެކަމަކު އިތުރު ދިރާސާތައް ކުރަން ޖެހޭ ކަމަށް ބުންޏެވެ.
ޑަބްލިއުއެޗްއޯއިން ބުނީ ކޮވިޑާ ދެކޮޅަށް މިހާރު ލިބެން ހުރި ވެކްސިންތަކުން ވެސް އިންޑިއާއިން ފެނުނު ވޭރިއެންޓާ ދެކޮޅަށް މަސައްކަތް ކުރާނެ ކަމަށެވެ. ނަމަވެސް އެ ޖަމިއްޔާގެ ޓެކްނިކަލް ޓީމުން ބުނީ ވެކްސިނުން ލިބޭ ފައިދާ ކުޑަވާ ކަމުގެ ބައެއް ހެކި އެބަ ހުރި ކަމަށެވެ.
