ޒަރޫރީ ބޭނުންތަކުގައި މާލޭ ރަށްރަށަށް ދިއުމުގެ 48 ގަޑިއިރުގެ ކުރިން ހެލްތް ޕްރޮޓެކްޝަން އެޖެންސީ (އެޗްޕީއޭ) އަށް ހުއްދައަށް އެދެންޖެހޭ ގޮތަށް ބަދަލުކޮށްފި އެވެ.
އެޗްއީއޯސީން މިރޭ ބޭއްވި ނޫސްވެރިންގެ ބައްދަލުވުމުގައި އެޓޯލް ޕްރެޕެއާޑްނެސްގެ އެސިސްޓެންޓް ޑިރެކްޓާ އަބްދުﷲ މައުރޫފް ވިދާޅުވީ ރަށްރަށަށް ދިއުމަށް އެދި ފަހުވަގުތު މީހުން އެދެމުން ދާ ކަމަށާއި އެޗްޕީއޭގެ މަސައްކަތްތައް ހުރިގޮތުން ދަތިތަކާ ކުރިމަތިވާ ކަމަށެވެ.
އެހެންވެ ފުރުމުގެ 48 ގަޑިއިރުގެ ކުރިން އަންގަން ޖެހޭގޮތަށް މިއަދުން ފެށިގެން ބަދަލު ކޮށްފައިވާ ކަމަށް އޭނާ ވިދާޅުވި އެވެ.
"މިއަދު ރިކުއެސްޓް ކޮށްފާނެ މިރޭ ފުރަން. އެޗްޕީއޭގެ މަސައްކަތްތައް ހުރިގޮތުން އަޅުގަނޑުމެންނަށް އެހާ ފަސޭހަ ވެގެން ނުދޭ އަދި ރަށްރަށުގެ ކައުންސިލްތައް އެހާ ފަސޭހައެއް ނުވޭ މިގޮތަށް ވަގުތު ކުޑަތަންކޮށް ރިކުއެސްޓް ކުރުމުން،" މައުރޫފް ވިދާޅުވި އެވެ.
ގިނަ އަދަދެއްގެ ބަޔަކު މިހާރު ވެސް ރަށްރަށަށް ދިޔުމަށް އެދޭ ކަމަށާއި ކޮންމެހެން ކުރަން ޖެހޭ ދަތުރުތައް ފިޔަވާ އެހެން ދަތުރުތައް މިހާލަތުގައި ނުކުރުމަށް އިލްތިމާސް ކުރާ ކަމަށް މައުރޫފް ވިދާޅުވި އެވެ.
ކަރަންޓީން އުސޫލުތަކާ މީހުން ހިލާފު ވެގެން ބައެއް ރަށްރަށުގައި ކޮވިޑް ފެތުރޭތީ އެޗްޕީއޭގެ އުސޫލުތަކަށް ކަރަންޓީންވާ މީހުން އަމަލު ކުރުމަށް ވެސް މައުރޫފް އެދިލެއްވި އެވެ. އަދި ދަތުރުމަތީގައި ވެސް އެޗްޕީއޭގެ އުސޫލުތަކަށް އަމަލު ކުރަން އިލްތިމާސް ކުރެއްވި އެވެ.
މައުރޫފް ވިދާޅުވީ ބައެއް ރަށްރަށުގެ ޓާސްކް ފޯސްތައް ރަނގަޅަށް އެކުލަވާލާފައި ނުވާތީ ގޮންޖެހުންތަކާ ކުރިމަތިވާ ކަމަށެވެ. އެގޮތުން އެރަށްރަށުން މީހަކު ޕޮޒިޓިވް ވެގެން ބަލާއިރު ބައެއް ކަންކަން ލަސްވާ ކަމަށް އޭނާ ވިދާޅުވި އެވެ. އެހެންވެ ޓާސްކްފޯސްތައް ރަނގަޅަށް އެކުލަވާލުމަށް އެޗްޕީއޭން އެދޭ ކަމަށް މައުރޫފް ވިދާޅުވި އެވެ.
ރަށްރަށުން ކޮވިޑް ހުއްޓުވުމަށް ހަރަކާތްތެރިވާ ބައެއް މީހުން ސަލާމަތީގޮތުން އަޅަން ޖެހޭ ފިޔަވަޅުތައް ނާޅާތީ ކަރަންޓީން ކުރަން ޖެހޭ ފަހަރުވެސް އަންނަ ކަމަށާއި އެކަމުގެ ސަބަބުން ދަތިތަކާ ކުރިމަތިވާ ކަމަށް ވެސް މައުރޫފް ވިދާޅުވި އެވެ. އެހެންވެ ރައްކާތެރިކަމުގެ ފިޔަވަޅާއެކު ހިދުމަތްތެރިން އުޅުމަށް އޭނާ އެދިލެއްވި އެވެ.
މިއަދު ރާއްޖޭން 1،501 މީހުން ޕޮޒިޓިވް ވެފައިވާއިރު އޭގެ ތެރެއިން މިއަދު ހަވީރު 6:00 އާ ހަމައަށް 24 ގަޑިއިރުގެ ތެރޭގައި ޕޮޒިޓިވް ވެފައިވަނީ 662 މީހުންނެވެ.
ދެން ޕޮޒިޓިވްވި މީހުންގެ ތެރޭގައި މިމަހު ތިން ވަނަ ދުވަހުން ފެށިގެން އާދިއްތަ ދުވަހާ ހަމައަށް ނަގާފައިވާ ސާމްޕަލްތައް ވެސް ހިމެނެ އެވެ. ބެކްލޮގް ސާމްޕަލްތައް 53 ސާމްޕަލަށް މިހާރު ވަނީ މަދުކޮށްފަ އެވެ.
މިއަދު ޕޮޒިޓިވްވި މީހުންނާއެކު މިވަގުތު ރާއްޖޭގައި ކޮވިޑް ޖެހިފައިވާ 11،629 މީހުން އެބަތިއްބެވެ. އޭގެ ތެރެއިން 247 މީހުން ތިބީ ހޮސްޕިޓަލްގައި އެޑްމިޓް ކޮށްފަ އެވެ. އަތޮޅުތެރޭގެ 40 ރަށެއް މޮނީޓަރިންއަށް ލައިފައިވާއިރު އެކްޓިވް ކޭސްގެ ގޮތުގައި 3،103 މީހުން އެބަތިއްބެވެ.
