ގެއެއްގެ ގޯތި ތެރޭގައި ހުރި ކުކުޅު ކޮށްޓަކުން ހުދުކުލައިގެ ކުކުޅަކާއި ރަތްކުލައިގެ ހާލެއް ވަގަށް ނެގި މީހަކު 21،600 ރުފިޔާއިން ކުރިމިނަލް ކޯޓުން ޖޫރިމަނާކޮށްފި އެވެ.
މިދިޔަ މަހުގެ ތެރޭގައި ހިނގި މި ވައްކަމަށް ދައުވާ ލިބޭ މީހާ ވަނީ އިއުތިރާފުވެފަ އެވެ. އޭނާ ވައްކަން ކުރި ކަމަށް އެއްބަސްވާތީ، މައްސަލަ ކުރިއަށް ގެންގޮސްފައިވަނީ އަވަސް ނިޔާގެ މައްސަލައެއްގެ ގޮތުންނެވެ.
އަވަސް ނިޔާގެ މައްސަލަތައް އިއުތިރާފުވާތާ ފަސް ދުވަހުގެ ތެރޭގައި ނިންމަން ޖެހެ އެވެ.
އެގޮތުން، ޝަރީއަތުން ވަނީ އޭނާގެ އިއުތިރާފަށް ބަލައި، އޭނާގެ މައްޗަށް ކުށް ސާބިތުވާ ކަމަށް ކަނޑައަޅާފަ އެވެ. އޭގެ ފަހުން އަދަބާ ގުޅޭ ގޮތުން ވާހަކަ ދެއްކި އެވެ.
ދައުލަތުން ބުނެފައިވާ ގޮތުގައި، ކުށަށް އިއުތިރާފުވެފައިވާތީ، އަދަބުގެ ދަރަޖަ ދަށްކުރުމަށްފަހު ކަނޑައެޅޭނެ އަދަބަކީ ތިން މަހާއި އަށާރަ ދުވަހުގެ ޖަލު ހުކުމެއް ކަމަށެވެ.
ދައުވާ ލިބޭ މީހާ އެދިފައިވަނީ އޭނާގެ އަދަބު ލުއިކޮށް ދިނުމަށެވެ. އެގޮތުން އޭނާއަކީ ކަންނެލި މަސްވެރިކަން ކުރާ މީހެއް ކަމާއި ދައްތައަކީ ވިޔަފާރިއެއް ހިންގާ މީހެއް ކަމުން ލުއި ގޮތެއްގެ މަތިން ޖޫރިމަނާގެ އަދަބަކަށް ބަދަލުކޮށްދިނުމަށެވެ.
ދެ ފަރާތުގެ ވާހަކަތަކަށްފަހު، ޝަރީއަތުން ކަނޑައަޅާފައިވަނީ މި މައްސަލާގެ ތަންފީޒުކުރަން ޖެހޭ އަދަބަކީ ތިން މަހާއި އަށާރަ ދުވަހުގެ ޖަލު ހުކުމެއް ނަމަވެސް، ޖޫރިމަނާގެ އަދަބަކަށް ބަދަލުކުރުމަށެވެ.
އެގޮތުން ހުކުމްގައި ބުނެފައިވަނީ މިފަދަ ކުށްތަކުގައި ޖަލަށްލުމަށް އަދަބު ކަނޑައެޅުމުން، ދައުލަތުގެ މައްޗަށް އޮންނާނެ މާލީ އަދި އިދާރީ ބުރައަށާއި ދައުވާ ލިބޭ މީހާގެ ކުށުގެ ވެށިން ދުރުވުމަށް ބާރު އެޅޭ މިންވަރަށް ރިއާޔަތްކުރާއިރު ޖަލު އަދަބު ކަނޑައެޅުމުގެ މަސްލަހަތަށްވުރެ އެ ނޫން އަދަބެއް ކަނޑައެޅުމުގެ މަސްލަހަތު ބޮޑު ކަމަށެވެ.
އެހެންވެ، ފަނޑިޔާރަށް ލިބޭ އިހްތިޔާރީ ބާރުގެ ދަށުން ޖަލު އަދަބު، ޖޫރިމަނާއަށް ގާނޫނުގައިވާ ހަމައިން ބަދަލުކުރުމުން އަރަނީ 21،600 ރުފިޔާކަން ހުކުމްގައި ފާހަގަކުރި އެވެ.
އެ ޖޫރިމަނާ ހަތަރު މަސް ތެރޭ ދައްކާ ހަލާސް ކުރުމަށް ގާޒީ މުހައްމަދު މިސްބާހު ކުރެއްވި ހުކުމްގައި އަމުރު ކުރައްވާފައިވެ އެވެ.
