މިދިޔަ އަހަރު އިންޑިއާއިން ފެނުނު ކޮރޯނާވައިރަހުގެ އާ ވޭރިއެންޓަކީ "ދުނިޔެއިން ކަންބޮޑުވާން ޖެހޭ" ވޭރިއެންޓެއްގެ ގޮތުގައި ދުނިޔޭގެ ސިއްހަތު ޖަމިއްޔާ (ޑަބްލިއުޗްއޯ)އިން ކަނޑައަޅައިފި އެވެ.
މިހާތަނަށް ހެދި ދިރާސާތަކުން ދައްކާ ގޮތުގައި ބީ.617.1 ވޭރިއެންޓު އެހެން ވޭރިއެންޓުތަކަށް ވުރެ މާ ހަލުވިކަމާ އެކު ފެތުރޭ ކަމަށް ޑަބްލިއުއެޗްއޯއިން ބުންޏެވެ. އަދި އެ ވޭރިއެންޓާ ގުޅޭ މައުލޫމާތު ސާފު ކުރަން އިތުރު ދިރާސާތަކެއް ހަދަން ޖެހޭ ކަމަށް ބުންޏެވެ.
ޑަބްލިއުއެޗްއޯއިން ބުނީ މިހާރު ދުނިޔޭގެ 30 ގައުމަކަށް އެ ވޭރިއެންޓު ފެތުރިފައިވާ ކަމަށެވެ.
އެ ވޭރިއެންޓުގެ އިތުރުން އިތުރު ތިން ގައުމަކުން ފެނުނު ވޭރިއެންޓަކީ ވެސް "ދުނިޔެއިން ކަންބޮޑުވާން ޖެހޭ" ވޭރިއެންޓުތަކެއްގެ ގޮތުގައި މީގެ ކުރިން ކަނޑައަޅާފައި ވެއެވެ. އެއީ އިނގިރޭސި ވިލާތް، ދެކުނު އެފްރިކާ އަދި ބްރެޒިލުން ފެނުނު ވޭރިއެންޓެވެ.
މީގެ ކުރިން އިންޑިއާ ވޭރިއެންޓު ފާހަގަކުރީ "ވޭރިއެންޓް އޮފް އިންޓްރެސް" އެއްގެ ގޮތުގަ އެވެ. "ވޭރިއެންޓް އޮފް ކޮންސާން" ގެ ދަރަޖައަށް ބަދަލު ކުރީ އެ ކެޓަގަރީއަށް ބޭނުންވާ ޝަރުތުތަކުގެ ތެރެއިން މަދުވެގެން އެއް ކަންތައް ފުރިހަމަ ވާތީ އެވެ.
އެގޮތުން ކަންބޮޑުވާން ޖެހޭ ވޭރިއެންޓެއްގެ ޝަރުތުތަކުގެ ތެރޭގައި ހަލުވިކަމާއެކު ފެތުރުމާއި، މާ ބޮޑަށް ބަލިވާން މެދުވެރިމާއި، އެންޓިބޮޑީ ނިއުޓްރަލައިޒްވުން ކުޑަވުމާއި، ފަރުވާ އާއި ވެކްސިނުން ކުރާ އަސަރު ކުޑަވުން ހިމެނެ އެވެ.
އިންޑިއާއަށް ދިމާވެފައިވާ ކޮވިޑުގެ ދެ ވަނަ ރާޅުގައި ހާލަތު އެހާ ބޮޑަށް ގޯސްވެފައި ވަނީ އެ ވޭރިއެންޓުގެ ސަބަބުން ތޯ ބެލުމުގެ ދިރާސާތައް ދަނީ ކުރަމުންނެވެ.
އިއްޔެ އިންޑިއާގައި 366،161 މީހުން ޕޮޒިޓިވްވެ، 3،754 މީހުން މަރުވި އެވެ. އަސްލު އަދަދުތައް އެއަށް ވުރެ މާ މަތިވާނެ ކަމަށް ތަޖުރިބާކާރުން ބުނެ އެވެ.
އިންޑިއާގެ ސަރުކާރުން މީގެ ކުރިން ބުނީ އެ ގައުމުގެ ހާލަތު އެހާ ބޮޑަށް ގޯސްވުމާއި އާ ވޭރިއެންޓާ ގުޅުމެއްވާ ކަމުގެ ހެކި އެބަ ހުރި ކަމަށެވެ. އެކަމަކު އިތުރު ދިރާސާތައް ކުރަން ޖެހޭ ކަމަށް ބުންޏެވެ.
ޑަބްލިއުއެޗްއޯއިން ބުނީ ކޮވިޑާ ދެކޮޅަށް މިހާރު ލިބެން ހުރި ވެކްސިންތަކުން ވެސް އިންޑިއާއިން ފެނުނު ވޭރިއެންޓާ ދެކޮޅަށް މަސައްކަތް ކުރާނެ ކަމަށެވެ. ނަމަވެސް އިއްޔެގެ ޕްރެސް ކޮންފަރެންސްގައި އެ ޖަމިއްޔާގެ ޓެކްނިކަލް ޓީމުން ބުނީ ވެކްސިނުން ލިބޭ ފައިދާ ކުޑަވާ ކަމުގެ ބައެއް ހެކި އެބަ ހުރި ކަމަށެވެ.
