މަރުވެއިފައިވާ 40 މީހެއްގެ ހަށިގަނޑު އުތުރު އިންޑިއާގެ ގަންގާ ކޯރުގެ އައްސޭރި ފަށަށް ލައްގާފައިވާ ކަމަށް އެ ގައުމުގެ އޮފިޝަލުން ބުނެފި އެވެ.
ހަށިގަނޑުތައް ލައްގާފައިވަނީ ބިހާރް އާއި އުއްތަރް ޕްރަދޭޝް ސްޓޭޓް ގުޅޭ ހިސާބުންނެވެ. ހަށިތައް ލައްގަނީ ކީއްވެގެންކަން ސާފު ނުވި ނަމަވެސް އިންޑިއާގެ ނޫސްތަކުން ބުނަނީ އެއީ ކޮވިޑު ޖެހިގެން މަރުވި މީހުންގެ ގޮތުގައި ބެލެވޭ ކަމަށެވެ.
ބައެއް މީޑިއާ ރިޕޯޓުތައް ބުނާ ގޮތުން 100 މީހުންގެ ހަށިގަނޑު ލައްގާފައި ވެއެވެ. އަދި ހަށިގަނޑަށް އައިސްފައިވާ ބަދަލަށް ބަލާފައި ކޯރުގެ ތެރޭގައި ގިނަ ދުވަސްތަކެއް ވެފައި ވުން އެކަށީގެންވާ ކަމަށް ވެ އެވެ.
އެގޮތުން ލައްގާފައިވާ ގިނަ މީހުންގެ ހަށިގަނޑު ހުރީ ފުއްޕާފައި ކަމަށާއި އަނދާފައި ހުރި ކަމުގެ ނިޝާންތައް ވެސް އެބަ ހުރި ކަމަށެވެ. އެހެންކަމުން މިއީ ކޮވިޑު ޖެހިގެން މަރުވި މީހުންގެ ހަށިތައް ރަނގަޅަށް އަންދާފައި ނުވާތީ ދިމާވެގެން އުޅޭ ކަމެއް ކަމަށް ބެލެވެ އެވެ.
އުއްތަރު ޕްރަދޭޝްގައި ކޮވިޑު ޖެހިގެން މަރުވާ މީހުން އަންދަމުން ދަނީ ގަންގާ ކޯރުގެ އައްސޭރި ފަށުގަ އެވެ. އޮފިޝަލުން ބުނީ މިއީ އެ ސްޓޭޓަށް ނިސްބަތްވާ ބަޔެއްގެ ހަށިގަނޑުތަކަށް ވެދާނެ ކަމަށެވެ. އެއީ އިންޑިއާގެ އެންމެ އާބާދީ ބޮޑު ސްޓޭޓެވެ.
ލައްގަމުންދާ ހަށިގަނޑުތައް ނެގުމަށް ފަހު ވަޅުލާން ނުވަތަ އަންދާލަން ނިންމާފައިވާ ކަމަށް އޮފިޝަލުން ބުނެ އެވެ.
ކޮވިޑުގެ ދެ ވަނަ ރާޅެއްގައި ގިނަ ބަޔަކަށް ފަރުވާ ނުލިބި އިންޑިއާގައި މަރުވަމުން ދާއިރު، މި ވަގުތު ދުނިޔެއަށް ދިމާވެފައިވާ ބަލިމަޑުކަމުގެ އެންމެ ހާލަތު ގޯސް ގައުމަކީ އިންޑިއާ އެވެ.
އިންޑިއާގައި މިހާތަނަށް 22.6 މިލިއަން މީހުންނަށް ކޮވިޑު ޖެހިފައި ވާއިރު، 246،116 މީހުން މަރުވެފައިވާ ކަމަށް ރަސްމީ ތަފާސްހިސާބުން ދައްކަ އެވެ. ނަމަވެސް އަސްލު އަދަދުތައް އެއަށްވުރެ މާ މަތިވާނެ ކަމަށް ބެލެވެ އެވެ.
