މެޑްރިޑް (މެއި 10) - ސްޕެނިޝް ލީގުގައި މިރޭ ފަހު ވަގުތު ސެވިއްޔާއާ 2-2 އިން އެއްވަރުކޮށް ރެެއާލް މެޑްރިޑުން ޕޮއިންޓެއް ހޯދި ނަމަވެސް ލީގު ހޯދުމުގެ އަމިއްލަ ބާރު އެ ޓީމަށް ގެއްލިއްޖެ އެވެ.
ލީގުގައި ރޭ އެއް ވަނައިގައި އޮތް އެތުލެޓިކޯ މެޑްރިޑް ކުޅުނު މެޗުން ލީގުގެ ރޭހުގައި ވާދަކުރަމުން އަންނަ ބާސެލޯނާއާ އެއްވަރުވުމުން މިރޭ ސެވިއްޔާ ބަލިކޮށްގެން ލީގުގެ އެއް ވަނަ އަށް އެރުމުގެ ފުރުސަތު ރެއާލަށް އޮތީ ހުޅުވިފަ އެވެ. އެކަމަކު އެއްވަރުވުމުން އެ ފުރުސަތު ގެއްލުނީ އެވެ.
ލީގުގެ ރޭހުގައި އޮތް ހަތަރު ޓީމަށް ވެސް ބާކީ އޮތީ ތިން މެޗެވެ. މީގެއިން ކޮންމެ ޓީމެއް ވެސް ތިން މެޗު ކުޅެފައިވާއިރު، އެތުލެޓިކޯ އެއް ވަނައިގައި އޮތީ 77 ޕޮއިންޓް ހޯދައިގެންނެވެ. ދެ ވަނައިގައި އޮތް ރެއާލާއި ތިން ވަނައިގައި އޮތް ބާސެލޯނާގެ އޮތީ 75 ޕޮއިންޓެވެ. ރެއާލަށް ކުރި ލިބެނީ ހެޑް ޓު ހެޑް ގަވާއިދުންނެވެ. ސެވިއްޔާ ހަތަރެއްގައި އޮތީ 71 ޕޮއިންޓާ އެކު އެވެ.
ރެއާލާއި ބާސެލޯނާ އަށް ދެން ލީގު ލިބޭނީ އެތުލެޓިކޯ އަތުން ޕޮއިންޓް ގެއްލިގެންނެވެ. ތިން މެޗުން މޮޅުވެގެން އެތުލެޓިކޯ އަށް ލީގު ތަށި އުފުލާލެވޭނެ އެވެ.
ރެއާލުން މިރޭގެ މެޗުގެ 12 ވަނަ މިނިޓްގައި ގޯލެއް ޖެހި އެވެ. އެކަމަކު ކަރިމް ބެންޒެމާ ޖެހި މި ގޯލު ބަލައިނުގަންނަން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެޓޭކްގައި ބައިވެރިވި ރެއާލްގެ އަލްވާރޯ އޮޑްރިއޮޒޯލާ އޮފްސައިޑްގައި ހުރުމުންނެވެ. ސެވިއްޔާ އިން ލީޑުނެގީ 22 ވަނަ މިނިޓްގައި ފެނާންޑޯ ޖެހި ގޯލުންނެެވެ. އިވާން ރަކިޓިޗް ދިން ބޯޅަ ފެނާންޑޯ ވަނީ ހަމަޖެހިލާފައި ގޯލުގެ ތެރެއަށް ފޮނުވާލައިފަ އެވެ.
ބަދަލު ކުޅުންތެރިއެއްގެ ގޮތުގައި ކުޅެން އެރި އަސެންސިއޯ ރެއާލަށް އެއްވަރުކޮށްދިނީ މެޗުގެ 67 ވަަނަ މިނިޓްގަ އެވެ. މިއީ ޓޯނީ ކްރޫސް ދިން ބޯޅައަކުން އަސެންސިއޯ ޖެހި ގޯލެކެވެ.
ސެވިއްޔާ އިން ދެ ވަަނަ ފަހަރަށް ލީޑުނެގީ މެޗުގެ 78 ވަނަ މިނިޓްގައި ޕެނަލްޓީ އަކުން ރަކިޓިޗް ޖެހި ގޯލުންނެވެ. މި ޕެނަލްޓީ ދޭން ނިންމީ ރެއާލްގެ އެޑާ މިލިޓާއޯ އަތުގައި ބޯޅައިން ޖެހުމުން ވީއޭއާރް އިން ބެލުމަށް ފަހު އެވެ. އޭގެ އިރުކޮޅެއް ކުރިން ރެއާލަށް ދޭން ނިންމި ޕެނަލްޓީއެއްގެ ނިންމުން ވަނީ ބަދަލުކޮށްފަ އެވެ.
އިތުރު ވަގުތުގެ ގޮތުގައި ދެއްކި ހަ މިނިޓްގެ ތެރެއިން ހަތަރު ވަނަ މިނިޓްގައި ރެއާލުން އެއްވަރުކުރި ގޯލު ޖެހި އެވެ. މިއީ ސެވިއްޔާގެ ޑިފެންޑަރު ޑިއޭގޯ ކާލޯސް އަތުން ބައިކޮޅަށް ވަން ގޯލެއް ކަމަށް ކަނޑައެޅި ނަމަވެސް މި ގޯލުގެ ކްރެޑިޓް ހައްގީ ކްރޫސް އަށެވެ. ކްރޫސް ޖެހި ބޯޅަ ގޯލަށް ވަނީ ކާލޯސް ފައިގައި ޖެހިފަ އެވެ. އޭގެ ފަހުން ރެއާލް މޮޅުކޮށްދޭން ކަަސެމީރޯ ޖެހި ޝޮޓް ދިޔައީ ދަނޑިކައިރިން ބޭރުންނެވެ.
މެޗަށް ފަހު ރެއާލްގެ ކްރޫސާއި އެ ޓީމުގެ ކޯޗު ޒިނެދިން ޒިދާން ވަނީ ރެފްރީގެ ބައެއް ނިންމުންތަކާ މެދު ހިތްހަމަނުޖެހުން ފާޅުކޮށްފަ އެވެ.
