ކޮވިޑުން ރައްކާތެރިވުމަށް "ހާއްސަ ފިޔަވަޅުތަކާ އެކު" މި އަހަރުގެ ހައްޖުގެ އަޅުކަން ބާއްވާނެ ކަމަށް ސައުދީ އަރަބިއްޔާގެ ހައްޖު އެންޑް އުމްރާ މިނިސްޓްރީގެ ތަރުޖަމާނު އިއުލާނު ކުރައްވައިފި އެވެ.
"ސައުދީ އަރަބިއްޔާގެ ސިއްހީ އިދާރާތަކުން ދަނީ ހާލަތު މޮނީޓާކޮށް، އެންމެންގެ ރައްކާތެރިކަމަށްޓަކައި އަޅަން ޖެހޭ ފިޔަވަޅުތައް އަޅަމުން،" ޕްރެސް ކޮންފަރެންސެއްގައި ތަރުޖަމާނު ވިދާޅުވި ކަމަށް އަލް އަރަބިއްޔާ ނޫހުގައި ވެ އެވެ.
މި އަހަރުގެ ހައްޖުގެ އަޅުކަން ކުރިއަށް ދާނެ ގޮތުގެ ހާއްސަ އިންތިޒާމުތަކާ ބެހޭ މައުލޫމާތު ފަހުން ހާމަކުރާނެ ކަމަށް ވެސް ތަރުޖަމާނު ވިދާޅުވި އެވެ.
މިދިޔަ އަހަރު ހައްޖުގެ އަޅުކަން އަދާ ކުރުމުގެ ފުރުސަތު ލިބުނީ ހަމައެކަނި ސައުދީ އަރަބިއްޔާގައި ދިރިއުޅޭ ޝަރުތު ހަމަވާ ވަކި އަދަދެއްގެ މީހުންނަށެވެ.
އެގޮތުން ޝަރުތު ހަމަވާ މީހުންގެ ތެރެއިން ފުރުސަތު ލިބޭ މީހުން ހޮވީ ގުރުއަތަކުންނެވެ. ގުރުއަތުލާފައި ވަނީ އެކަމަށް ހާއްސަ އެޕްލިކޭޝަނަކުންނެވެ.
ގުރުއަތުން ހޮވުނު މީހުން މައްކާއަށް ފުރުމުގެ ކުރިން ގޭގައި ހަތް ދުވަސް އައިސޮލޭޓް ވާން ޖެހުނެވެ. އޭގެ ފަހުން އަޅުކަން ފެށެން ދެން ކަނޑައެޅިފައިވާ ހޮޓަލެއްގައި ކަރަންޓީނު ވާން ވެސް ޖެހުނެވެ.
ހައްޖުވެރިން އެކި ތަންތަނަށް ދަތުރު ކުރީ ކުފި ގްރޫޕުތަކުގަ އެވެ. ކޮންމެ 50 މީހެއްގެ ގްރޫޕަކަށް ހާއްސަ ސިއްހީ ލީޑަރެއް ހުއްޓެވެ. އޭނާގެ ޒިންމާއަކީ ގްރޫޕް މެމްބަރުންގެ މެދުގައި މާސްކު އެޅުމާއި ގައިދުރުކަން ބެހެއްޓުން ފަދަ ރައްކާތެރިކަމުގެ ފިޔަވަޅުތައް ތަންފީޒު ކުރޭތޯ ބެލުމެވެ.
މި އަހަރު ވެސް ބެލެވޭ ގޮތުގައި ހައްޖުގެ އަޅުކަމުގައި ބައިވެރިވެވޭނީ ހަމައެކަނި ސައުދީ އަރަބިއްޔާގައި ދިރިއުޅޭ އެ ގައުމުގެ ރައްޔިތުންނާއި އެހެން ގައުމުތަކުގެ ރައްޔިތުންނަށް ކަމަށް ރޮއިޓާޒް އިން ހަބަރު ފަތުރާފައި ވެއެވެ.
އެގޮތުން މި އަހަރު ކަނޑައަޅާ ޝަރުތުތަކުގެ ތެރޭގައި ކޮވިޑް ވެކްސިން ފުރިހަމަކޮށްފައިވުމާއި ކޮވިޑް ޖެހި ރަނގަޅުވިތާ ހަ މަސް ނުވުން ހިމެނޭ ކަމަށް ރޮއިޓާޒް އިން ބުންޏެވެ.
އެހެން ގައުމުތަކުން ދަތުރު ކުރާ މީހުންނަށް ހައްޖުގެ އަޅުކަން އަދާ ކުރުމުގެ ފުރުސަތު ދިނުމާ މެދު ސައުދީ އަރަބިއްޔާއިން ދެ ވަނަ ވިސްނުމަކަށް ދިޔެއީ ވެކްސިން މަސައްކަތް ކުރާ މިންވަރާއި ވޭރިއެންޓުތަކުގެ ސަބަބުން ކަމަށް އެ ނޫހުން ބުންޏެވެ.
މި އަހަރު ހައްޖު ދިމާވަނީ ޖުލައި 19 ވަނަ ދުވަހާ އެވެ. އާއްމުކޮށް ދެ މިލިއަނަށް ވުރެ ގިނަ މީހުން ހައްޖުގެ އަޅުކަން އަދާ ކުރި ނަމަވެސް ކޮވިޑާ ގުޅިގެން މިދިޔަ އަހަރު އެ ފުރުސަތު ލިބުނީ 10،000 މީހުންނަށެވެ.
