ޗައިނާއިން މިދިޔަ މަހު ފަހުކޮޅު ޖައްވަށް ފޮނުވި ބިޔަ ރޮކެޓުގެ ބައިތައް ރާއްޖެ ސަރަހައްދަށް ވެއްޓިފައިވާ ކަމުގެ ރިޕޯޓް ލިބުމާއެކު، "ވިޒިޓް މޯލްޑިވްސް"އޭ ކަމަށް ވިދާޅުވެ ޓޫރިޒަމް މިނިސްޓަރު އަބްދުﷲ މައުސޫމް ކުރެއްވި ޓްވީޓަށް ފާޑުކިޔުން އަމާޒުވެއްޖެ އެވެ.
ދިގު މިނުގައި 108 ފޫޓު އަދި ބަރުދަނުގައި 40،000 ޕައުންޑު ހުންނަ ލޯންގް މާޗް ބީ5 ރޮކެޓުގެ ތެޔޮ ހުސްވުމުން އަނބުރާ ދުނިޔެއަށް މިސްރާބު ޖަހާފައިވާއިރު، މިއަދުގެ ހެނދުނުގެ ވަގުތެއްގައި އެ ރޮކެޓުގެ ބައިތައް ވެއްޓިފައިވަނީ ދ. އަތޮޅުގެ ހުޅަނގަށް ކަމަށް ސްޕޭސް ޑޭޓާ ޓްރެކިން އިން ދައްކަ އެވެ. އެކަމަކު އޭގެން އެއްވެސް ބައެއް ދ. އަތޮޅުގެ އެއްވެސް ރަށަކަށް އަމާޒުވި ކަމުގެ މައުލޫމާތެއް އަދި ނުލިބެ އެވެ.
އެކަން ޗައިނާގެ ސްޕޭސް އޮފީހުން ރިޕޯޓްކުރުމާއެކު މިނިސްޓަރު މައުސޫމް ޓްވީޓް ކުރައްވައި ވިދާޅުވީ، ވެއްޓުނު ރޮކެޓާއެކު ރާއްޖޭގެ ނަން މީގެކުރިން ފާހަގަވެގެން ނުދާ މިންވަރަށް ޓްރެންޑްވެގެން ގޮސްފައިވާ ކަމަށެވެ. އެއަށްފަހު "ވިޒިޓްމޯލްޑިވްސް" ހޭޝްޓެގް މިނިސްޓަރު ބޭނުން ކުރެއްވި އެވެ.
މައުސޫމް ކުރައްވައި ޑިލީޓް ކުރައްވާފައިވާ ދެ ޓްވީޓް --
އެެއާކު، ޓްވިޓާގައި މައުސޫމަށް ވަރަށް ބޮޑަށް ފާޑުކިޔުންތައް އަމާޒުވެގެން ދިޔައީ އެފަދަ ވަގުތެއްގައި ވެސް ރާއްޖެ، އިޝްތިހާރެއްގެ ގޮތުގައި ބޭނުން ކުރި ކަމަށް ބުނެ އެވެ.
އަދި، އެކަމުގެ ސަބަބުން މީހަކަށް ނުވަތަ ރަށަކަށް އަދި ތިމާވެއްޓަށް ވެސް ގެއްލުމުގެ ފުރުސަތު އޮތްއިރު އެއިން އެއްވެސް ކަމަކަށް ބެއްލެވުމެއް ނެތި ޖޯޝުގައި ޓްވީޓް ކުރެއްވި ކަމަށް ބުނެ އެވެ.
"ޓޫރިޒަމް މިނިސްޓަރު އެހާވަރަށް ޑެސްޕަރެޓް ވެގެން ނުވާނެ ރާއްޖެ އިސްތިހާރު ކުރަން، އަހަރެމެން ބޭނުން ވަނީ މިއީ ރީތި ހިތްގައިމު ހޮލިޑޭ ޑެސްޓިނޭޝަނެއްގެ ގޮތުގައި މީހުންނަށް ރާއްޖެ އެނގިގެން ދިޔުން، ޗައިނާގެ ރޮކެޓް އޮޅިގެން ވެއްޓުނު ގައުމުގެ ގޮތުގައެއް ނޫން،" މީހަކު ޓުވީޓް ކޮށްފައިވެ އެވެ.
މޯލްޑިވިއަންގެ ޑެޕިއުޓީ އެމްޑީ އައިޝަތު ޖެނީފާ، މިނިސްޓަރާ ސުވާލު ކުރެއްވީ ވެއްޓުނު ރޮކެޓްގެ ބައިތައް ބަލަން ޓޫރިސްޓުން ރާއްޖެ އައުމަށް އުއްމީދު ކުރަނީތޯ އެވެ.
"ޒިންމާދާރުކަން ކުޑަ، މިއީ ދިވެހިންނަށް ވާނެ އެންމެ ގޯސް،" އޭނާގެ ޓްވީޓްގައިވެ އެވެ.
މައްސަލަ ހޫނުވުމާއެކު، މައުސޫމް އެންމެ ފުރަތަމަ މަސައްކަތް ކުރައްވާފައިވަނީ ކުރީގެ ޓްވީޓް މާނަކޮށްދިނުމަށެވެ. އެގޮތުން، އޭނާ ވިދާޅުވީ އޭނާ ވިދާޅުވާން ގަސްދުކުރި ވާހަކައަކީ ރާއްޖެ އައުމަށް ބޭނުންވާ މީހުންނަށް މިހާރު ދުނިޔޭގެ މެޕުން ރާއްޖެ ވަރަށް ސާފުކަން ކަމެވެ. އަދި، މިކަމުގެ ސަބަބުން ތިމާވެއްޓަށް ގެއްލުމެއް ލިބިފައިވޭތޯ ކަށަވަރު ކުރަންވާނެ ކަމަށް ވެސް ލިބުނު ފާޑުކިޔުންތަކާއެކު ވިދާޅުވެފައިވެ އެވެ.
އޭގެފަހުން އެ ހުރިހާ ޓްވީޓްތަކެއް ޑިލީޓް ކުރެއްވުމަށްފަހު، މައުސޫމް ވަނީ މައާފަށް އެދިވަޑައިގެންފަ އެވެ.
"މޯލްޑިވްސް، ޓްރެންޑްވުމާ ގުޅޭ ގޮތުން އަޅުގަނޑު ކުރި ޓްވީޓާމެދު ބައެއް ފަރާތްތަކުން ހިތްހަމަނުޖެހުންތައް ހުރުމުން އެ ޓްވީޓް ޑިލީޓްކޮށްފިން، ވަރަށް މާފަށް އެދެން،" މައުސޫމްގެ ފަހުގެ ޓްވީޓްގައިވެ އެވެ.
ރާއްޖޭގެ ސަރަަހައްދަށް ރޮކެޓްގެ ބައިތަކެއް ވެއްޓިފައިވާއިރު، މިދިޔަ އަހަރު ލޯންގް މާޗް ބީ5 ރޮކެޓެއްގެ ބައިތައް އައިވަރީ ކޯސްޓުގެ ވިލެޖަކަށް ވެއްޓިގެން ބޮޑެތި ގެއްލުންތައް ލިބުނެވެ. ނަމަވެސް، އެ ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެ އެވެ.
ރާއްޖެއަށް ރޮކެޓްގެ ބައިތައް ވެއްޓިފައިވާ ކަމަށް ޗައިނާގެ ސްޕޭސް އޮފީހުން ބުނެފައިވާއިރު، ކޯސްޓުގާޑުން އެކަން ބަލަމުން އަންނަ ކަމަށް އެމްއެންޑީއެފުން ވަނީ ބުނެފަ އެވެ.
