ކޮވިޑް ބަލީގައި އިތުރު މީހަކު މަރުވެއްޖެ އެވެ.
އެޗްޕީއޭން އާންމުކުރި ގޮތުގައި، އެ ބަލީގައި މަރުވެފައިވަނީ މިއަދު ފަތިހު 04:45 ހާއިރު އައިޖީއެމްއެޗް އެމެޖެންސީއަށް ގެންދިޔަ އުމުރުން 51 އަހަރުގެ އަންހެނެއް ކަމަށެވެ.
މިއީ މި ބަލީގައި މަރުވި 84 ވަނަ މީހާ އެވެ.
މެއި ހަވަނަ ދުވަހު ކޮވިޑް ބަލީގައި ހަ މީހަކު މަރުވެފައިވެ އެވެ. އެއީ ކޮވިޑް ފެތުރެން ފެށިފަހުން ރާއްޖޭގައި އެންމެ ގިނަ މީހުން އެއް ދުވަހެއްގައި މަރުވި ދުވަހެވެ.
ކޮވިޑްގެ ހާލަތު ރާއްޖޭގައި މީގެކުރިން ގޯސް ނުވާ މިންވަރަށް ގޮސްފައިވާއިރު މިދިޔަ 24 ގަޑިއިރު ތެރޭގައި ވެސް 590 މީހުންނަށް ބަލި ޖެހިފައިވެ އެވެ. މި ރޭޓްގައި ބަލި ޖެހޭތާ ހަފްތާއެއްހާ ދުވަސް ވަނީ ވެފަ އެވެ.
މާލޭގެ އިތުރުން ރަށްރަށުގައި ވެސް ބަލި ފެތުރެމުންދާއިރު، ޖުމްލަ 29 ރަށެއް މިހާރު ވެސް އޮތީ އަރާފޭބުން މަނާކޮށް މޮނީޓަރިންގެ ހާލަތުގަ އެވެ. އަދި މާލެ ސަރަހައްދުގެ އިތުރުން ބައެއް ރަށްރަށުގައި ކޮންމެ ރެއަކު ނުވައަކުން ފަތިހު ހަތަރަކަށް ކާފިއު ދަނީ ހިނގަމުންނެވެ.
