ޔޫއަޕިއަން ޔޫނިއަން (އީޔޫ) އާއި އިންޑިއާއާ ދެމެދު މިނިވަން ވިޔަފާރީ އެއްބަސްވުމެއް ގާއިމް ކުރުމުގެ މަޝްވަރާތައް އަލުން ފަށަން ނިންމައިފި އެވެ.
އިންޑިއާގެ ބޮޑު ވަޒީރު ނަރެންދްރަ މޯދީ އާއި އީޔޫގެ 27 ގައުމުގެ ލީޑަރުން އިއްޔެ ވަނީ ވީޑިއޯ ކޮންފަރެންސް މެދުވެރިކޮށް ބައްދަލުކުރައްވާފަ އެވެ.
މީގެ ކުރިން އިންޑިއާ އާއި އީޔޫއާ ދެމެދު އޮންނަ ބައްދަވުންތަކުގައި ބައިވެރިވަނީ ހަމައެކަނި އިންޑިއާގެ ބޮޑު ވަޒީރާއި އީޔޫގެ ޗީފް އެގްޒެކްޓިވް އަދި ޗެއާމަނެވެ.
އެހެންކަމުން މި ފަހަރުގެ ބައްދަލުވުމުގައި ހުރިހާ ގައުމެއްގެ ލީޑަރުން ބައިވެރިވެ ވަޑައިގަތުން ރަމްޒުކޮށްދެނީ އީޔޫއިން އިންޑިއާއާ އެކު ވިޔަފާރީގެ ގުޅުން ފުޅާކުރަން ބޭނުންވާ މިންވަރެވެ.
"އަޅުގަނޑުމެން އެއްބަސްވީ މިނިވަން ވިޔަފާރީ އެއްބަސްވުމުގެ މަޝްވަރާތައް އަލުން ފަށަން،" މަޝްވަރާއަށް ފަހު ނެރުނު ޖޮއިންޓް ބަޔާނުގައި ވެއެވެ.
އޭގެ އިތުރުން އިންވެސްޓްމަންޓް ރައްކާތެރި ކުރާނެ އެއްބަސްވުމެއްގައި ސޮއިކުރަން ވެސް ނިންމި އެވެ.
އީޔޫ ކޮމިޝަނުގެ ރައީސް އުރްސުލާ ވޮން ޑެ ލެޔެން ވިދާޅުވީ އީޔޫ އާއި އިންޑިއާގެ ގުޅުން ގާތް ނަމަވެސް ދެ ފަރާތަށް ފައިދާވާނެ އެތައް ކަމެއްގައި އަދި އަތް ނުލާ ވާ ކަމަށެވެ. އެގޮތުން ގުޅުން ރަނގަޅު ކުރަން ޖެހޭ އެންމެ ބޮޑު ކަމެއްގެ ގޮތުގައި އޭނާ ފާހަގަކުރެއްވީ ވިޔަފާރި އާއި އިންވެސްޓްމަންޓްގެ ދާއިރާ އެވެ.
އީޔޫ އާއި އިންޑިއާގެ މަޝްވަރާތައް 2013 ވަނަ އަހަރު ހުއްޓުމަކަށް އައީ ޓެރިފް ކުޑަކުރުމާއި، ޕޭޓެންޓް ރައްކާތެރި ކުރުމާއި، ޑޭޓާ ސެކިއުރިޓީ އަދި އިންޑިއާ މީހުންނަށް ޔޫރަޕުގައި މަސައްކަތް ކުރުމުގެ ހައްގު ދިނުމާ މެދު އޮތް ހިޔާލު ތަފާތުފުންތަކުގެ ސަބަބުންނެވެ.
އީޔޫ އާއި އިންޑިއާގެ ވިޔަފާރި ވަރުގަދަ ކުރުމުގެ މަޝްވަރަތައް އަލުން ފެށިއިރު، އިންޑިއާގެ ބޮޑު ވަޒީރު މޯދީ ދާދި ފަހުން ވަނީ އީޔޫއާ ވަކިވި އިނގިރޭސި ވިލާތާއެކު ވެސް މިފަދަ މަޝްވަރާތައް ބާއްވާފަ އެވެ.
މިދިޔަ ހަފްތާގެ އެ މަޝްވަރާގައި ނިންމީ އިންޑިއާ އާއި އިނގިރޭސި ވިލާތުން ޕްރައިވެޓް ސެކްޓާ އިންވެސްޓްމަންޓަށް 1.4 ބިލިއަން ޑޮލަރު ހޭދަކުރުމަށާއި މިނިވަން ވިޔަފާރީގެ އެއްބަސްވުމެއް އެކުލަވާލުމަށެވެ.
އިނގިރޭސި ވިލާތުން އީޔޫ އާ ވަކިވުމަށް ފަހު މިހާރު މަސައްކަތް ކުރަމުން ދަނީ ވިޔަފާރީގެ ބައިވެރިން ހޯދުމަށެވެ. އެގޮތުން އިންޑިއާގެ ގިނަ އަމިއްލަ ކުންފުނިތަކަށް ފުރުސަތުތައް ފަހިވާނެ ކަމަށް ބެލެވެ އެވެ.
