ކޮވިޑުގެ ދެ ވަނަ ރާޅެއްގައި ހާލަތު ގޯސްވެފައިވާ އިންޑިއާގެ ނަންބަރުތައް ދަށްވާ ކަމަށް ސަރުކާރު ބުނި ނަމަވެސް، އަނެއްކާވެސް ރިކޯޑް އަދަދަކަށް މީހުން މަރުވެއްޖެ އެވެ.
އެ ގައުމުގެ ހެލްތު މިނިސްޓްރީގެ ތަފާސްހިސާބު ދައްކާ ގޮތުގައި އިއްޔެ 4،187 މީހުން މަރުވި އެވެ. އެއާއެކު ޖުމްލަ މަރުގެ އަދަދު ވަނީ 238،270 އަށް އަރާފަ އެވެ.
އޭގެ އިތުރުން އިއްޔެ ޕޮޒިޓިވްވި 401،078 މީހުންނާއެކު ޖުމްލަ ކޭސްތަކުގެ އަދަދު ވަނީ 21،892،676 އަށް އަރާފަ އެވެ. މިއީ އެންމެ ގިނަ ޕޮޒިޓިވް ކޭސް ފެނިފައިވާ އެމެރިކާއަށް ވުރެ 11 މިލިއަން މަދު އަދަދެކެވެ.
ނަމަވެސް ޕޮޒިޓިވްވާ ރޭޓް ދަށަށް ނުދާ ނަމަ، އިންޑިއާގެ ކޭސްތައް އެމެރިކާގެ 32 މިލިއަނާ އަރާ ހަމަކުރުމުގެ ފުރުސަތު އެބަ އޮތެވެ.
ހާލަތު ގޯސްވީ "ޑަބަލް މިޔުޓެންޓް" ވޭރިއެންޓުގެ ސަބަބުން
ދެ ވަނަ ރާޅުގައި ހާލަތު ގޯސްވެފައި ވަނީ މިދިޔަ މާޗް މަހު ފެނުނު "ޑަބަލް މިޔުޓެންޓް" ވޭރިއެންޓުގެ ސަބަބުން ކަމަށް އިންޑިއާއިން ބުނެ އެވެ.
ބީ.617.1 ގެ ނަން ދީފައިވާ ވޭރިއެންޓު ވަނީ އިންޑިއާގައި އެންމެ ކޭސްތައް ގިނަ ސްޓޭޓުތަކުން ނެގި ސާމްޕަލްތަކުން ފެނިފަ އެވެ.
"ޑަބަލް މިޔުޓެންޓް" އަކީ ވައިރަހެއްގައި ދެ މިޔުޓޭޝަން އެކުވުމުން ކިޔާ ނަމެކެވެ. ނުވަތަ ބަދަލުވެފައިވާ ދެ ވޭރިއެންޓް އެކުވުމުން ކިޔާ ނަމަކެވެ.
އިންޑިއާ ސަރުކާރުގެ އެންމެ އިސް ސައިންޓިފިކް އެޑްވައިޒަރު ވަނީ ތިން ވަނަ ރާޅެއްގެ އިންޒާރު މިހާރު ވެސް ދީފަ އެވެ. އެކަމަށް ތައްޔާރު ވާން އޭނާ ވަނީ ގޮވާލާފަ އެވެ.
ދެ ވަނަ ރާޅުގައި އިންޑިއާގެ ސިއްހީ ނިޒާމު ހުއްޓުމަކަށް އައިސްފައި ވާއިރު، ހޮސްޕިޓަލު އެނދުތައް ފުރި، އޮކްސިޖަނާއި ބޭސް ހުސްވުން ފަދަ އެތައް ކަމެއް ވަނީ ދިމާވެފަ އެވެ. އޭގެ އިތުރުން ބަލީގައި މަރުވާ މީހުންގެ ހަށިތައް އަންދާނެ ޖާގައެއް ވެސް މިހާރަކު ނެތެވެ.
ބައެއް ސްޓޭޓުތަކުން އަމިއްލައަށް ލޮކްޑައުންކޮށްގެން އުޅުނު ނަމަވެސް، އިގްތިސާދަށް ކުރާނެ އަސަރާ ގުޅިގެން ގައުމީ ލޮކްޑައުނަކަށް ދާން އިންޑިއާގެ މައި ސަރުކާރުން ބޭނުމެއް ނުވެ އެވެ.
