ކޮވިޑު ޖެހިގެން ދުނިޔެއިން މަރުވި މީހުންގެ އަސްލު އަދަދު 6.9 މިލިއަނަށް އަރާނެ ކަމަށް ވޮޝިންޓަން ޔުނިވާސިޓީގެ އިންސްޓިޓިއުޓް ފޯ ހެލްތު މެޓްރިކްސް އެންޑް އިވެލުއޭޝަނުން އަންދާޒާކޮށްފި އެވެ.
އެ އަދަދަކީ ރަސްމީ ތަފާސްހިސާބާ އަޅާ ބަލާއިރު ދެ ގުނަ އިތުރު އަދަދެކެވެ. އިންސްޓިޓިއުޓް ފޯ ހެލްތު މެޓްރިކްސް އެންޑް އިވެލުއޭޝަނުގެ ރިޕޯޓުގައި ބުނީ ގިނަ މަރުތައް ގައުމުތަކުގައި ރިކޯޑު ނުކުރާ ކަމަށެވެ.
ގައުމުތަކުން ކޮވިޑު މަރުގެ ގޮތުގައި ރިކޯޑު ކުރަނީ ހޮސްޕިޓަލުގައި ފަރުވާ ދެނިކޮށް ނުވަތަ ޕޮޒިޓިވް ކަމަށް ދައްކާ ފަހުން މަރުވާ މީހުން އެކަންޏެވެ. އެހެންކަމުން ކޮވިޑަށް ޕޮޒިޓިވްކަން ނޭނގި ތިބެ ބަލީގައި މަރުވާ މީހުން ރަސްމީ ތަފާސްހިސާބަކުން ނުފެންނާނެ އެވެ.
ޖޯން ހޮޕްކިންސް ޔުނިވާސިޓީގެ ރަސްމީ ތަފާސްހިސާބު ރައްކާ ގޮތުގައި މިހާތަނަށް 155 މިލިއަން މީހުންނަށް ކޮވިޑް ޖެހިފައި ވާއިރު، އޭގެ ތެރެއިން 3.25 މިލިއަން މީހުން ވަނީ މަރުވެފަ އެވެ.
އިންސްޓިޓިއުޓް ފޯ ހެލްތު މެޓްރިކްސް އެންޑް އިވެލުއޭޝަނުން ބުނީ ގައުމުތަކުގައި ކޮވިޑް ޖެހިގެން މަރުވާ މީހުންގެ އަދަދުތައް ބިނާވަނީ އެ ގައުމެއްގައި މި ބައްޔަށް ޓެސްޓު ކުރާ މިންވަރާ ކަމަށެވެ.
ކޮވިޑުގައި މަރުވި މީހުންގެ އަސްލު އަދަދާ ގުޅޭ ގޮތުން ރިޕޯޓެއް ނެރެފައި ވާއިރު، ދެ ވަނަ ރާޅެއްގައި ހާލަު ގޯސްވެފައިވާ އިންޑިއާގެ ރަސްމީ ތަފާސްހިސާބުތަކަށް ވުރެ އިތުރަށް މި ބަލި އެބަ އޮތް ކަމަށް ތަޖުރިބާކާރުން ބުނެ އެވެ.
އިއްޔެ ވެސް ހަތަރު ލައްކައަށް ވުރެ ގިނަ މީހުން ޕޮޒިޓިވްވެ، ހަތަރު ހާހެއްހާ މީހުން މަރުވި އެވެ. އެ ގައުމުގެ ޖުމްލަ ކޭސްތަކުގެ އަދަދަކީ 21 މިލިއަނެވެ. އަދި މަރުވެފައި ވަނީ 230،168 މީހުންނެވެ. ނަމަވެސް ޓެސްޓު ކުރުމާއި ފަރުވާ ލިބުމުގައި ހުރި ދަތިތަކުގެ ސަބަބުން އެތައް ބައެއްގެ މަރު ރަސްމީ ހިސާބުތަކުގައި ނުހިމެނޭނެ ކަމަށް ބެލެވެ އެވެ.
