ލަންޑަން (މެއި 6) - ޔުއެފާ ޔޫރޮޕާ ލީގުގެ ސެމީ ފައިނަލުން އާސެނަލް ކަޓުވާލުމަށް ފަހު އެ ޓީމުގެ ކުރީގެ ކޯޗު އުނާއި އެމެރީގެ ވިޔަރެއާލުން ފައިނަލުގައި މެންޗެސްޓާ ޔުނައިޓެޑާ ދެކޮޅަށް ކުޅުމުގެ ފުރުސަތު ހޯދައިފި އެވެ.
ފުރަތަމަ ލެގުގައި މިދިޔަ ހަފްތާގައި ވިޔަރެއާލް ދަނޑުގައި އާސެނަލް ބަލިވީ 2-1 އިންނެވެ. މިރޭ އަމިއްލަ ދަނޑުގައި 1-0 އިން މޮޅުވެގެން ވެސް އާސެނަލް ފައިނަލަށް ދިއުމުގެ ފުރުސަތު އޮތެވެ. އެކަމަކު މެޗު 0-0 އިން ނިމުމުން ވިޔަރެއާލުން އެ ކްލަބްގެ ތާރީހުގައި ފުރަތަމަ ފަހަރަށް ޔޫރަޕްގެ މުބާރާތެއްގެ ފައިނަލަކުން ފުރުސަތު ހޯދީ އެވެ.
މިދިޔަ ހަފްތާގައި ޔުނައިޓެޑުން އަމިއްލަ ދަނޑުގައި 6-2 އިން ރޯމާ ބަލިކުރުމުން މިރޭގެ ދެ ވަނަ ލެގަށް ނުކުތްއިރު ވެސް ޔުނައިޓެޑަށް އޮތީ ފައިނަލުގެ ޖާގައެއް ގާތްގަނޑަކަށް ކަށަވަރުވެފަ އެވެ. ބޮޑު ތަފާތަކުން މޮޅުވެގެން ނޫނީ ރޯމާ އަށް ފައިނަލުގެ ޖާގައެއް ލިބެން ނެތްއިރު، އެ ޓީމު ވަނީ މިރޭ އަމިއްލަ ދަނޑުގައި 3-2 އިން ޔުނައިޓެޑް ބަލިކޮށްފަ އެވެ. ރޯމާ އަތުން ދެ ލެގަށް ބަލާއިރު އެގްރިގޭޓުން ޔުނައިޓެޑް މޮޅުވީ 8-5 އިންނެވެ.
ވިޔަރެއާލާއި ޔުނައިޓެޑް ކުޅޭ ފައިނަލް އޮންނާނީ މި މަހު 26 ވަނަ ދުވަހު ޕޮލެންޑްގެ ގަޑާންސްކްގަ އެވެ. ޔުނައިޓެޑް ވަނީ 2017 ވަނަ އަހަރު މި މުބާރާތުގެ ޗެމްޕިއަންކަން ހޯދައިފަ އެވެ.
ވިޔަރެއާލް ކޮޅަށް މިރޭ ގޯލު ޖެހުމާ އެންމެ ގާތަށް ޖެހިލީ އާސެނަލްގެ ކެޕްޓަން ޕިއޭ އެމެރިކް އޮބާމަޔަން އެވެ. ދެ ހާފުގައި އޭނާ ފޮނުވާލި ދެ ހަމަލާ ވެސް އަމާޒުވީ ގޯލުގެ ދަނޑިއަށެވެ. ޖުމްލަކޮށް ބަލާއިރު ވިޔަރެއާލްގެ ދެ ޑިފެންޑަރުން ކަމަށްވާ ޕައު ޓޮރޭޒާއި ތަޖުރިބާކާރު ޑިފެންޑަރު ރައުލް އަލްބިއޯލް ވަނީ އާސެނަލްގެ އެޓޭކްތައް ހުއްޓުވުމުގައި ރަނގަޅު ކުޅުމެއް ދައްކައިފަ އެވެ.
މިއީ ސެވިއްޔާ ގޮވައިގެން ޔޫރޮޕާ ލީގުގެ ޗެމްޕިއަންކަން ތިން ފަހަރު ހޯދި އެމެރީ ޔޫރޮޕާ ލީގުގެ ފައިނަލަށް ގެންދިޔަ ތަފާތު ތިން ވަނަ ޓީމެވެ. އެމެރީ ވަނީ 2019 ވަނަ އަހަރުގެ ފައިނަލުގައި އާސެނަލް ގޮވައިގެން ވާދަކޮށް ޗެލްސީ އަތުން ބަލިވެފަ އެވެ. އެމެރީ، އާސެނަލް ކޯޗުކަމުން ވަކިކުރީ 2019 ވަނަ އަހަރު ފަހުކޮޅުގަ އެވެ.
ރޯމާ ކޮޅަށް ގޯލު ޖެހުމަށް ފަހު ކަވާނީ އުފާފާޅުކުރަނީ: ކަވާނީ އަކީ ފާއިތުވި 35 އަހަރު ތެރޭ ޔޫރަޕްގެ މުބާރާތެއްގެ ސެމީ ފައިނަލް ދެ ލެގުގައި ދެ ގޯލު ޖެހި ފުރަތަމަ ކުޅުންތެރިޔާ.-- ފޮޓޯ: އޭއެފްޕީ
ރޯމްގައި މިރޭ ކުޅުނު މެޗުގެ ފުރަތަމަ ހާފުގައި ފްރެޑް ދިން ބޯޅައަކުން އެޑިންސަން ކަވާނީ ޔުނައިޓެޑަށް ލީޑުނަގައިދިނެވެ. އެކަމަކު ދެ ވަނަ ހާފްގައި ގާތްގާތުގައި އެޑިން ޖެކޯ އާއި ބްރަޔާން ކްރިސްޓަންޓޭ ޖެހި ގޯލުތަކުން ރޯމާ އިން ނަތީޖާ އަނބުރާލި އެވެ. އިތުރު ގޯލެއް ޖަހަން ހެންރިކް މިކިތާރްޔަން އަށް ލިބުނު ފުރުސަތުގެ ބޭނުމެއް ނުހިފުނެވެ. ޔުނައިޓެޑަށް އެއްވަރުކޮށްދިނީ ބްރޫނޯ ފެނާންޑޭސް ދިން ބޯޅައަކުން ކަވާނީ އެވެ.
ބަދަލު ކުޅުންތެރިއެއްގެ ގޮތުގައި ކުޅެން އެރި ޒުވާން ކުޅުންތެރިޔާ ނިކޮލަ ޒަލިއޫސްކީ ރޯމާ މޮޅުކޮށްދިން ގޯލު ޖެހީ މެޗު ނިމެން ހަތް މިނިޓަށް ވެފައި ވަނިކޮށެވެ. ޒަލިއޫސްކީ ޖެހި ބޯޅަ ގޯލަށް ވަނީ ޔުނައިޓެޑްގެ އަލެކްސް ޓެލޭސް ފައިގައި ޖެހިފަ އެވެ.
މި ފަހަރުގެ ޔޫރޮޕާ ލީގު ފައިނަލަކީ 2018 ވަނަ އަހަރު ޔުނައިޓެޑްގެ ކޯޗުކަމާ ހަވާލުވި އޮލެ ގުނަ ސޯލްޝެއާ އެ ޓީމު ގޮވައިގެން ނުކުންނާނެ ފުރަތަމަ ފައިނަލެވެ. މިދިޔަ ސީޒަނުގައި ތިން މުބާރާތުގެ ސެމީ ފައިނަލުން ވަނީ ބަލިވެފަ އެވެ. އަދި މި ފަހަރުގެ ލީގު ކަޕްގެ ސެމީ ފައިނަލުން ވެސް ވަނީ ކަޓައިފަ އެވެ. ޔޫރޮޕާ ލީގުގެ ސެމީގައި މިދިޔަ ފަހަރު ޔުނައިޓެޑް ބަލިވީ ޗެމްޕިއަންކަން ހޯދި ސެވިއްޔާ އަތުންނެވެ.
އިންގްލެންޑްގެ ޓީމުތަކުގެ ތެރެއިން ޔޫރަޕްގެ މުބާރާތްތަކުގައި ދެ ވަނަ އަށް އެންމެ ގިނަ ފައިނަލުގައި ކުޅެފައިވަނީ ޔުނައިޓެޑް އެވެ. މިއީ ޔޫރަޕްގެ މުބާރާތްތަކުގައި ޔުނައިޓެޑް ކުޅޭނެ އަށް ވަނަ ފައިނަލެވެ. އެއް ވަނައިގައި އޮތީ 14 ފައިނަލުގައި ކުޅެފައިވާ ލިވަޕޫލް އެވެ.
