ކޮވިޑް-19ގެ ހާލަތު އިންތިހާއަށް ނުރައްކާވުމާ ގުޅިގެން އަމިއްލަ އޮފީސްތަކަށް މުވައްޒަފުން ނެރެގެން މަސައްކަތް ކުރުން ވަގުތީ ގޮތުން މެދުކަނޑާލަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިރޭ އަންގައިފި އެވެ.
އެޗްޕީއޭ އިން މިރޭ ބުނީ، ވަކި ގޮތެއް އަންގަންދެން މާލެ، ހުޅުމާލެ، ވިލިނގިލި، ތިލަފުށި، އަދި ގުޅީފަޅު ގައި ހުރި ސަރުކާރާއި އަމިއްލަ ވިޔަފާރި ކުންފުނި އަދި އޮފީސްތަކަށް މުވައްޒަފުން ނެރެގެން މަސައްކަތް ކުރުން ހުއްޓާލުމަށެވެ.
އަދި ބާއްވަން ޖެހޭ ބައްދަލުވުންތައް އޮންލައިން ކޮށް ބޭއްވުމަށް ވެސް ނިންމުމުގައި އެދިފައިވެ އެވެ.
ފާއިތުވި ހަފްތާއެއްހާ ދުވަހުގެ ތެރޭގައި ރާއްޖޭގައި ކޮވިޑް-19ގެ ހާލަތު އިންތިހާއަށް ގޯސްވެފައިވާއިރު، ކޮންމެ ދުވަހަކު އަލަށް ބަލިޖެހޭ މީހުންގެ އަންނަނީ ރެކޯޑް އަދަދުތަކުން އިތުރުވަމުންނެވެ.
މިއަދު ވެސް 703 މީހުން ވަނީ ކޮވިޑަށް ޕޮޒިޓިވްވެފަ އެވެ. އޭގެ ތެރެއިން 526 މީހުން ޕޮޒިޓިވް ވެފައިވަނީ މާލެ ސަރަހައްދުންނެވެ.
އެއާއެކު ހޮސްޕިޓަލުތައް ފުރި، ސިއްހީ ނިޒާމަށް ނުކަތާވަރަށް ކޭސްތައް އިތުރުވަމުންދިޔުމާ ގުޅިގެން ބަލި ފެތުރުން ހުއްޓުވުމަށް އެޗްޕީއޭއިން މިހާރު ވަނީ ހަރުކަށި ފިޔަވަޅުތައް އަޅައިފަ އެވެ.
މިގޮތުން، ސްކޫލްތަކާއި އޮފީސްތަކުގެ އިތުރުން، ޕާކުތަކާއި ކުޅިވަރު ދަނޑުތަކާއި ޖިމް އަދި ސިނަމާތައް ވެސް ވަގުތޫ ގޮތުން ބަންދުކުރަން ވަނީ އަންގައިފަ އެވެ.
އޭގެ އިތުރުން، މާލެ ސަރަހައްދުގައި ރޭގަނޑު 9:00 އިން ފަތިހު 4:00 އަށް ކާފިއު ވެސް މިހާރު އަންނަނީ ހިންގަމުންނެވެ.
ރާއްޖެއިން މިހާތަނަށް ކޮވިޑްގައި 77 މީހުން މަރުވެފައިވާއިރު، މިއަދު އެކަނިވެސް ފަސް މީހަކު ވަނީ އެ ބަލީގެ ޝިކާރައަކަށްވެފަ އެވެ.
