ބައެއް ރަށް ރަށުގައި ކޮވިޑް ފެތުރުން ކޮންޓްރޯލް ކުރުމަށްޓަކައި ކާފިއު ހިންގައި ހަރުކަށި ފިޔަވަޅުތައް އަޅަން ނިންމާފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)ން މިރޭ ހާމަކޮށްފި އެވެ.
އެގޮތުން، މިރޭން ފެށިގެން ވަކިގޮތެއް އަންގަންދެން ފަސް ރަށެއްގައި ކާފިއު ހިންގަން އެޗްޕީއޭން ވަނީ ނިންމާފަ އެވެ.
ކާފިއު ހިންގާ ރަށްތައް
ޅ. ނައިފަރު
ކ. މާފުށި
އއ. މަތިވެރި
އއ. އުކުޅަސް
ބ. އޭދަފުށި
މި ރަށްރަށުގައި އަޅަން ނިންމާފައިވާ ފިޔަވަޅުތައް؛
- ހަވީރު ހަތަރަކުން ފެށިގެން ފަތިހު ހަތަރަކަށް އެއްގަމު އުޅަނދުފަހަރު ދުއްވުމާއި މަގުމައްޗާއި އާންމު ތަންތަނަށް މީހުން ނުކުތުން މަނާކުރުން
- ޕާޓީތަކާއި ހަފްލާތަކާއި ރަސްމިއްޔާތުތައް ބޭއްވުން ހުއްޓާލުން
- ރަށުގެ އެއްގެއިން އަނެއް ގެއަށް ޒިޔާރަތް ކުރުން ހުއްޓައިލުން
- އެއްފަހަރާ ތިން މީހުންނަށްވުރެ ގިނަމީހުން މަގުމައްޗާއި އާންމު ތަންތާގައި އެއްވެއުޅުން ހުއްޓާލުން
- ސެލޫންތަކާއި ޖިމް އަދި ބޯކޮށާ ތަންތަން ބަންދުކުރުން
- ހުރިހާ ކުޅިވަރު ހަރަކާތްތަކާއި ކަސްރަތު ހަރަކާތްތައް ހިންގުން ހުއްޓާލުން
- ފިހާރަތަކުން ހިދުމަތް ދޭއިރު ހެލްތް ޕްރޮޓެކްޝަން އެޖެންސީން އާންމުކޮށްފައިވާ ގައިޑްލައިނާ އެއްގޮތަށް ޓެކްސީގެ ހިދުމަތް ދިނުން
- ކެފޭ ރެސްޓޯރަންޓް ތަކުން ދެމުންގެންދާ ޑައިން-އިންގެ ހިދުމަތްތައް ހުއްޓައިލުން
އެޗްޕީއޭން ބުނީ ހުއްދަ ނަގައިގެން ކާފިއު ގަޑީގައި ޑެލިވަރީގެ ހިދުމަތްތައް ދެވޭނެ ކަމަށެވެ. އަދި ޒަރޫރީ ބޭނުން ތަކަށާއި ސިއްހީ ފަރުވާ ހޯދަން ނިކުމެވޭނެ ކަމަށެވެ.
ފިޔަވަޅުތައް އެޅި ފަސް ރަށަކީ ވެސް މިވަގުތު ކޮވިޑްގެ ގިނަ ކޭސްތަކެއް ފެނި، މޮނީޓަރިންގެ ހާލަތުގައި ހުރި ރަށްތަކެވެ.
ރަށްރަށަށް އެޅި ފިޔަވަޅުތަކަކީ މިވަގުތު މާލޭ ސަރަހައްދަށް ވެސް އަޅާފައިވާ ފިޔަވަޅުތަކެވެ. ރާއްޖޭގައި ކޮވިޑް ފެތުރޭ މިންވަރު އިތުރުވެފައިވާއިރު، މިއީ ހަތަރު ވަނަ ރާޅު ކަމަށް އެޗްޕީއޭން ވަނީ ބުނެފަ އެވެ.
