ކޮވިޑުގެ ދެ ވަނަ ރާޅެއްގައި ހާލަތު ގޯސްވެފައި ވަނީ މިދިޔަ މާޗް މަހު އިންޑިއާއިން ފެނުނު "ޑަބަލް މިޔުޓެންޓް" ވޭރިއެންޓުގެ ސަބަބުން ކަމަށް އެ ގައުމުން ބުނެފި އެވެ.
ބީ.617.1 ގެ ނަން ދީފައިވާ ވޭރިއެންޓު ވަނީ އިންޑިއާގައި އެންމެ ކޭސްތައް ގިނަ ސްޓޭޓުތަކުން ނެގި ސާމްޕަލްތަކުން ފެނިފަ އެވެ.
ނޭޝަނަލް ސެންޓަ ފޯ ޑިޒީޒް ކޮންޓްރޯލުގެ އޮފިޝަލަކު ބުނީ ކޭސްތައް އިތުރުވުމާއި އާ ވޭރިއެންޓާ ގުޅުމެއްވާ ކަން ސީދާ ޔަގީން ކުރެވިފައި ނުވާ ކަމަށެވެ.
"ޑަބަލް މިޔުޓެންޓް" އަކީ ވައިރަހެއްގައި ދެ މިޔުޓޭޝަން އެކުވުމުން ކިޔާ ނަމެކެވެ. ނުވަތަ ބަދަލުވެފައިވާ ދެ ވޭރިއެންޓް އެކުވުމުން ކިޔާ ނަމަކެވެ.
ކޭސްތައް ގިނަވީ އެ ވޭރިއެންޓުގެ ސަބަބުން ކަމަށް އިންޑިއާއިން ބުނެފައި ވާއިރު، އިއްޔެ ވެސް 412،000 މީހުން ޕޮޒިޓިވްވެ، 3،980 މީހުން މަރުވި އެވެ.
އިންޑިއާ ސަރުކާރުގެ އެންމެ އިސް ސައިންޓިފިކް އެޑްވައިޒަރު ވަނީ ތިން ވަނަ ރާޅެއްގެ އިންޒާރު މިހާރު ވެސް ދީފަ އެވެ. އެކަމަށް ތައްޔާރު ވާން އޭނާ ވަނީ ގޮވާލާފަ އެވެ.
ދެ ވަނަ ރާޅުގައި އިންޑިއާގެ ސިއްހީ ނިޒާމު ހުއްޓުމަކަށް އައިސްފައި ވާއިރު، ހޮސްޕިޓަލު އެނދުތައް ފުރި، އޮކްސިޖަނާއި ބޭސް ހުސްވުން ފަދަ އެތައް ކަމެއް ވަނީ ދިމާވެފަ އެވެ. އޭގެ އިތުރުން ބަލީގައި މަރުވާ މީހުންގެ ހަށިތައް އަންދާނެ ޖާގައެއް ވެސް މިހާރަކު ނެތެވެ.
ބައެއް ސްޓޭޓުތަކުން އަމިއްލައަށް ލޮކްޑައުންކޮށްގެން އުޅުނު ނަމަވެސް، އިގްތިސާދަށް ކުރާނެ އަސަރާ ގުޅިގެން ގައުމީ ލޮކްޑައުނަކަށް ދާން އިންޑިއާގެ މައި ސަރުކާރުން ބޭނުމެއް ނުވެ އެވެ.
